Sää´mjânnam

Muumlieʹǩǩ -tv-räidd duʹbbjet pâi tâʹvvsäämas, nuõrttsäämas da aanrõšǩiõʹlle teeʹkstʼtõs – puärraz maantõʹtte mierrõʹsse

Muumipeikko ja niiskuneiti istuvat vaaleanpunaisen pilven päällä yläilmoissa.
Govva: Moomin Characters & Gutsy Animations

Yle õõlmtõsjååʹđteei Ismo Silvo mušttal, što aanrõš- da nuõrttsääʹmǩiõʹlle jie kaunnu nok jiõnnčuäjtõõlli.

Ođđ Muumlieʹǩǩ -tv-räidd puätt puõʹtti ǩiiđ rääʹjest vueiʹnned Yle Areenast. Kuuitâǥ ââʹn kuâsttai, što tv-räidd šâdd pâi tâʹvvsäämas da minoriteʹtt sääʹmǩiõlid aanrõš- da nuõrttsääʹmǩiõlid raaʹjjat teeʹkstʼtõõzzid.

Yle õõlmtõsjååʹđteei Ismo Silvo mušttal, što aanrõš- da nuõrttsääʹmǩiõʹlle jie kaunnu nok jiõnnčuäjtõõlli.

– Duʹbbjummša feʹrttai kaunnâd jieʹnnǩiõllsa jiõnnčuäjtõõlli, jiõm-ǥa ååsk, što tõid kaunnâd jåtlânji kolmm sääʹmǩiõʹlle. Lij šiõǥǥ, što tv-räidd šâdd aainâs tâvvsäämas, särnn Silvo.

Silvo raʹvvai, håt nuõrtt- da aanrõšǩiõʹllsaž prograaʹm jieʹt duʹbbjet, vueiʹtte puärraz lookkâd jiõnnsa teeʹkstid jiijj päärnaid.

"Tuõʹđi maantõõttâm leäm"

Aanrõšjeäʹnn Niina Siltala mušttal, što tän ođđâz ij leämmaž šiõǥǥ kuullâd. Sij piârrjest leʹjje juʹn vuârddam, što leʹčči uʹccääb ǩiõʹlle še måtam päärnaiprograaʹmm, mâʹst mainsted aanrõšǩiõl.

– Tuõʹđi maantõõttâm leäm. Mõõʹnni ǩeâđđa, ko mušttled što tv-rääid raajjummšesž väʹldded lokku jiõnin puk koolm sääʹmǩiõl. Teʹl mainsteâ, što vueʹss roolin pueʹtte sääʹmǩiõlin. Täʹst leʹjje tâʹlle määŋg vuäittmõõžž tääzz, mäʹhtt tuejjeed, mušttal Niina Siltala.

– Ij-han tõʹst leäkku ni måkkam veäʹǩǩ. Ij tõt veäʹǩǩet muu päärnaid ni vooʹps.

– Ââʹn puõʹđi nåkkam tobdd, što eʹpet sij väjldâʹtte miʹjjid, son juätkk.

Seämma miõlin lij nuõrttsäʹmmlaž jeäʹnn Terhi Harju. Son mušttal, što teeʹstʼtõs ij korvvad tõn, što päärnaž vuäitt ǩiõččâd muumid mainsteʹmmen säämas.

– Teeʹkstʼtõs iʹlla seämma äʹšš, ko jos täk muum jiõčč mainsteʹče säämas. Leäm juʹn koittjam tõn, što koittjam mainsted veeʹresǩiõllsaž prograaʹmmi ool säämas, leâša tõt iʹlla tuåimmam, mušttal Terhi Harju.

Terhi Harju
Nuõrttsäʹmmlaž jeäʹnn Terhi Harju leäi juʹn vuârddam jiijjâs päärnže nuõrttsääʹmǩiõllsaž tv-rääid. Govva: Xia Torikka / Yle

Säämas da aanrõšǩiõʹlle jieʹla jiânnai materiaal

Puärrsin Niina Siltala da Terhi Harju rämmše tõn, što ââʹn aainâs tâʹvvsäämas šâʹdde prograammid. Tõt lij jõnn äʹšš päärnaid, što fiiʹlmid vuäitt ǩiõččâd jiijj ǩiõʹlle. Seämma sij pâi tuâivvjeʹče jiijj päärnaid.

Kuhttuin ǩiõlin iʹlla jiânnai materiaal päärnaid. Yle raajjaam sääʹmǩiõllsaž päärnaiprograaʹmmest Unna Junnást vuäitt kuullâd puk koolm sääʹmǩiõl. Tõn lââʹzzen NRK Sääʹmm raajji BinnaBánnaš-rääid, mâʹst mainstet še pukin sääʹmǩiõlin.

