Sápmi |

Meahciráđđehusláhka ja geainnut ovdan sáhkaolbmá Anára galledeamis

Anárlaččat muitaledje riikkabeivviid sáhkaolmmái Maria Lohelai, ahte sii leat fuolas meahciráđđehuslágas ja geainnuid heajos ortnegis. Lohela rámiidii dan, ahte Anára gielddas ledje sutnje dušše buorit ođđasat.

Maria Lohela Sajosis 8.4.2016
Govva: Ville-Riiko Fofonoff / Yle

Riikkabeivviid sáhkaolmmái Maria Lohela galledii davvin mannan vahku loahpas.

Lohela muitala, ahte sáhkaolbmás lea dat buorre dilli, ahte olbmuin leat eanaš somás áššit sutnje muitalit ja beaivvi politihkka ii nu vuhtto su galledemiin miehtá Suoma.

– Ferte goittotge máinnašit, ahte gieskat meahciráđđehusas dahkkon mearrádus lea dakkár, mii lea dás boahtán ovdan. Dat lea sihkkarit dakkár ášši, man olbmot suokkardit miehtá Suoma, eai dušše dáppe. Dat lea dieđusge čielggas, ahte go Suopma lea nu viiddes riika, nu máŋgasat leat fuolas geainnuid ortnegis.

Naba makkár áššiid Anára gieldda ovddasteaddjit válde sáhkaalbmáin ovdan?

– Deiven Anára gielddahoavdda ja politihkalaš njunnoža viidát. Dat lei hui somás deaivvadeapmi.

– Ja dál hálidan gal sierra dadjat, ahte deaivvadeamis Anára gielddain bázii erenoamaš buorre miella, daningo leiba virkkosmahtti vásáhus deaivat olbmuid, geain ledje eanaš buorre áššis muitalit iežaset gieldda birra. Dáppe leat fuolahan ekonomiijas bures. Gullen beare buriid áššiid dán gielddas. Dat lea gal buorre, ahte dáppe gehččet eallimis ovddosguvlui ja hálidit roahkkadit ja ođđa ideaid bokte ovddidit áššiid. Dáppe leat dievva ovdamearkkat, maid sáhttá čájehit duohko eará guovlluide Supmii.

Sámeservviid ovddasteaddjit deaivamin sáhkaolmmái Maria Lohela Sajosis 8.4.2016.
Govva: Yle Sápmi
Jearahallama maŋŋá Lohela deaivvai vel Sámedikki ja sámeservviid ovddasteaddjiid.

Lohela lei bovden deaivvadeapmái ovcci searvvi ovddasteaddjiid. Bovdehusa ledje ožžon Suoma Sámiid Guovddášsearvi, Anarâškielâ servi, Sámi Duodji, Suoma Sámi Nuorat, Suoma Boazosámit, Nuortalaččaid giličoahkkin (Siidsååbbar), Anarâšah-searvi, Vuovde-, guolásteaddji- ja duottarsámiid searvi ja Inarinmaan Lapinkylä -searvi.

Varrasamosat: Sápmi

Váldoođđasat

Varrasamosat

Muualla Yle.fi:ssä