Sápmi |

Máttabeale boazodoallit váidet Neakkela juohkima

Neakkela bálgosa juohkima oktavuođas máttabeale bálgosii šaddan boazodoallit eai leat duđavaččat mearrádussii ja áigot váidalit das. Min guohtuneatnamiin leat bárttat, gilit ja geainnut, dadjá máttabeale boazoisidin válljejuvvon Esa Kumpulainen.

Esa Kumpulainen hálai boraspiriid birra Helsingin Sanomat -áviissa neahttasiiddus giđđat 2014.
Máttabeale boazoisidin válljejuvvon Esa Kumpulainen ii leat duđavaš juohkinmearrádussii. Kumpulainen hálai boraspiriid birra Helsingin Sanomat -áviissa neahtta-tv:s giđđat 2014. Govva: HSTV

Neakkela bálgosa badjelmearálaš čoahkkin mearridii gaskavahku, ahte bálggus juohkása guovtti lahkkái, davit ja máttit bálgosiidda.

Čoahkkin ii lean goit ovttamielalaš mearrádusas. Máttabeallái šaddan boazodoallit áigot váidit.

"Máttaoasis fuonit guohtuneatnamat"

Máttabeale boazoisidin gaskavahku válljejuvvon Esa Kumpulainen ii eisige leat duđavaš juohkinmearrádussii.

– Dát ii leat buorre mearrádus min boazodoalu ektui. Jearaldat lea guohtuneatnamiin ja min eatnamiin leat dál 400 luopmobártta, 11 gili, geainnut ja buot. Ii das gal sáhte bohccuid dikšut. Áiddi siste dieđus sáhtášii biebmat, muhto dalle ii leat šat jearaldat luondduealáhusas, dadjá Kumpulainen.

Kumpulainen mielas Neakkela bálgosa ii livčče dárbu juohkit oppanassiige.

– Jearaldat lea unna nákkuin. Buoremus livččii leamaš doallat Neakkela ovtta ealli bálggusin. Mii áigut váidit mearrádusa, dan gal dahkat.

"Oalle fárta leamašan"

Sivvan Neakkela bálgosa juohkimii leat jo guhká bistán guohtunriiddut, main leat dahkkon maiddái máŋggat rihkusalmmuhusat.

Dálá boazoisit Hannu Ranta sávvá juohkinmearrádusa buktit ráfi bálgosii.

– In máhte dadjat, ráfogo dilli, muhto doaivvu miel. Gal dáppe leamaš maŋimuš áigge oalle fárta ja fasttes dáhpáhusat, muitala boazoisit Hannu Ranta.

Lappi guovlohálddahusdoaimmahat AVI nanne loahpalaččat Neakkela bálgosa juohkima. Mearrádusa lea goittotge vejolašvuohta váidit.

Varrasamosat: Sápmi

Váldoođđasat

Varrasamosat

Muualla Yle.fi:ssä