Siltala ja Harju vueiʹnne täid prograaʹmmid sami vääžnai vueʹzzen päärnai ǩiõllsilttõõzz raajjummšest.

– Muu pärnn kâʹl tuʹǩǩad täid ǩiõččâd, leša tõk pâi lie nuʹt vuäʹŋkõs nuʹt ij tõid vuäitt määŋg vuâra ǩiõččâd. Son haalâd vueiʹnned ođđ aaʹššid še, särnn Harju.

Õhttân määinen tän tuʹmmstõõǥǥâst leäi, što nuõrtt- da aanrõšǩiõllsai kõõskâst jie kaunnu jieʹnnǩiõllsa čuäjtõõlli.Niina Siltala miõlâst leäi lossâd kuullâd näkkam määin.

Nuõrttsäʹmmlai da aanrõšǩiõli sââʹjj lij nåkkam, što jie leäkku jiânnai jieʹnnǩiõllsa.

– Muʹnne tõt kuâsttai, što iʹlla haall ij-ǥa obb tieʹǧǧ tuejjeed, nuʹt piijjâp tääʹzz mäinnen tõn, što feʹrttječi leeʹd jieʹnnǩiõllsaž oummu. Tõt lij aivv jõllsaakk. Fiʹttjam, što feʹrttai leeʹd šiõǥǥ ǩiõllsilttõs da heiʹvvje tõn rooʹlle, särnn Siltala.

Yle õõlmtõsjååʹđteei vasttad puärrsid: "Tieʹttep, što teeʹkstʼtõs lij päärnže hueʹnn ääʹšš"

Mõõʹnni ǩeâđđa Ylest teâđteš, što ođđ Muumlieʹǩǩ -prograaʹmmest väʹldded lokku puk kolmm Lääʹddjânnmest mainstum sääʹmǩiõl tv-rääid jiõnnversioin. Kuuitâǥ teʹl ij leämmaž čiõlgg, mäʹhtt tv-rääid pueʹtted tuejjeed.

Nuuskamuikkunen ja Muumipeikko istuvat puisella penkillä metsässä.
Govva: Moomin Characters & Gutsy Animations

Silvo mušttal, što õõut duʹbbjum prograamm raajjummša mâânn 100 000 euʹrred da duʹbjummuž lij kaallsõs projeʹktt juõʹǩǩ ǩiõʹlle.

Ismo Silvo vasttii veâl Yle Sääʹmme, što fiʹttai puärrsi maantõõttmõõžž.

– Mij tieʹttep aanrõš- da nuõrttsääʹmǩiõli sââʹjj ja mij kâʹl haaʹleep tuärjjeed ǩiõlid. Možt täʹst, lij šõddâm toʹlǩǩeemvââʹǩǩ, što leäʹpa mij låʹppääm še aanrõš- da nuõrttsääʹmǩiõllsa duʹbbjuum prograammid, särnn Silvo.

– Tieʹttep, što teeʹkstʼtõs lij päärnže hueʹnn ääʹšš. Tuâivap kuuitâǥ, što teeʹkstin leʹčče aainâs måtam vieʹǩǩ.

Silvo tuâivv, što tän sââʹjest Muumlieʹǩǩ teeʼkstʼtõs leʹčči äuʹǩǩai še minoriteʹtt sääʹmǩiõlid. Puõʹtti ääiʹjest jie veâl tieʹđ, jos muum mainsteʹče še kuhttuin ǩiõlin.

– Jeäʹp leäkku veâl ruõkkâm tän ääʹšš, leâša jeäʹp še ni loʹppeet, što puõʹttiääiʹjest Muumlieʹǩǩ šâdd še aanrõš- da nuõrttsääʹmǩiõlid. Mij tuâʹlljep tän juurd. Muum jeäʹlle kuʹǩǩ da lij kuʹǩesäiggsaž prograaʹmm, mõõn ââʹnned, särnn Silvo.

Ođđ Muumlieʹǩǩ -räidd rajješkueʹttet tâʹvvsäämas puõʹtti ǩiiđ ääiʹj. Räidd lij määusam pâʹjjel 20 miljon euʹrred da tõt lij pukin kaallšummuš TV-puuʹtʼtõs Lääʹddjânnmest.

Puuʹtʼtõõzzâst vaʹsttee lääʹddlaž Gutsy Animations -põõrǥâs da prograamm čeäʹpplõs jååʹđteei lij Marika Makaroff. Gutsđ Animations ooudeemjååʹđteei Reetta Ranta mušttal, što iʹlla veâl mieʹrrääm, ǩii ohjjâd da jåårǥlâtt tâʹvvsäämas Muumlieʹǩǩ-rääid. Raiddu ooʒʒât ââʹn jiõnnčuäjtõõlljid.

Varrasamosat

Muualla Yle.fi:ssä