Sápmi |

Miehtá máilmmi mánát ja nuorat leat ordnen dálkkádatstreaikkaid – geahča video Anára streaikkas

Nuorat leat bearjadaga ordnen dálkkádatstreaikkaid máŋggalogi sajis Suomas. Maiddái Anára girkosiiddas nuorat streikejedje.

Kiira Savikko, dálkkádatstreaika, Anár, Inari
Anárlaš Kiira Savikko ordnii miellačájáhusa, go son háliidii čalmmustahttit dálkkádatdaguid. Govva: Maiju Saijets / Yle

Mánát ja nuorat miehtá máilmmi leat bearjadaga ordnen miellačájáhusaid, maiguin sii leat čalmmustahttán dálkkádatdaguid. Nuoraid ulbmil leamaš giddet ollesolbmuid fuomášumi dálkkádatáššiide.

Video: Ilmastolakko, Anár, Inari
Anára nuorat ordnejedje dálkkádatstreaikka bearjadaga. Geahča dás video. Video: Yle

Anár girkosiidda guovddážisge logenar nuora gudde galbbaid, main ledje dearvvuodat mearrideddjiide.

Anárlaš 8-luohká oahppi Kiira Savikko lei ordnen ovttas ustibiinnis miellačájáhusa Anára girkosiiddas, mainna son háliidii čalmmustahttit dálkkádatáššiid.

Dálkkádatstreaika, Anár, Inari.
Anárisge dálkkádatstreaika čohkkii nuoraid galbbaiguin čalmmustahttit dálkkádatdaguid. Govva: Maiju Saijets / Yle

Savikko mielas ášši čalmmustahttin olles olbmuide lea hui dehálaš.

– Dat lea min boahtteáigi. Smihttet dárkilit mearrádusaid, go dat váikkuhit boahtteáigái nu ollu. Dálkkádatdaguid galggašii bastit čuovvut, daid galggašii dahkat eanet ja ulbmiliid čuovvut jođánit, go dathan leat rehkenastán, ahte nuppástusat dáhpáhuvvet nu johtilit, čilge Savikko.

Savikko muitala, ahte son lea hui movtta go miellačájáhussii serve loginar nuora Anára girkosiiddas.

Maiddái Diana Kangasniemi lei mielde vázzimin Anára márkana čađa galbbaiguin. Kangasniemi ja Savikko doallaba gieđas galbba, mas lohká “Climate change, attitude chance, would help for sure”.

– Mu mielas dát lea hui dehálaš ášši. Mis ii leat eará eanaspábba go fal dát okta. Mii fertet doallat fuola das, dadjá Kangasniemi.

Dálkkádatstreaikka birra sáhtát guldalit lasi bearjadaga Dearvva! Tiörv! Tierva! -sáddagis Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä