Sápmi |

Muonájogas gávdnon guhtta jápmán luosa geasi áigge – “Ii leat sáhka luossajámuin”

Biebmolágádus váldá dán vahkus Duortnus eanu luosain varra-, vuoivvas- ja meađđeniskosiid.

Kuollut lohi rannalla, laikullinen iho johtuu vesihometartunnasta.
Govva: Kati Siponmaa / Yle

Duortnus eanu buohcci luosat leat beaggán ja ságastahttán sakka geasi áigge. Oalis ja maiddái oalgejogain leat goddán fasttes buohcci guliid ja gáttiin leat gávdnon maiddái jápmán luosat. Helsingin Sanomat -aviissa mielde Duortnus eanus leat gávdnan juove čuđiid jápmán luosaid. Badjelis Muonájogas dilli ii leat goit seamma vearrái, go dán geasi eai leat gávdnan go muhtin jápma guliid.

Duortnus-Muonájoga guolástusbearráigeahčči Juha Niemelä Lappi EBI-guovddážis oaivvilda, ahte ášši lea báisan dego láibedáigi. Niemelä oaivvilda, ahte dál ii leat vel sáhka guollejámuin.

– Badje-Durdnosa ja Gárasavvona gaskkas leat gávdnan geasi áigge oktiibuot guhtta jápmá luosa. Davimus báiki, gos jápmán luossa lea rievdan gáddái, lei Visantokoski, 20 km Muoná guovddážis vulos.

Niemelä mielde olbmot leat gal goddán Muonájogas luosaid, mat leat gillán čáhceguohpa-dávddas.

– Iihan dat unnánaš čáhceguohpa daga maidege, olbmot leat borran daid guliid ja njálgát leamašan, muitala Niemelä.

Biebmolágádus dutká luosaid

Árat dán vahkkus bekkii, ahte maiddái Lávnnjiteanus Ruoŧa bealde leat goddán fasttes ja buohcci luosaid.

Njeallje maŋemuš jagi Duortnus-Muonájogas guolledárkkisteaddjin bargan Juha Niemelä jáhkká, ahte luosat sáhttet leat buohccán bivdosiid geažil.

– Luosat leat šaddan mearas máŋgii bivdosiidda, ožžon das háviid ja de buohccán čáhceguohpa-dávdii go leat vuodjagoahtán joga bajás, árvala Niemelä.

Biebmolágádus leage dutkame Duortnus eanu luosaid ja dán vahkus leat bivdán ealli luosaid, main leat váldán varra-, vuoivvas- ja meađđeniskosiid.

Varrasamosat: Sápmi

Váldoođđasat

Varrasamosat

Muualla Yle.fi:ssä