Sápmi |

Meahciráđđehus lea gaskkalduhttán vuovdečuollamiid Muttošjávrri bálgosa guohtuneatnamiin – Ráđđádallet ain

Muttošjávrri bálgosa mielas meahciráđđehus lea rihkkon bálgosiin dahkkon soahpamuša. Dál vuovdečuohppamat leat gaskkalduhtton bálgosa gáibádusa dihtii. Meahciráđđehus goittotge lea almmuhan, ahte dat álggaha vuovdečuollamiid beassážiid maŋŋil.

Video: Osmo Seurujärvi
Álgá áiggis 0.05 / Alkaa ajassa 0.05

Muttošjávrri bálgosa mielas meahciráđđehus lea rihkkon jagis 2010 dahkkojuvvon soahpamuša bálgosiin Davvi-Anáris.

Bálgosa mielas meahciráđđehus ii dieđit buriin áiggiin čuollamiid birra ja čuohppá menddo garra gieđain boazodolliid dehálaš boares vuvddiid.

– Jos juoidá lea soahpan, de dain soahpamušain ferte bissut. Meahciráđđehus lea dál min mielas dahkan soahpamuša vuostá. Iežahan gal dadjet, ahte eai sii leat bargan maidige dakkáriid, Muttošjávrri bálgosa boazoisit Osmo Seurujärvi dadjá.

Váikkuha bálgosa boazodillái

Seurujärvi mielas Meahciráđđehus čuollá oppalohkái menddo olu sin bálgosa guohtuneatnamiin.

– Dalle go dagaimet dan soahpamuša, nu sii dulkojedje dan nu, ahte go lea soahpamuš (dihto guovllus) de eará sajiin sáhttá bargat maid háliida. Dat ii leat min mielas riekta.

Čuollamat váikkuhit dalán bálgosa boazodillái.

– Dathan gal váikkuha. Suinniid galgá oastit eambbo ja nu ain. Mii ballat, ahte eat bastte šat bargat bohccuiguin dego dál. Gártat čohkket áidái bohccuid dego máddin. Áidái čohkket ja biepmat. Dan mii eat háliit. Mis lea vehá heahti dál.

Vuovdečuohppamat dál gaskkalduhtton

Dál goittotge vuovdečuohppamat leat gaskkalduhtton bálgosa gáibádusa dihtii. Meahciráđđehus goittotge lea almmuhan, ahte dat álggaha vuovdečuollamiid Jiekŋaváris beassážiid maŋŋil.

– Dál lea dakkár dilli ahte sii vurdet daid min rátkimiid ja várra guovtti vahku geažes livččii dasto ráđđádallamat, Muttošjávrri bálgosa boazoisit Osmo Seurujärvi muitala.

Divvojuvvon: Meahciráđđehus lea almmuhan, ahte dat álggaha čuollamiid Jiekŋaváris beassážiid maŋŋil. Ovdal muitaleimmet, ahte vuovdečuohppamat leat gaskalduhtton bálgosa gáibádusa dihtii nu guhká go bigálusat bistet.

Varrasamosat: Sápmi

Váldoođđasat

Varrasamosat

Muualla Yle.fi:ssä