Sápmi |

Mášengolleroggan nogai Leammis mannan ija, luottaid čorgemii lea guokte jagi áigi – "Soaitá šaddat hoahppu"

Golleroggiin lea guokte jagi áigi čorget luottaid ja doalvut mášeniid eret Leammi álbmotmeahcis. Helssetlaš golleroggi Pekka Itkonen sávvá dán áiggi reahkkát.

Kullankaivaja Pekka Itkonen.
Pekka Itkonen lea roggan golli Leammis 40 jagi. Govva: Vesa Toppari / Yle

Maŋimuš gollerogganmášenat jaskkodedje Leammis mannan ija, go mášengolleroggan nogai Leammi álbmotmeahcis geassemánu maŋimuš beaivve. Dál golleroggiin lea guokte jagi áigi čorget luottaid ja doalvut rusttegiid ja mášeniid eret.

– Biraslobit leat fámus dábálaččat guokte jagi, nappo dál duohko suoidnemánu 2022 rádjái. Guokte jagi lea áigi čađahit daid doaimmaid. Guovtti ruvkebire oasil das lea spiehkastat, ja doppe dat maŋŋedoaimmat galget leat dahkkon boahtte jagi čakčamánu rádjái, muitala prošeaktahoavda Jouni Rauhala Lappi EBI-guovddážis.

Rauhala muitala, ahte maŋŋedoaimmaid stivrejit sihke biraslobit ja čáhcelobit ja ruvkelága ruvkegirjemearrádusat.

– Biraslobiid ja čáhcelobiid oasil mearrádusat leat eanaš dat, ahte guovlluid galgá čorget. Ja jos lea addon čáhcelága mielde lohpi oali sirdimii, dat oalit galget máhcahuvvot daidda ovddeš sajiide nu bures go vejolaš. Ruvkelága čuovvu maŋŋedoaimmaide laktása dát mášeniid ja rusttegiid eret buktin.

Video: Raimo Kanamäen kullankaivukalustoa Lemmenjoen kultakentillä Miessijoella.
Mášengolleroggan nogai Leammis mannan ija. Leammi álbmotmeahci guovllus ii oaččo šat roggat golli mášeniiguin geassemánu maŋŋá. Video: Vesa Toppari / Yle

EBI-guovddáš gohcá čorgema

Helssetlaš golleroggi Pekka Itkonen lea roggan golli Leammis 40 jagi.

Dál dát báhcá dušše áigeádjin, go mášengolleroggan lea nohkan ja dušše goaivvuin roggan lea lobálaš. Maiddái sus lea dál guokte jagi áigi čorget luottaid ja doalvut mášeniid eret. Son sávvá dán áiggi reahkkát.

– Soaitá šaddat hoahppu, muhto jáhkán ahte jos ieš gierddan ja gálvvut girdet, de basttán dan guovtti jagis bargat. Jos dasto bohtet muhtin váttisvuođat mášeniiguin dahje juoidá eará, de ferte eiseválddiiguin ságastallat áššis. Sávvamis manná dábálaš áiggis.

Leammi guovllus leat jo muhtin ruvkebiret maid doaibma lea nohkan árabut ja čorgemat leat dahkkon, muitala Jouni Rauhala. EBI-guovddáš gohcá luottaid čorgema ja fitná dárkkisteamen daid guovlluid, gos mášenroggan lea leamaš.

– Geavadis dat gohcin dáhpáhuvvá ovttas ruvkeeiseválddiin guovlluid dárkkistemiin, ja dasto doppe dárkkistit maiddái čázádaga dili dán mášengolleroggama nohkama maŋŋá.

Mášengolleroggan lea barggahan maiddái Sámedikki máŋggaid jagiid, ja dál leage Sámedikki ságadoalli Tuomas Aslak Juuso duđavaš, go mášengolleroggama nohkan šaddá duohtan ja guovllu čorgen ovddeš dillái beassá johtui.

Sámedikkisge áigot čuovvut mášengolleroggama luottaid čorgema ja luonddu máhcaheami nu guhkás luonddudillái go vejolaš.

Guldal dás Jouni Rauhala ja Tuomas Aslak Juuso jearahallamiid. Jietna: Yle Areena.

Varrasamosat: Sápmi

Váldoođđasat

Varrasamosat

Muualla Yle.fi:ssä