Sápmi |

“Mun fal huiken ČSV!” - sámenieida finai eamiálbmotfilbmafestiválas Torontos

Skábmagovat-filbmafestivála buvttadeaddji Sunna Nousuniemi oassálasttii juo nuppe háve ImagineNATIVE -festiválii Torontos, Kanadas. Son rámiidii dáhpáhusa ovdamearkka dihtii danin, go doppe ordnejuvvo traumaterapiija filmmaid maŋŋá.

Skábmagovat -festiválaid buvttadeaddji Sunna Nousuniemi imagineNATIVE -festiválain Torontos, Kanadas.
Skábmagovat -festiválaid buvttadeaddji Sunna Nousuniemi imagineNATIVE -festiválain Torontos, Kanadas. Govva: imagineNATIVE Film + Media Arts Festival Facebook-siiddut

Skábmagovat-filbmafestivála buvttadeaddji Sunna Nousuniemi finai Torontos, Kanadas oahpasmuvvamin ImagineNATIVE -festiválii.

Son oassálasttii festiválii juo nuppe háve, ja illudii sakka dáhpáhusa sisdoalus ja vuoiŋŋas.

“Eamiálbmogat čohkkejuvvon oktii”

Nousuniemi liikui festiválii ovdamearkka dihtii danin, go doppe lei buorre oktavuohta eamiálbmogiid gaskkas.

– Dan gal dovddai dakkár oktavuođa go mun ledjen doppe festiválain, son lohká.

Go lea sápmelažžan dakkár dilálašvuođas, gos leat olu eamiálbmogat, ii dárbbaš čilget geasage gii lea.

– Mun in dárbbašan čilget, ahte gii mun lean. Orru leamen, ahte mun ferten mannat Kanadai dahje Ođđa-Seelándii, ahte mun in dárbbaš čilget, ahte gii mun lean ja gos mun boađán, Nousuniemi illuda.

ImagineNATIVE lea máilmmi stuorámus eamiálbmogiid filbmafestivála.

– Doppe leat buot eamiálbmogat čohkkejuvvon oktii, ja mii dušše doppe muitalit iežamet muitalusaid ja vásáhusaid filmma dáfus.

“Filmmat sáhttet loktet traumaid”

Go sáhka lea eamiálbmogiid filbmafestiválas, de gieđahallojuvvojit sihkkarit maiddái losses áššit filmmain.

– ImagineNatives leat hui dehálaš ságat, ahte mat bohtet ovdan, Sunna Nousuniemi muitala.

– Juohke čájáhusa álggus festiválajođiheaddji muitalii gehččiide, ahte filmmat sáhttet loktet traumaid, ahte festiválas lea maiddái vejolaš oažžut terapiija.

– Sáhttá mannat latnjii ságastallat, jus leat traumat, dahje mangelagan losses muittut, mat leat boahtán millii go lea geahččan filmma. Mu mielas hui fiidnát dahkkon, ahte fállat veahki, ja vejolašvuođa hallat daid traumaid ja unohis muittuid birra.

Dakkár fálaldat lea kánske boahtimin maiddái Anárii Skábmagovaide.

– Mii leat jurddašan dan birra, ahte lágidit dakkár panela, mas buktit ovdan dakkár áššiid, mat leat áigeguovdilat min servošis.

“Mun fal huiken ČSV!”

Sunna Nousuniemi ii lean ovddasteamen dušše Skábmagovaid, muhto baicce maiddái iežas oanehisfilmma. Dan son lea ráhkadan Maoriland-festivála bargobájis Ođđa-Seelánddas.

– Mun in leat okto dan bargan, mun bargen dan dalle doppe Nativeslam challenges.

Dat lea vihtta minuhtta oanehisfilbma. Filbma čájehuvvui vuosttaš háve ImagineNATIVEs ja dan beassá oaidnit Skábmagovainge.

ImagineNATIVE maŋimuš eahkedis ordnejuvvui filbmagála. Sámefilmmat birgejedje bures das.

Gálas Sofia Jannok oaččui buorimus musihkkavideo bálkkášumi ja Marja Helander vuittii buorimus geahččaladdi oanehisfilmmaid luohkás. Sunna Nousuniemi oassálasttii gálaeahkedii.

– Ledjen nu rámis ja lihkolaš. Mun álgen čierrut, mun ledjen nu rámis, ahte mun fal huiken ČSV!

– Lea somá, ahte mii oažžut fuomašumi maiddái internašunala dásis, lohká Nousuniemi.

Varrasamosat: Sápmi

Váldoođđasat

Varrasamosat

Muualla Yle.fi:ssä