Sápmi |

Meahcásteaddjigurssaide servet ain eanet nissonolbmot ja mánát – Pia Nikula vulggii gursii vai beassá maŋŋelis bivdit borramuša beavdái

Gurssaide leamaš nu stuorra beroštupmi, ahte fuođđogáhttensearvvis mearridedje ordnet eanet gurssaid go maid ledje plánen.

Pia Nikula, Inari
Pia Nikula bođii meahcásteaddjigursii vai beassá bivdit ealgga. Govva: Anneli Lappalainen / Yle

Anárlaš Pia Nikula lea okta daid ođđa meahcásteaddjiin, geat leat dán čavčča čađahan meahcásteaddjidutkosa. Sutnje bođii miella searvat gursii, go su irgi láve meahcástit ja hohkahii searvat.

– Mun háliidan sarvva meahcástit go dat lea mu mielas dehálaš. Bivdu lea dehálaš maiddái danin go das fidne borramuša beavdái ja galhan dat lea maid dakkár kulturbargu.

Nikula muitala, ahte álggos dušše son galggai searvat meahcásteaddjigursii, muhto go su máná guoktá gulaiga gosa eadni lea áigumin, de skuvlaahkásaš nieida ja gánda maid háliideigga searvat meahcásteaddjigursii ja -iskosii.

Dál Nikula vuordá dan go olles bearaš beassá vuolgit bivdui.

– Somá lea vuolgit mánáiguin meahcástit ja buorre go meahcásteapmi joatkašuvvá nuorra bulvii.

Njeallje gurssa dievihedje dalán

Anára fuođđogáhttensearvi lea dán čavčča doapman ordnet meahcásteaddjigurssaid ja -iskosiid maŋŋá maŋŋálagaid go beroštupmi gurssaide lea leamaš stuoris.

Searvvi doaibmajođiheaddji ja meahcásteaddjigurssa oahpaheaddji Pertti Vikeväkorva muitala, ahte gurssain leat skuvlen dán čavčča máŋgalogi ođđa meahcásteaddji Anára guvlui. Earenoamáš duđavaš doaibmajođiheaddji lea dasa go nuorat ja nissonolbmot leat beroštuvvan meahcástusas.

Pertti Vikeväkorva, toiminnanohjaaja, Inarin riistanhoitoyhdistys ry.
Anára fuođđogáhttensearvvi doaibmajođiheaddji Pertti Vikeväkorva muitala, ahte sii leat skuvlen juo lagabui 50 ođđa meahcásteaddji dán jagi. Govva: Anneli Lappalainen / Yle

– Orro leamen, ahte korona lea váikkuhan nuoraid beroštupmái. Go eai leat eará hommát, de sii leat boahtán gurssaide ja ožžot alcceset astoáiggedoaimma ruovttuguovllus, namuha Vikeväkorva.

Anára fuođđogáhttensearvvis ođđa meahcásteaddjijoavku oidno juo statistihkaige.

– Dalle ovdal fuođđogáhttensearvvi lahtuin ledje sullii 10 proseantta nissonolbmot, muhto dál nissonat leat juo 20 proseantta searvvi lahtuin, dadjá Vikeväkorva.

Giđđat Suoma fuođđoguovddáš ávžžuhii koronapandemiija geažil sirdit meahcásteaddjiskuvlejumiid maŋŋelii amas koronadávda njoammut oasálastiide.

Ávžžuhus lea váikkuhan ovdamearkka dihte Anáris dasa, ahte dán čavčča meahcásteaddjigurssat ordnejuvvojit eanet go dábálaš čavččaid.

Metsästäjän tutkintoon tähtäävä kurssi Inarin Toivoniemessä syksyllä 2020
Anára Doaivunjárgga meahcásteaddjigursii serve badjel 20 meahcásteaddjiálggu. Govva: Anneli Lappalainen / Yle

Pertti Vikeväkorva muitala, ahte sii leat ordnen borgemánu rájes juo golbma meahcásteaddjigurssa ja čuovvovašge lea álgimin čakča-golggotmánu doajáldagas.

– Vuosttas gurssa maŋŋá ledje nu ollu jearahallit, ahte mearrideimmet ordnet guokte ođđa gurssa. Vel dange maŋŋá ledje berošteaddji, de gávnnaheimmet vel ordnet ovtta gurssa Goahppilii.

Searvvai gursii lodde- ja ealgabivdu mielas

Okta Anára Doaivunjárgga gurssa nuoramus oasseváldiin lea anárlaš Saranne Näkkäläjärvi.

Son lea ohcalan meahcásteaddjigursii go háliida oahppat eanet meahcástusas.

Sáranne Näkkäläjärvi, Inari
Saranne Näkkäläjärvi muitala iežas oahppan ođđa áššiid gurssas. Govva: Anneli Lappalainen \ Yle

– Dan dihte bohten vai beasan bivdit ealgga ja lottiid, muitala Näkkäläjärvi.

Nuorra meahcásteaddjiálgu muitala, ahte son lea oahppan gurssas ođđa áššiid. Gurssas leat dutkan makkár lottiid ja goas daid sáhttá bivdit. Dasa lassin leat gieđahallan dan, makkár bissuiguin oažžu guđege sállaša báhčit ja goas sáhttá geavahit beatnaga bivddus veahkkin.

– Háliidivččen dakkár beatnaga, mii čuožžu daid lottiid. In leat velá eatnis ja áhčis dakkára jearran, inge dáidde oažžut dakkára, moddjesta Näkkäläjärvi.

Varrasamosat: Sápmi

Váldoođđasat

Varrasamosat

Muualla Yle.fi:ssä