Sápmi |

"Moai letne dolin jo vuoruid mielde vuoitán ja dáhpen, dan ferte gillát" – Geahča video Roavenjárgga gilvvus

Vaikko Utsi vuoittáhalai verddii, de lohpida, ahte dát ii báhcán su maŋimuš stártan.

Video: Frode Utsi ja Esko Tuisku.
Geahča mo Roavenjárgga gielkágilvvut manne ja gii vuittii 1980-logu stártta!

Iđitbotta leaba dološ beakkálmasat sállon ja leaikkastallan ovttas. Deatnulaš Frode Utsi ja Roavenjárgalaš Esko Tuisku leaba gearggusin váldit vel ovtta gilvostártta ovttas, namalassii Roavvenjárgga gielkágilvvuin.

Guktuin lea nana jáhkku nubbi nubbái. Eaba oba bala, vaikko olu nuorat gilvaleaddjit vuodjiba sudno vuostá.

– Buorre dovdu. Vuorddán jo ahte beasan vuodjit. Jáhkkán, ahte mun ja Frode gal vuite daid nuorabuid, ean moai nu čuorbbi gal leat, lohpida Tuisku, justa ovdal stártta.

Bána orru Utsi mielas dego sudnuide dahkkon.

– Lei somás bána, heive justa bures munnje ja Eskoi. Dat eai leat lihkus dat stuorra ja varalaš njuikehagat, reašká Utsi.

Deatnulaččat dorjo Frode Utsi.
Deatnulaččat dorjo Frode Utsi. Govva: Kaija Länsman / Yle

Soai leigga golbmalogi jagi dassái nu stuorra násttit, ahte Roavenjárgii ledje Utsi maŋis vuolgán olu deatnulaččat. "Supportšeaffa", dego Leif Haralda joavku su gohčoda, muitala, ahte sii leat vuolgán doarjut Utsi.

– Dat lea fiinna dovdu. Mun jáhkkán, ahte Frode vuoitá. Son lea boares ja čeahpes vuoddji. Son lea heilla áigge leamašan mu favorihta.

Olles gilvobáiki goit gulai gean deatnulaččat guottihit, go alla jienain čurvo " Heja Frode Utsi!"

Goabbáge ii vuoitán vuosttas stártta

Vuosttas stártta maŋŋá goabbáge násti ii lean dat jođáneamos. Esko Tuisku vujii nubbin ja Frode Utsi lei viđádin. Utsi čurbošii ovtta áššis ja oaččui fuones stártta.

1980-logu gielkkáid stárta. Govas nummiriin 100 vuodjá deatnulaš Frode Utsi.
1980-logu gielkkáid stárta. Govas nummiriin 100 vuodjá deatnulaš Frode Utsi. Govva: Kaija Länsman / Yle

– Mannen boasttu sadjái stártalinnjás. Čurbošin go mannen gálja ala, inge muohttaga ala, muitala Utsi.

Tuisku ii lean duđavaš nuppi sadjái.

– Vuolggán nuppi stártii duođas vuodjit ja vikkan vuoitit, dadjá Tuisku.

Nuppi stárttas Esko Tuisku čájehii earáide dušše maŋŋečuovgga, go vujii nu, ahte vuittii.

Gilvvu maŋŋá Tuiskus lei dušše okta gažaldat oaivvis go nuolai oaivesuoji eret.

– Gallátbat Frode lei? (Utsi vujii nuppi stárttas njealjádin)

– Buorre dovdu go ná boares almmái beasai dákkár olmmošmeari ovddas vel vuoitit, illudii Tuisku . Nubbin 80-logu stárttas vujii Jouni Kariniemi. Goalmmádin Olli Sipilä.

Video: 1980-logu gielkkáid stárta. Govas nummiriin 100 vuodjá deatnulaš Frode Utsi.
Video: Yle Sápmi

Loahppabohtosiin Frode Utsi lei njealját. Son ii lean vuollánan vaikko vuoittáhalaige Tuiskui.

– Moai letne dolin jo vuoruid mielde vuoitán ja dáhpen, dan ferte gillát.

Utsi vuolgá buriin mielain ruoktot. Boahtte dálvi gollá fas biilastálles, go dat gilvomiella vuot časkkii nu garrasit.

– Jus mus dilli boahtte jagi, sihkkarit boađán fas. Ferten divvut vai geavvá dát vuoján buorebut, muitala Utsi plánaidis birra.

Loahpat gilvobohtosat ihtet kelekkakisat-siidduide maŋŋelaš.

Varrasamosat: Sápmi

Váldoođđasat

Varrasamosat

Muualla Yle.fi:ssä