Sápmi |

Ministtar Leppä: Mis lea dárbu guorahallat olles buhtadusortnega ođđasit –Spirebuhtadusat ságastahtte boazoparlameanttas

Eanan- ja meahccedoalloministtar Jari Leppä lohká, ahte earret eará boazodoallu lea nanosmuvvame.

Eanan- ja meahccedoalloministtar Jari Leppä boazoparlameanttas 2018.
Eanan- ja meahccedoalloministtar Jari Leppä boazoparlameanttas 2018. Govva: Vesa Toppari / Yle

Boazodoallit leat dán vahkus čoahkkanan Roavvenjárgii jahkásaš boazoparlamentii. Dán jagi boazoparlameanttas lei 70 jagi ávvojahki.

Maiddái Eanan- ja meahccedoalloministtar Jari Leppä lei báikki alde. Leppä lohká Yle Sápmái, ahte boazodoallu lea nanosmuvvame, olles Lappi ja Suopma leat ovdáneame ja dat lea buorre ášši. Dáppe leat maid stuorra investeremat dahkkon.

– Turisma ja boazodoalu boahttevuohta orru leame čuovgat. Ođđa buktagat leat ihtán ja daidda lea jearalmas. Maiddái doaibmamállet leat ođasmahtton, de gal boahttevuođa orru leame hui čuovgat ja dan mii háliidit ráđđehusas nanosmahttit buot láhkái, Leppä lohká.

Spirebuhtadusat sagastahttet

Spirebuhtadusat bokte ságastallama boazoparlameanttas go dánge jagi stáhta ii bastán máksit spirebuhtadusaid dievaslaččat. Jagis 2017 spirebuhtadusaid eai leat bastán máksit dievaslaččat. Dálonguovlodoaimmahat muitalii miessemánu álggus, ahte buhtadusain mákset 74 proseantta mieđihuvvon buhtadusmearis.

Eanan- ja meahccedoalloministtar Jari Leppä mieđiha, ahte sii galget boahtte áiggis guorahallat olles buhtadusortnega ođđasit.

– Lea dieđusge nu, ahte mis eai leat mearreruđat reahkán máksimálálaš buhtadusaide ja de leat ferten geahpedit buhtadusa dihto rehkenastin vuogi mielde ja danin mis lea dárbu guorahallat min buhtadusortnega ođđasit. Maiddai dat, ahte mii lea min spirepolitihkka, man olu spiret leat ja man olu daid oačču goddit ja nu ovddos guvlui, muitala Leppä.

Leppä lohká ahte dán ášši árvvoštallet. Dál sii leat guorahallame ja čakčat ja juo álgogease bohtet vuosttaš mearrádusat ovdamearka dihte das man olu guovžžaid oačču goddit.

-Gal dát lea dieđus ahte čuolmmat daid oasil leat ja daidda háliidit čovdosiid, Leppä lohká.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä