Suoma birasministeriija bivdá álbmogis oaiviliid dasa, mo dálkkádatlága galggašii nuppástuhttit. Iežas oaiviliid sáhttá buktit ovdan gažadeamis, mii gávdno birasministeriija neahttasiiddus, maiddái davvisáme-, anáraš- ja nuortalašgillii.

Gažadeami bohtosiid áigot geavahit dálkkádatlága nuppástuhttinbarggus, mas leat mearridan ráđđehusprográmmas.

Mihttomearrin lea, ahte jagi 2035 rádjai Suopma lea čitnaneutrála. Dat dárkkuha dan, ahte maŋimustá dalle Suomas buvttadit dušše dan meare čitnadioksiidabázahusaid, go daid sáhttá čatnat. Lága áigot nuppástuhttit nu, ahte Suopma maid olaha dán mihttomeari.

Dálkkádatlága galgá ovddidit, muhto mo?

Ráđđehusprográmma mielde dálkkádatlága galgá ovddidit dálážis.

Dálá dálkkádatláhka geatnegahttá dušše eiseválddiid ja mearrida dálkkádatpolitihka plánain. Dat ii guoskka ovdamearkka dihtii eanangeavahansuorggi.

Birasministeriija jearrá gažadeamistis earret eará, maid olbmot oaivvildit dálá dálkkádatlágas, leago doarvái, ahte láhka geatnegahttá dušše eiseválddiid ja mearrida dálkkádatpolitihka plánain, ja galggašedjego lágas leat iežas bázahusaid geahpedanulbmilat sierra surggiide, dego johtolahkii dahje eanandollui.

Dálkkádatlága vuođđoáššiin áigot mearridit giđđadálvve 2020. Ráđđehusa evttohus nuppástuhtton láhkan galggašii gárvánit álgojagis 2021.