Sápmi |

Mo dadjat "gákti" seavagillii? – ođđa applikašuvnnain sáhttá dál oahpahallat sámi seavvagiid

Mearka-applikašuvdnii leat čohkken 103 sámegiel seavvaga.

Mearka-applikašuvnna leat buvttadan Norgga Sámediggi ja Statped, mii lea spesiálapedagogihkkabálvalus Norggas.

Ođđa Mearka-telefonapplikašuvnna bokte beassá dál oahpahallat sámi mearkkaid seava- dahjege mearkagielas.

Applikašuvnnas sáhttá ohcat sáni davvisáme- dahje dárogillii. Dan maŋŋá unna filmmažis čájehuvvo, mo sátni čájehuvvo seavagillii.

Filmmažiin čájehuvvojit buohkanassii 1000 seavvaga dárogielas sihke seavagillii ja njálbmedadjamiiguin, ja 103 dain leat sámi seavvagat dahje sámi njálbmedadjamat. Sámi seavvagat leat merkejuvvon applikašuvnnas sámi leavggain.

Vaikko sámi seavagiellabiras lea unni, leat seavagielagiid geavahusas muhtin seavvagat. Applikašuvdnii leat dokumenterejuvvon seavvagat, mat geavahuvvojit davvisámi giellabirrasis. Applikašuvnnas gávdnojit dábalaš árgabeaisánit, muhto maiddái erenoamáš sámi sánit degomat gákti, biđus, juoigat dahje goikebiergu.

Norgga Sámediggi lea dorjon prošeavtta ruđalaččat ja dan lea ollašuhttán Statped, mii lea spesiálapedagogihkkabálvalus Norggas. Applikašuvdna gávdno sihke App Store ja Play gávpi -bálvalusain.

Varrasamosat: Sápmi

Váldoođđasat

Varrasamosat

Muualla Yle.fi:ssä