Sápmi |

"Miige beassat luosa borrat" – Badje-Deanus gávdno doarjja Deanu ođđa guolástannjuolggadusaide

Eai buot sápmelaččat leat ođđa Deanu guolástansoahpamuša vuostá, nu oaivvilda gáregasnjárgalaš Osmo Niittyvuopio.

Osmo Niittyvuopio
Gáregasnjárgalaš Osmo Niittyvuopio lea duđavaš ođđa guolástannjuolggadusaide. Govva: Anneli Lappalainen / Yle

Sihke fitnodatdoallit ja báikkálaš guolásteaddjit Deanuleagis leat oalle láhkai ovttain jienain vuostálastimin Deanu ođđa guolástannjuolggadusaid.

Badje-Deanus, soahpamuššii gávdno goit maiddái doarjja. Gáregasnjárgalaš Osmo Niittyvuopio oaivvilda, ahte bivddu ráddjen lea buorre, go luossa beassá goargŋut maiddái Badje-Detnui.

– Mu mielas orru, ahte dál dat lea guhkes áigái boahtán dakkár soahpamuš, ahte miige beassat luosa borrat, Niittyvuopio lohká.

Niittyvuopio mielas almmolašvuođas ii galggašii čuoččuhit, ahte buot báikki olbmot vuostálastet Deanu ođđa guolástannjuolggadusaid, go dat ii doala deaivása.

– Sámi politihkkárat hállet oba áigge dan, ahte buot sápmelaččat leat dán soahpamuša vuostá. Eai eisege, eathan mii leat dáppe Badje-Deanus.

– Dál eai leat nu olu bivdosat doppe Deanus ja vuolil besset ráfis boahtit deike bajás.

Beassá bivdit ain doarvái olu

Muhtin sápmelaččat leat cuiggodan soahpamuša maiddái das, ahte dat sirdá guollesallášis stuorát oasi turistabivdui ja sápmelaččaid árbevirolaš bivdu ráddjejuvvo menddo garrasit. Osmo Niittyvuopio lea goit duđavaš dan bivdomearrái, mii dán soahpamušas lea várrejuvvon árbevirolaš bivdui.

– Mun in dieđe dárbbašitgo buohkat gal bivdit muhto mii báikkálaččat miihan gal beassat bivdit, Niittyvuopio dadjá.

– Mu mielas dat gal lea buorre soahpamuš.

Varrasamosat: Sápmi

Váldoođđasat

Varrasamosat

Muualla Yle.fi:ssä