Sápmi |

"Measta juohkehaš háliida fitnat Sáná-duoddara alde" – Boahttevuođas čohkka ala dolvot measta čieža geardde unnit mearri tráhpaid

Sáná-duoddarii leat dál huksegoahtán ođđa tráhpaid ja divodišgoahtán bálgáid.

Antti Ohenoja
Meahciráđđehusa Duottar-Lappi guovllu gieddehoavda Antti Ohenoja. Govva: Sara Wesslin / Yle

Meahciráđđehusa Duottar-Lappi guovllu gieddehoavda Antti Ohenoja muitala, ahte álggos ovdal tráhpaid huksema leat bargan vuođđobargguid. Sáná-duoddarii leat dál huksegoahtán ođđa tráhpaid ja láiregeainnu. Prošeavtta ulbmilin lea hukset ođđa tráhpaid ja divodit bálgáid, mat gávdnojit juo ovddežis. Ovdamearkka dihte Sáná-duoddara ja Gilbbesjávrri mátkeguovddáža gaskasaš bálgá divvot.

– Ovddit tráhpat ledje huksejuvvon muoras ja muorra ii materiálan bistte nu guhká, sáhka lea sullii moaddelogi jagis. 2000-logu álggus huksejuvvon tráhpaid šadde burgit geasset jagis 2017, muitala Antti Ohenoja.

Ođđa tráhpat huksejuvvojit geađggis ja láirris.

– Doppe tráhpaid ovddas jávkadit šattuid, mat dasto geavahuvvojit oidnosa buorideapmái. Tráhpaide bohtet 18 sentte guhkkosaš geađgestoalpput, mat leat dego tráhpat ja de dan tráhppaoassái geavahuvvojit iešguđetge láiremateriálat, čilge Ohenoja.

Huksejit olu uhcit tráhpaid go ovdal

Antti Ohenoja muitala, ahte ovddeš tráhpat ledje oktiibuot lagabui 800 stuhka. Ođđa máđiija sirdojuvvo 100-150 mehtera davvelii ovddit máđiijas. Dakko bokte ii leat nu ceakko mielli goargŋut Sáná-duoddarii.

– Dohko Sáná-duoddarii bohtet sullii 120 tráhpa, muitala Ohenoja.

Meahciráđđehus čuovvu automáhtamihttáriin, olugo olbmot fitnet bálgáin.

– Dá moadde beaivve áigi gehččen geassemánu statistihka, de orru ahte dál lea olahusjahki šaddamin, go leat nu olu olbmot jođus luonddus, čilge Ohenoja.

Sáná-duoddaris fitnet olbmot geassemánu ja čakčamánu gaskkas sullii 25 000 olbmo. Ohenoja mielde sullii 20 000 olbmo fitnet gitta Sáná-duoddara čohkka alde nappo 70 - 75% gallededdjiin.

– Sáná lea dakkár báiki dáppe Gilbbesjávrris, ahte measta juohkehaš háliida fitnat doppe. Sáná aldehan lea hui fiinnis oaidnit miehtá golmma riikii ja eandalii dohko Norgga alla váriide.

– Buoremus beivviin Sáná alde fitnet 400 olbmo, muhto dieđusge fiinna dálki geasuha eambbo olbmuid dohko, muitala Ohenoja.

Antti Ohenoja lei mielde Yle Sámi Johtti radio -sáddagis duorastaga 4.7.2019. Guldal su jearahallama dás. Jietna: Yle Areena

Divvojuvvon: Bajilčállagis logai ovdal, ahte Sáná ala dolvot boahttevuođas measta gávcci geardde unnit tráhpat, vaikko dohko dolvot boahttevuođas measta čieža geardde unnit tráhpat 10.7.2019 diibmu 14.00.

Varrasamosat: Sápmi

Váldoođđasat

Varrasamosat

Muualla Yle.fi:ssä