Sápmi |

Ministtar Ohisalo sávvá johtolaga rahpasit rádjeservošii miessemánus Norgga ja Suoma ráji alde

Sisáššiidministtar Maria Ohisalos ii leat addit dárkilis beaivemeari dasa, goas Suomas beassá fas Norgii.

Maria Ohisalo.
Sisáššiidministtar Maria Ohisalo muitala iežas áddet, manin Norgga ja Suoma ráji rahpan livčče dehálaš sápmelaččaide. Govva: Henrietta Hassinen / Yle

Suoma sisáššiidministtar Maria Ohisalo oaivvilda, ahte rádjeservošat galggašedje beassat vuosttamužžan rasttildit rájá, go johtinráddjehusat ložžejuvvojit.

Ohisalo ii háliit muitalit dárkilis beaivemeriid, goas Norgii lea fas vejolaš johtit.

– Sáhtášin jurddašit, ahte miessemánus dan rádjesearvvušjohtolaga sáhtášii earenoamážit Norgga ráji oasil juo rahpat, Ohisalo árvala.

Sápmelaččaid fuolla ráji rasttildeami dehálašvuođas lea ráđđehusas bures dieđus, oaivvilda Ohisalo. Sámedikkiin leamaš olu oktavuohta ja ministtar lea ožžon njuolga máhcahaga mearrádusaid váikkuhusain sápmelaččaide.

Ministtar Ohisalo muitala, ahte sii leat smiehttan vuođđudit eambo bistevaš koordinerenorgána, mas livčče fárus Norgga, Ruoŧa ja Suoma rádjegohcinlágádusat ja Sámedikkit. Dat orgána sáhtášii oktiiheivehit geavatlaš doaimmaid iešguđege riikkas ja dieđihit sápmelaččaide rádjejohtolaga birra iežaset gillii.

Norga ložžen mátkkoštanráddjehusaid

Norga lea juo ložžen mátkkoštanráddjehusaid Supmii. Norga lea vuossárgga váldán eret errengáibádusa, ja dát njuolggadusat leat fámus miessemánu 15. beaivve rádjái.

Suopma ii goittotge leat rahpan ráji vel. Dála mearrádusa mielde sisrádjegohcin bistá 30.4. rádjai. Dan joatkimis mearridit álo 30 jándora ovddosguvlui, jus dat orru vealtameahttun dávddadili geažil.

Sisáššiidministtar Maria Ohisalo muitala, ahte sii dihtet dan, ahte rájiid gidden lea váikkuhan máŋggaid olbmuid árgaeallimii, earenoamážit sámiid árgii ja johtimii.

– Ulbmil livčče, ahte nu jođánit go vejolaš beasašeimmet burgit maid daid ráddjehusaid. Mu oainnu mielde áivve vuosttaš prioritehta lea, ahte go eatnamii boahtima ráddjehusaid burgigoahtit, de dat rádjesearvvušjohtolat lea vuosttaš, mii rahpasa.

Guldal maid sisáššiidministtar Maria Ohisalo lohká Suoma ja Norgga rádjesearvvušjohtolaga rahpaseamis. Jietna: Sáárá Seipiharju / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä