Sää´mjânnam

Mottjeei maaiʹlmest nuõrttsäʹmmlai vuämm kueʹllšeellemäärb feʹrttai kaggâd paajâs – Sääʹmkultturfoʹndda pâjjel 86 000 euʹrred teäggtõs kueʹllšeellemšteađruõkkmõʹšše

Sevettijärvellä nuotataan kesäkuussa 2018
Nueʹttemääʹrb lie koiʹttjam mättʼtõõttâd oummid Čeʹvetjääuʹrest. Tät nueʹttemkurss riâššeš teimma Čeʹvetjääuʹrest. Govva: Markus Moshnikoff

Sääʹmkultturfondd haalâd ruõkkâd nuõrttsäʹmmlai vuäʹmm kueʹllšeellemääʹrb.

Ko veâl tuuʹl säʹmmla šeʹlle kueʹl piârrjes porrmõʹššân, tän ääiʹj ođđnallšem kueʹllšeeʹllem vueʹjj lie vääldam vueʹss še äʹrbbvuõđin.

Ââʹn Sääʹmkulttuurfondd äigg ruõkkâd da seʹlvvted nuõrttsäʹmmlai vuämm kueʹllšeeʹllemvueʹjjid da -ääʹrbid. Tõʹnt Lappi EJB-kõõskõs uuʹdi Sääʹmkultturfoond teäggtõõzz haʹŋǩǩõʹsse, mõin tän äʹrbbvuõđ teâđ ruõkkâd še puõʹtti puõlvvõõǥǥid.

– Ko leäʹp tiiʹǩ Čeʹvetjäurra da Njeäʹllma puättam, nuʹtt mäʹhtt tõk kueʹllšeeʹllemäʹrbbvuõđ lie juätkkjam ouddmiârkkân kueʹllšeeʹllempaaiʹǩin da måkkam šeeʹllemkulttuur tääiʹben lie leämma da mäʹhtt täk lie mottjam tän ääiʹj mieʹldd. Da tõn, što måkkam nääll meeʹst õõlǥči seeilted tõn vuäʹmm kulttuurâst, mušttal saaʹmi ouddooumaž Veikko Feodoroff haʹŋǩǩõõzz pirr.

Veikko feodoroff
Govva: Vesa Toppari / Yle Sápmi

Kueʹllšiilli ämmtest haaʹleed eʹpet kannteei jieʹllemvueʹǩǩ

Feodoroff mušttal, mäʹhtt nuõrttsäʹmmla jieʹlle maaiʹlmest, koʹst šeeʹlleš eeʹjjpooʹddi mieʹldd da teʹl säʹmmla jälste jeeʹres paaiʹǩin kueʹllšeellmõõžž mieʹldd. Juõʹǩǩ piârrjin leʹjje jiijjes kueʹlljääuʹr da -jooǥǥ, koid kuâŋŋsin säʹmmlain leʹjje še šeeʹllempõõrt.

Tän äʹrbbvuõđ feʹrttai ââʹn ǩeeʹrjted pââjas. Ođđnallšem jieʹllem lie poʹhttam ođđ aaʹššid da kueʹllšeellmõš iʹlla teänab arggpeivvsaž äʹšš.

– Õhtt lij teâđast tõt nueʹttkulttuur, mii meeʹst lij leämma da lij õinn jaukkmen. Ânnʼjõž ääiʹj jieʹllemnääʹll lie jõnnsab da ââʹn lie jiõŋŋškaapp da puõlâščuuʹǩǩ, što jiõk pâi šeell teʹl ko haaʹlääk poorrâd, peʹce vuäitak pâi väʹldded kõlmmsest tõn kueʹl. Jieʹllemnääʹll lij mottjam jiânnai da smiõttâd tõn, mäʹhtt tän kueʹl vuäǯǯak pueʹrmõsân põʹrtte, nuʹtt tõʹnt feʹrttai tõn kulttuur da äärv kaggâd pââjas, särnn Feodoroff.

Saaʹmi ouddooumaž Veikko Feodoroff leäi Dearvva! Tiõrv! Tiervâ! -vuõlttõõzzâst mainsteʹmmen puõʹtti haʹŋǩǩõõzzâst. Jietna: Yle Areena

Še vuämm äʹrbbvuõđi seʹlvvtummuž suõjjal še čääʹʒʒõõzzid, smeatt Feodoroff.

– Meeʹst lie jääuʹrin da jooǥǥin leämmaž täk sooǥǥi jeeʹres kueʹllšeeʹllempääiʹǩ. Nuʹtt tõt, što mäʹhtt ciʹsttjep kueiʹmm kueiʹmees paaiʹǩid, näkkam juurdnääll lij še siõmmna mottjam da možât leäʹp väjldâʹttem tõn da jääuʹr lie ǩeâlljam tõn kueʹllšeellmõõžž. Maiʹlmm mottai da nuʹtt mottai miʹjjid.

Sevettijärvellä nuotataan kesäkuussa 2018
Nueʹtt ǩeässmõš Čeʹvetjääuʹr reeddast ǩeässa 2018. Govva: Markus Moshnikoff

Obb riikkâst lie saaǥǥstõõllâm tän pirr, mäʹhtt äʹrbbvuâđlaž kueʹllšiilli ämmat lij jaukkmen. Ämmat ij teänab ǩeäss miõl da tuâjj lij lossâd. Täin haʹŋǩǩõõzzin haaʹleed še älšmâʹtted oummid da seʹlvvted, mäʹhtt tuâjj leʹčči vueiʹtlvaž še sääʹmvuuʹdest.

– Mäʹhtt vuäǯǯad kueʹllšeellmõõžž eʹpet jieʹllemvueʹǩǩen, što oummu vuäittče šeelled jeänab da kaaupšed da vuäǯǯad nääiʹtaa mij čårrsiidi jeällma.

Varrasamosat

Muualla Yle.fi:ssä