Sápmi |

Multidáiddár Holmberg čálligoahtán filmma – Filmma bagadallá Katja Gauriloff

Niillas Holmbergis leat máŋggat prošeavttat dál jođus, ja okta dain lea filmma giehtačállin.

Jietna: Niillas Holmberg
Jietna
Guldal dás olles jearahallama.

Ohcejohkalaš musihkar, diktačálli ja neavttár Niillas Holmberg oažžu dál lasihit ovtta tittela alccesas lasi, go lea čálligoahtán dál maid filmma.

Holmberg oaččui Internašunála Sámi filbmainstituhtas 30 000 NOK ovdánahttindoarjaga, mainna áigu dál čállit iežas vuosttas oanehis filmma. Filmma bargonamma lea Skálžu.

Filbma lea politihkalaš - poehtalaš hámis.

– Dat lea dakkár iskkadeaddji ja dáiddalaš, ii áibba dábálaš filbma. Dat gieđahallá sivaid ja čuovvumušaid sámekultuvrras, dat buokčaladdá vássán áiggis čuđiidge jagiid duohkái ja fitnaladdá maid dán áiggis, ja vejolaččat vel boahttevuođas. Das lea vuođđun mu guhkes dikta, muitala Holmberg.

Niillas Holmerg ii divtta čáledettiin vuos jurddašan ráhkadit das filmma.

– Dalle in gal diehtán mun filmma áiggon das ráhkadit, in dieđe goas dat dál čielggai, muhto nu dat šattai.

Filmma giehtačállin ii dattetge leat áibba amas ášši Holmbergii; son stuđerii Tampere dáiddalaš surggiid logahagas (su. ilmaisutaidon lukio) ja beasai dalle maid vehá oahpásmuvvat filbmagiehtačállosa čállimii.

– Ja dat ii leat iešalddes nu eahpedábálaš, ahte jus lea girječálli dahje čálát divttaid, de ahte čálát maiddái earálágán surggiid čállošiid, lasiha vel Niillas Holmberg.

Gauriloff bagadallin

Niillas Holmberga filmma bagadallá bálkkašuvvon nuortalaš filbmabagadalli Katja Gauriloff. Holmberg ii ieš bagadala dán oanehis filmma.

– Mus lea hui illu, go lean ožžon nu čeahpes bagadalli.

– Mun in leat filbmabagadalli, nu multidáiddár mun in gal leat, čaibmá Holmberg.

Katja-Gauriloff
Katja Gauriloffii leat mieđihan earet eará Jussi-bálkkašumi, mii lea Suoma dehálamos filbmasuorggi bálkkašupmi. Govva: Yle / Vesa Toppari

Filmma dárkilis almmustahttináigi ii leat vel sihkkar, muhto Holmberg mielde plánan lea, ahte dat livčče gárvvis jagis 2020.

– Dat lea dat plána, muhto dain ii goassige sáhte nu sihkkarit dadjat. Dat lea dieđus veahkkeruđaid ohcat dál, lohká Niillas Holmberg.

Diktagirji boađi boađi

Multidáiddáris leat maid máŋggat eará barggut jođus dál. Son almmustahttá su ođđasamos diktagirjji Anáris Urbánbeivviid oktavuođas, miessemánu 23. beaivve.

Holmberg lea jorgalahttán girjji jo suoma- ja eaŋgasgillii.

– Das lea dál vehá bargu gávdnat daid girjelágádusaid Suomas ja Amerihkás, Eŋlánddas mus lea jo lágádus, muitala Niillas Holmberg.

Kodassa ihmisiä.
Niillas Holmberg ovttas Ellos Deatnu -joavkuin leat plánemin maiddái boahtte geasi. Guldal dan birra olles jearahallamis. Govva: Kukka Ranta

Guldal Yle Areenas olles jearahallama. Sáhkan lea maid Holmberga eará prošeavttat, ja mii gullo su ja Roope Mäenpää jovkui.

Varrasamosat: Sápmi

Váldoođđasat

Varrasamosat

Muualla Yle.fi:ssä