Sápmi

"Miella fas virkkosmuvvá" – dálvvi skábma nohká lávvardaga, go beaivi badjána maiddái Njuorggámis

Marja ja Elmo Olkkola nautiskelemassa kaamoksen viimeisestä päivästä Nuorgamin Pulmankijärvellä.
Guhkes skábman geargá juo váillahit beaivváža, mieđiheaba Marja ja Elmo Olkkola. Govva: Kirsti Länsman / Yle

Guovtti mánotbaji bottu maŋŋá beaivi oidnostii Ohcejoga girkosiiddas bearjadaga. Njuorggámis beaivváš badjána vuosttas háve lávvardaga.

Dán dálvvi skábma lea vehážiid meattá. Beaivváš oidnogoahtá miehtá Suoma beal Sámi dáid beivviid.

Ohcejogas skábma nogai otne bearjadaga. Beaivi loktanii almmiravdda bajábeallái Ohcejoga girkosiiddas bearjadaga diibmu 11.56. Ohcejogas skábma álggii guokte mánu dassái, skábmamánu 25. beaivvi.

Ohcejohkalaččat besse návddašit vuosttas beaivesuotnjariin bearjadaga fierttu dihte.

Skábman ráfo ja návddaša, giđđat virkkosmuvvá

Buolbmatjávrri duoddariin lea binná guoldu bearjadaga beaivet. Njuorggánlaččat Marja ja Elmo Olkkola leaba vuolgán návddašit skápma maŋimuš beaivvis.

– Vulgen dán eamida buktit deike Buolbmatjávrái duoddarii čuoigat, muitala Elmo Olkkola.

Kaamoksen viimeinen päivän Pulmangissa.
Skápma loahpas beaivvaš dušše veháš suonjarda almmiravddas. Govva: Kirsti Länsman / Yle

Marja Olkkolas lea friddjabeaivi ja dán son háliida leat luonddus.

– Vulgen dal geahččat, makkár lea skápma maŋimuš beaivi. Aivve fiinnishan dat lea, lohká Marja Olkkola.

– Vehá dat lea guoldu, muhto muđui hui fiinna dálki, joatká Elmo Olkkola.

Bárra lea ássan Njuorggámis logi jagi. Skábma lea sudnuide ráfoma ja návddašeami áigodat.

– Munnje dat lea áigi ráfot. Skábma addá dakkár siskkáldas ráfi. Dalle go sevnnjoda, de miella maiddái ráfo, smiehtada Elmo Olkkola.

– Boalddán olu gintaliid ja bijan čuovggaid. Skábman leat dat iežas fiinna bottut, dadjá Marja Olkkola.

Marja Olkkola.
Marja Olkkola juo vuordá, ahte beassá duoddaris johtit beaivečuovgga áigge. Govva: Kirsti Länsman / Yle

Maiddái Suoma davimus gilis Njuorggámis, 43 kilomehtera geahčen Ohcejot gilis, skábma nohká ihttin lávvardaga. Dalle sáhttá lohkat, ahte dálvvi skábma lea virggálaččat meattá.

Olkkola-guovttos gal illudeaba čuovgga lassáneamis.

Elmo Olkkola lea ilus, go bargosaji huksenbargguin ii šat dárbbaš olles áigge geavahit lassičuovggaid ja Marjages illuda, go bargobeivviid maŋŋelge geargá ain návddašit beaivečuovggas.

– Galhan dat illudahttá, go beaivváš fas oidno. Gal mun váillahan beaivváža skábman. Dál go fas oidnogoahtá, miella virkkosmuvvá. Beasan duoddaris čuoigga johtit oaggumin. Sáhtán fas guhkit áigge ávkkástallat dainna čuvges áiggiin, smiehtada Marja Olkkola.

Varrasamosat

Muualla Yle.fi:ssä