Sápmi

Merja Aletta Ranttila dáidda šaddá jiekŋan – Anára gillái ceaggana vuosttas háve jiekŋapárka

Merja Aletta Ranttilan taide muotoutuu jääveistoksiksi.
Sápmelaččaid máinnasárbi lea šaddan jiekŋan Anára márkana vuosttas jiekŋapárkkas. Govva: Sara Wesslin / Yle

Ođđa "Inari Icepark" Anára márkanis lea rabas boahtte cuoŋománu rádjai.

Anára boares vuolleskuvlla šilljui guovdu márkana leat ceagganan ivdnás jiekŋabáccit. Dat leat oassi ođđa jiekŋapárkkas, mii rahpasa skuvlla šiljus juovlamánu beallemuttus.

Inarin Erätuli -fitnodat lea dál vuosttas háve huksemin Anárii Inari Icepark -nammasaš jiekŋapárkka. Párkka váldofálaldat lea jiekŋadáiddačájáhus, man váldotemán leat luondu ja sápmelašvuohta. Jiekŋabácciide leat viežžan inspirašuvnna sápmelaš govvadáiddár Merja Aletta Ranttila dáidagis.

Dáiddár lea ilus, go su govat šaddet earálágan hápmái

Čájáhusa jiekŋabácciid lea dahkan Suoma jiekŋadáiddačeahppi Anssi Kuosa ovttas njeljiin jakutialaš jietnadáiddáriin. Mielde lea earret eará jiekŋadáiddár Egor Sleptcov, guhte lea dovddus mumen- ja mammuhttajiekŋabácciinis.

Kuvataiteilija Merja Aletta Ranttila ja jäänveistomestari Anssi Kuosa.
Govvadáiddár Merja Aletta Ranttila illuda bácciin, maid jiekŋadáiddar Anssi Kuosa lea su dáidágis hábmen. Govva: Sara Wesslin / Yle

Merja Aletta Ranttila govvadáidágis oidno sápmelaččaid máinnasárbi. Gufihttarat, stállu ja čáhcerávga leat ožžon jieŋas dál ođđalágan hámi.

– Mun lean ieš ožžon govaid hámiid áigái boares muitalusain, ja dát lea sin oaidnu mu sárgun govain. Hui somá oaidnit gal. In aibbas ná jurddašan, go gádden ahte báccit leat unnibut, muitala Ranttila geahčadettiinis jiekŋadáidaga.

Jiekŋadáiddár Anssi Kuosa dadjá, ahte Ranttila govaid dahkan jiekŋadáiddan leamaš sutnje áibbas ođđalágan vásáhus.

– Dát leamaš hui miellegiddevaš ja earálágan bargu, go maid ovdal leat bargan eará báikkiide. Mii leat ovdal bargan eanet árbevirolaš hámiiguin, muhto dát lea juoidá áibbas eará, mii lea hui buorre, illuda Kuosa.

Merja Aletta Ranttilan taide muotoutuu jääveistoksiksi.
Anára jiekŋabácciid lea dahkamin maiddái jakutialaš jiekŋadáiddárjoavku.

Dákkár jiekŋapárka ii leat Anára márkanis ovdal oidnon. Merja Aletta Ranttila muitala, mo juo párkka plánedettiin son jurddašii, ahte leagoson dat áibbas jallas jurdda ollašuhttit. Loahppaboađus goittot illudáhtta.

– Eahpidin gal álggus, muhto dathan lea mannan bures. Buorre, go leat meaštárat, geat leat bargan, smiehtada Ranttila.

Merja Aletta Ranttilan taide muotoutuu jääveistoksiksi.
Jiekŋapárkka temán lea luondu ja sápmelašvuohta. Govva: Sara Wesslin / Yle

Jiekŋadáiddačájáhusa lassin jiekŋapárkii bohtet vel earret eará mánáide čierastallanmielli, báikkálaš buktagiid vuovdinbáiki, bohccot ja márffibassingoahti.

Inari Icepark -párka lea nuvttá rabas vuosttas beivviid 14.–15.12. áigge diibmu 16–21. Das ovddosguvlui párkii beassá oastimiin sisabeassanbileahta. Párka lea Anáris rabas cuoŋománu 2020 rádjai.

Varrasamosat

Muualla Yle.fi:ssä