Sápmi |

Mátkeealáhussuorgi stuorru Ohcejogas – Fitnodagat investerejit ja huksejit dán geasi

Ohcejohkii huksejit ođđa hotealla, luksus- ja superiorbarttaid, soarveigluid ja Deatnogáddái ceaggana guokte ođđa restoráŋŋa.

Jussi Eiramo báiki Ohcejohnjálmmis oidno buoremusat Sámi šalddi alde.
Jussi Eiramo luopmoguovddáža báikki Ohcejohnjálmmis oaidná buoremusat Sámi šalddi alde. Restoráŋŋa ja luksusdási soarveiglut gehččet joga guvlui. Govva: Outi Paadar/Yle

Dalle go Deanu guolástannjuolggadusaid čavgegohte, dat lei ohcejohkalaš mátkeealáhusfitnodagaide čielga mearka das, ahte guolástanturisma boahtá geahppánit ja sadjái ferte hutkat juoidá ođđa.

Guokte jagi dassái Ohcejoga márkan lei guorranan ja turisttat ledje jávkan ja dalle árvaladde, ahte juobe 30–40 proseantta gávppi oastiin eai dihtto. Ohcejoga fitnodatdoallit ledje fuolas geasseturismas juo guhtta jagi dassái, jagis 2013.

Das rájes lea dáhpáhuvvagoahtán Ohcejogas.

Fitnodatdoallit eai leat báhcan ruossalasgieđain čohkkát, baicce leat duostan investeret ja huksejit dán geasi. Soađegillilaš fitnodatdoalli Jussi Eiramo lassin golbma eará fitnodatdoalli leat huksemin eanet lassesajiid Ohcejohkii.

– Guolástanturisma sadjái leat boahtán guovssahasaid, násttiid ja ijahis ija geahččit ja čakčaturisttat, dadjá Juha Reinola Lomatärppi bartagilis.

Maid gieldda ealáhusdoaibma lea ovddedišgoahtán dihtomielalaččat mátkeealáhusa ja gielddapolitihkkárat vurdet erenoamážit Jussi Eiramo fitnodaga ealáskahttit girkosiidda.

Ohcejohka lea mearridan vuovdalit iežas jaskkodanbáikin ja lanseren Slow down in Saami village turismma várás.

Sávvá prográmmabálvalusaid eanet

Moadde jagi dassái beakkehii, ahte Ohcejohkii plánejit miljovnnaid euroid luopmoguovddáža. Kakslauttanen Arctic Resort fitnodateaiggáda Jussi Eiramo plánat ovdánišgohte, go Ohcejoga gielddastivra mearridii vuovdit eatnamiid.

Jussi Eiramo fitná juohke vahkus Ohcejogas huksenbargguid dihte. Váldodálu Pisara vuođđu leikejuvvui suoidnemánus.
Jussi Eiramo fitná juohke vahkus Ohcejogas huksenbargguid dihte. Váldodálu Pisara vuođđu leikejuvvui suoidnemánus. Govva: Outi Paadar /Yle

Fitnodatdoalli plánen luopmoguovddáža huksemat álge dán geasi Ohcejoga girkosiiddas. Suoidnemánus leikejuvvui Pisara -váldodálu vuođđu.

– Geahčái boahtá restoráŋŋa, mas leat igluid lágan glássaseainnit ja rohpi, mas oaidná Deanu bajás Sámi šalddi guvlui ja maiddái albmái, čilge fitnodatdoalli Jussi Eiramo iežas plánen váldodálus.

Lassin huksejuvvojit guokte luksus dási soarveiglu, masa bohtet golbma glássaiglu oasi ja ovcci glássasoarvebartta. Plánaid mielde luopmoguovddáš galgá lea válmmaš beannot jagi geažes, juovllaide.

