Sápmi |

Muttošjávri ja Meahciráđđehus leat beassan soahpamuššii Jiekŋavári vuovdečuohppamiin

Muttošjávrri bálggus lea čujuhan Meahciráđđehussii njeallje eananbálsttá, gos dan mielas heive čuohppat vuovddi. Meahciráđđehus čuovvu bálgosa evttohusa, muitala vuovdedoallohoavda Pertti Heikkuri. Boazoisit Osmo Seurujärvi atná dán dohkálaš kompromissan.

Osmo Seurujärvi ja Pertti Heikkuri
Muttošjávrri bálgosa boazoisit Osmo Seurujärvi ja Meahciráđđehusa vuovdedoallohoavda Pertti Heikkuri. Govva: Yle Sápmi

Meahciráđđehus ja Muttošjávrri bálggus Anáris leat beassan soahpamuššii Jiekŋavári vuovdečuohppamiin.

Meahciráđđehus lea álggaheamen vuovdečuohppamiid Muttošjávrri bálgosa siste, Jiekŋavári guovllus Anárjávrri davábealde. Bálggus lea dán rádjai vuostálastán Meahciráđđehusa plánaid, muhto miehtan dál unna čuohppamiidda.

Bálggus čujuhan čuohppamiidda njeallje bálsttá – "Mii čuovvut dan"

Muttošjávrri bálggus lea sádden Meahciráđđehussii iežas oaivila Jiekŋavári guovllu vuovdečuohppamiin ja čujuhan dasa njeallje eananbálsttá, gos heive čuohppat vuovddi.

Pertti Heikkuri
Govva: Yle Sápmi
Meahciráđđehusa vuovdedoallohoavda Pertti Heikkuri muitala, ahte sii leat mearridan čuovvut dán evttohusa.

– Čuohppamat dahkkojuvvojit bálgosa evttohusa mielde. Mii álggahit daid vahku siste ja dat leat meattá moatti beaivvis.

– Jearaldat lea dakkár bálsttáin, mat leat čuhppojuvvon 80-logu álgobealde, muhto dohko leat dalle guđđojuvvon siemamuorat. Dál lea dárkkuhus geahpedit dalle guđđojuvvon siemamuoraid, Heikkuri čilge.

Meahciráđđehus ráđđádallá vel bálgosiin maiddái árat čuhppon guovlluid siemamuoraid ja boarrásamos muoraid (su. ylispuu) čuohppamis.

Seurujärvi: Dát lei kompromissa

Osmo Seurujärvi
Govva: Yle Sápmi
Muttošjávrri bálgosa boazoisit Osmo Seurujärvi ii lean maŋŋebárgga eahketbeaivve gullan Meahciráđđehusa mearrádusas.

Son imaštallá Meahciráđđehusa diehtojuohkima, muhto atná mearrádusa dohkálaš kompromissan.

– Mun in leat gullan maidige Meahciráđđehusas, ahte mo sii leat dál mearridan. Muhto dát lei dakkár kompromissa. Bággu lei suovvat sin juoidá čuollat, Seurujärvi dadjá.

Vuovdesoahpamušas mearriduvvon guovlluide eai guoskka

Meahciráđđehus deattuha, ahte sii eai rihkko vuovdesoahpamuša.

Meahciráđđehus ja Anára vuovdebálgosat sohpe jagi 2010, ahte bálgosiid meroštallan dehálamos guohtuneatnamat vuovdedoalloguovllus sirdojuvvojit 20 jahkái vuovdedoalu olggobeallái.

Daidda guovlluide ii Meahciráđđehus áiggo guoskat.

– Daid guovlluide Meahciráđđehus ii leat plánen iige pláne vuovdečuohppamiid. Buot guovllu bálgosiiguin galgá meannudit dásseárvosaččat ja soahpamuša mielde, Meahciráđđehus cealká dieđáhusastis.

Varrasamosat: Sápmi

Váldoođđasat

Varrasamosat

Muualla Yle.fi:ssä