Sápmi |

Ministeriija: Deanu soahpamuš riikkabeivviide

Eana- ja meahccedoalloministeriija otne almmuhan, ahte Deanu soahpamuš addo riikkabeivviide. Suopma ja Norja vuolláičáliiga soahpamuša čakčamánu loahpas.

Tenojoki
Govva: Vesa Toppari / Yle

Deanu guolástussoahpamuša guoskevaš ráđđehusa evttohus lea addon riikkabeivviide, muitalit eana- ja meahccedoalloministeriijas. Suopma ja Norga vuolláičáliiga soahpamuša 30.9. ja dat dárbbaša vel riikkabeivviid dohkkeheami ovdal go dat boahtá fápmui.

Ráđđehusa evttohus sisttisdoallá maid fápmuibidjanlága, mas meroštallet fápmuibidjamii laktaseaddji áššiid ja dárkkolmahtto earet eará guolástuslobiid vuovdima, hattiid ja fatnasiid registerema.

Riikkabeivvit gieđahallá láhkaálgagiid duorastaga ja bearjadaga.

Ministerija: Buoret vejolašvuođat luossanáli dikšumii ja bistevaš guolásteapmái

Eana- ja meahccedoalloministeriija mielde Deanu ođđa guolástussoahpamuša vuolggasadjin lea guolástusa heiveheapmi luossanállái nu ahte sihkkarasto luossanáli dilli boahttevuođas.

Ođđa soahpamušain sáhttet beaktilabbot ja buorebut muddet guolástusa.

Ministeriija dieđáhusas daddjo, ahte guolástusáiggiid gártet ráddjet, muhto buođđo-, fierbme- ja golgadanguolástus lea boahttevuođasge vejolaš oppalaš guolástusáigodaga siste. Maiddái turisttaide vuvdon lobiid mearri geahppána.

Suopmelaš guolásteaddjiid lea vejolaš boahttevuođas oastit lobiid sihke Suomas ja Norggas. Lohpevuovdinortnegiid leat ovddideamen elektrovnnalaš hápmái ja dat galggašii álkkidahttit lobiid oastima.

Suoma ja Norgga ráđđádallangottit leat jahki dassái Roavvenjárggas soahpan guolástusnjuolggadusaid vuođđolinjáid.

Fápmuibidjanlágain dárkkálmahttet soahpamuša doaibmabijuid

Soahpamuša fárus riikkabeivviid gieđahallamii manná maid fápmuibidjanláhka, mii lei cealkinláhkai golggotmánus. Das meroštallet soahpamuša doaibmabijuid.

Guolástuslobiid vuovdima dikšu álggos Lappi EJB-guovddáš, muhto ministeriija mielde dárkkuhus lea sirdit dan Ohcejoga guolledoalloguovllu vuollái, mii álggaha doaimmas jagi 2019 álggus.

Soahpamušas geahččalit ministeriija mielde heivehit oktii luossanáli suodjaleami, iešguđetlágan guolástusvugiid ja iešguđet guolástusjoavkkuid vuoigatvuođaid. Dáid lassin fuolahit maid sápmelaš guolástuskultuvrras, guolástusvuoigatvuođaid oamasteaddjiid sajádagas ja guolástusturismmas.

Soahpamuša vuostálastet viidát davvin

Deanu guolástussoahpamuša leat vuostálastán viidát davvin. Sámediggi ovdamearkan lea guoddalan riektekanslerii soahpamušhápmosa válmmaštallamii.

Maiddái báikkálaš guolástusgottit goappatge beale joga vuostálastet soahpamuša fápmuibidjama. Guolástusgottiid mielde soahpamuš áitá sápmelaš kultuvrra.

Lappi riikkabeaiáirasat leat gáibidan soahpamušráđđádallamiid álggaheami ođđasit.

Sápmelaš priváhta olbmot ja searvvit leat borgemánus čállán oktasaš cealkámuša, mas sii gáibidit soahpamuša hilguma.

Varrasamosat: Sápmi

Váldoođđasat

Varrasamosat

Muualla Yle.fi:ssä