Pisara -váldodálu tevnnegat. Dálus leat golbma gearddi ja dohko boahtá resepšuvdna, restoráŋŋa sihke hoteallalanjat.
Jussi Eiramo lea plánen Pisara -váldodálu ieš. Dálus leat golbma gearddi ja dohko huksejuvvo restoráŋŋa sihke hoteallalanjat. Govva: Outi Paadar/Yle

Eiramo lea bargan turisman jagi 1973 rájes ja diehtá, ahte olbmuid geasuha eanemusat dán guovllu luondu. Dálveturismmas lea dehálaš dipma, geahppa muohta go su mielde Gaska-Eurohpás dat illá gávdno.

– Muhto dat ii reahkká. Galget leat lassin miellagiddevaš aktivitehtat maid juohkehaš sáhttá bargat, nugo dálvit bohccot, čuoigan, mohtorgielkkát, njealjejuvllagat, huskyt ja rudneoaggun. Geassit fas guolásteapmi, fanasmátkkit ja kanohtameallun, deattuha Eiramo gáibádusaid birra ja rámiida man buorit vejolašvuođat dáidda leat ja sávvá eandalii huskybeatnagiid Ohcejohkii.

Ohcejogas lea sullii seamma guhki Avvila, Leavnnja, Čáhcesullo ja Girkonjárgga girdišilljuide.

– Dan botta go Avvilii seaivu okta girdi beaivvis, Girkonjárgii seivot njeallje girdi, čilge Eiramo Ohcejoga sajádaga buriid beliid ja sávva ahte johtolatoktavuođat Suoma bealde buorránivčče.

Dat lea turismii dehálaččat, oaivvilda son ja lasiha, ahte golmma-njealji jagis oaidná gánnehiigo dát investeren.

Birra jagi fálaldat, ii dušše dálveturisma

Nuorgamin lomakeskus ávvuda boahtte jagi das go lea gollan 50 jagi fitnodaga vuođđudeamis. Fitnodat lea fállan dálveturisttaide idjadansajiid badjel 20 jagi ja lea rabas birra jagi.

– Leimmet várra vuosttas fitnodat, mii fállagođii geassebarttaid lassin dálveidjadansajiid Ohcejoga gielddas, lohká fitnodateaiggát ja -doalli Marjatta Holmberg, gean gallestallit leat dálvit eanáš olgoriikkain.

Lomakeskus lea dál bárisin huksemin guokte superior dási bárradálu, maidda bohtet njeallje vistti.

– Barttat leat skábmamánus válbmasat, dadjá Holmberg, gean mielde gallestallit leat sávvan superior dási idjadanbáikkiid.

Nuorgamin lomakeskus nubbi eaiggát Raimo Hekkanen várdámin duoddaris.
Nuorgamin lomakeskus nubbi eaiggát Raimo Hekkanen várdámin duoddaris. Govva: Nuorgam Holiday Village Nuorgamin Lomakeskus

Holmberg lohkáge, ahte leat nu máŋggat áššit, maidda mátkeealáhusfitnodagat eai sáhte váikkuhit ja namuha ovdamearkan Deanu guolástannjuolggadusaid sihke guovssahasaid oidnondávjodaga ja -sykla.

Danin Lomakeskus ii leatge erenoamážit deattuhan mange jagiáiggi, muhto fálaldagat leat birra jagi.

– Njuorggán lea nu buori báikkis. Dás lea lahka luondu, Deatnu, duoddarat, Jiekŋamearra, logahallá Holmberg, gii ieš leamaš fitnodatdoallin 30 jagi.

Lomakeskus lea olles leavttuid ođasmahttimin ja ráhkkaneamen boahtte jagi ávvujahkái ja Holmberg sávvá, ahte mátkeealáhusa ovdáneapmi buktá oppalaččat buori olles gildii, vaikko lohkáge turismasuorggi gáibidit nu issaros olu barggu.

Ođđa restoráŋŋa Deatnogáddái

Aurora Holidays doaimmajođiheaddji Tiina Salonen vánddardeamen duoddaris. Salonen jođiha Aurora Holidays -fitnodaga ovttas guimmiinis, Mika Länsmanin.
Aurora Holidays doaimmajođiheaddji Tiina Salonen vánddardeamen duoddaris. Salonen jođiha Aurora Holidays -fitnodaga ovttas guimmiinis, Mika Länsmanin. Govva: Priváhta

Maiddái Aurora Holidays lea investeren ja álgodálvvi várás válmmaštuvvá restoráŋŋa, gosa šihttet 60 olbmo. Dasto huksejit ođđa bárradálu njealji bartta lassin ja dat válmmaštuvvagoahtá de dalá maŋŋá restoráŋŋa.

