Sápmi |

Meahccegádjunrusttegat buorránit oppa áigge ja fálaldat lassána – duohta heađis helikopter lea ain jođánamos

Ambulánsareahka lea ođđasamos veahkkeneavvu dasa, mo fidnet hávváduvvan soalddáha, bártidan meahccebargi dahje vaikko váiban vánddardeaddji olbmuid áimmuide ja dikšui. 

Teijo Siekkinen
Fitnodatdoalli Teijo Siekkinen muitala, ahte ambulánsareahka doaibmá geassit juvllaiguin ja dálvit sabehiiguin. Govva: Kirsti Länsman / Yle

Davvin gádjundoaimmas gártet geavahit máŋggalágan fievrruid, go leat guhkes gaskkat iige juohke sádjái beasa ambulánsabiillain.

Ambulánsareahka lea ođđasamos veahkkeneavvu dasa, mo fidnet hávváduvvan soalddáha, bártidan meahccebargi dahje vaikko váiban vánddardeaddji olbmuid áimmuide ja dikšui.

– Dat seammá systema doaibmá geassit já dálvit, ferte beare molsut rieggáid sadjai sabehiid ja de beassá vuohon johtui, fitnodatdoalli Teijo Siekkinen muitala.

Muhtumin lea maiddái dakkár dálki, ahte ii oba helikopteriin beasa viežžat olbmo. Danin ovdamearkka dihtii Lappi gádjunlágádusas Ohcejogas leat sihke mohtorgielkkát ja dál ođđa njealjejuvllagat (ATV-meahccevuojánat) gádjundárbbuid várás. Maiddái dábálaš gokčanláhkai reagat leat dálvegeavahussii.

kalustohallia sisältä, miehiä
Stašuvnnameašttir Jorma Haapala ja fitnodatdoalli Teijo Siekkinen gádjunlágádusa hálles Njuorggámis. Duohkin gádjunlágádusa dálá reahka dálvegeavahussii ja ovddas ođđa bievlavuoján. Govva: Kirsti Länsman / Yle

Ambulánsareagas galbmon olmmoš beassá dalán lieggasii

Ambulánsareahka váldá liggenrávnnji meahccevuojána luđenortnegis.

Fitnodatdoalli Teijo Siekkinen lea čájehan máŋgga hárjehusas dan mo su hutkan reahka doaibmá.

– Hárjehusas olmmoš lea mahkeš vižžojuvvon buolašin, ja son beassá juo dalán lieggasii, rattis 37 ja selggobealde ja julggiin 23 ceahki.

pelastusharjoitus, nukke lämpöpussissa
Fitnodatdoalli Teijo Siekkinen čájeha mo divššár sáhttá muddet liekkasa ambulansareagas. Govva: Kirsti Länsman / Yle

– Divššár beassá stivrenskáhpus meroštallat dárbbašlaš liekkasvuođa ja mátkálaš lea buori suojis, Teijo Siekkinen čilge.

Gádjunsuorggi ámmátolbmot leamaš mielde plánemin gádjunambulánsareaga. Dainna sihkkarastet dan, ahte reaga plánemis čuvvot buot njuolggadusaid.

Juohke njealját hohpolaš gádjundáhpáhusas geavahit eará fievrru go helikoptera

Dábálaččat gádjundárbu šaddá dalle, go olmmoš ravgá ja lábme iežas dahje dohppehallá dávdii. Dasa lassin muhtumin gártá gádjut sin geat váibet, muhto sin ii leat dábálaččat nu issoras hoahppu viežžat.

Lappi gádjunlágádusa Ohcejoga stašuvnnameaštir Jorma Haapala muitala, ahte gádjungohččumat leat lassánan go vánddardeapmi lassána. Dál leamaš vehá jaskadut áigi koronavirusa dihte.

mies pelastuslaitoksen kuljetuskalustovarastossa
Lappi gádjunlágádusa stašuvnnameaštir Jorma Haapala gádjunlágádusa Njuorggán doaibmasajis. Govva: Kirsti Länsman / Yle

– Dábálamosit gádjundárbbu dagaha meahcis ravgan ja lápmašuvvan dahje juo mannu dávdii dohppehallan. Dieđus leat dakkáratge geat váibet, muhto sin viežžamiin ii leat hoahppu, muitala Haapala meaccegádjuma sivain.

– Stuorámus oasis dáhpáhusain dohko beassá helikopter, jos pasieanta lea heahtedilis. Daidda mii álot viggat oažžut dan, muhto jos leat dakkárat main ii nu garra hoahppu, daid viežžat njealjejuvllagiin, Haapala dadjá.

Jorma Haapala muitala, ahte dákkár ođđa ambulansareahka livččii ávkkálaš sin barggus, muhto máŋgii áššit leat ruđas gitta. Suomas gádjundoaimma skáhppomiid mákset gielddat. Dilli sáhttá rievdat moatte jagi geahčen nu ahte stáhta máksá daid, Haapala čilge.

– Na dáthan lea buoremus, buorre go giinu berošta hutkat dákkár gádjunráđiid midjiide. Dieđus dákkáriid oastima várás galggašii gosnu gávdnat euroid, Haapala rámida ambulansareaga.

Varrasamosat: Sápmi

Váldoođđasat

Varrasamosat

Muualla Yle.fi:ssä