Aurora Holidays bargá birra jagi turismmain ja fállá iešguđege lágan aktivitehtaid galledeaddjiide. Fitnodatdoalli lea fuomášan ovtta ođđa fenomera maŋimuš jagiid.

– Dál lea jorggehan dálveturisma buorebun go geasseturisma, lohká doaimmajođiheaddji Tiina Salonen.

Deanu guolástannjuolggadusaid nuppástusaid maŋŋá guolástanlobiid vuovdigohte neahttagávppis ja guokte maŋimuš geasi guolásteaddjiin leamaš váttis oastit lobiid.

– Dán geasi dilli leamaš buoret. Guolleturisttaid lohku lea lassánan ja masá juo máhccan dasa mii lei, dadjá Salonen.

Guovssahasat geasuhit eanemusat

Lomatärppi bartagilis Juha Reinola muitala, ahte ovdal sin barttat ledje láigomassii dušše geassit, muhto dál birra jagi. Sii investerejit dán geasi golbma 50 njealjehasmehtera luksusbartta.

– Dat leat jurddašuvvon ovdamearkan báraide, geat johtet iežaset biillain, čilge Reinola ja lohká ahte sis leat juo stuorát luksusbarttat.

Fitnodateaiggát Juha Reinola mielde oktasašbarggus lea fápmu.
Fitnodateaiggát Juha Reinola oktasašbarggus lea fápmu. Govva: Outi Paadar /Yle

Sin gallestallit leat eanáš olgoriikalaš turisttat, muhto muhtun muddui maid suopmelaš turisttat.

– Dalán go Ohcejohka beaggá, de dat lea buorrin mátkeealáhussii, diehtá Reinola bartagilis, mii lea áibbas Holiday Village Valle bálddas, muhto dan illá oidno beziid gaskka.

Gaskkohagaid gallestallit livčče eanet go sis leat barttat ja seaŋggat.

– Máŋgasat geat leat fitnan dálvit, háliidat boahtit maid geassit gallestallat.

Sin fitnodat háliida bálvalit guovssahasturisttaid nu bures go vejolaš.

– Juohke barttas leat guovssahasveahkkár ja rukses gállolámppát. Guovssahastoardna tráhpparavddas johtá maid rukses čuovgabáddi, vai oidnet goarŋgut 25 mehtera allodahkii muorragežiid bajábeallái. Muđui buot eará čuovggat jáddaduvvojit, čilge Rienola ja lohká toardna leat gallestalliid sávaldat.

Gallestallit sávve guovssahastoardna Lomatärppi ja dál dat ceaggá šilljus. Juha Reinola mielde šaddet buoret guovssahasgovat, go viššá tordnii goarŋut.
Gallestallit sávve guovssahastoardna Lomatärppi ja dál dat ceaggá šilljus. Juha Reinola mielde šaddet buoret guovssahasgovat, go viššá tordnii goarŋut. Govva: Outi Paadar /Yle

Ja jos Ohcejogas lea balvái, vuojihit turisttaid dohko gos guovssahasaid oaidná. Okta ofelaš sáhttá vuodjit dálvvis 34 000 kilomehtera daid dihte.

– Eanáš guossit besset daid oaidnit ja sáhttet velohallat šiljus, buollašis diimmuid mielde go gehččet albmái, muitala movttegis fitnodatdoalli ja lohká, ahte sin turisttat illá oidnojit gilis váccašeamen.

Reinola lea ilus go earáge go ohcejohkalaččat investerejit Ohcejohkii.

– Ovdamearkka dihte Jussi Eiramo plánat hukset Ohcejohkii leat buot guovllu mátkefitnodagaide buorrin, loahpaha Reinola.

Varrasamosat: Sápmi

Váldoođđasat

Varrasamosat

Muualla Yle.fi:ssä