Säämi |

Muusik mon jieh lah ovdil kuullâm – “Jis kuldâlah YleX te tun jieh veltihánnáá kuulâ tággáár muusik tobbeen”

Pärttihist vuálgám Njihe čuojât muusik mast lii eromâš stijlâ.

Elle Kokkonen
Elle Kokkonen čuojat kiitaar já lávlu. Govva: Priváhta govva

“Manne jođán okto, manne jođán okto? Anára márkanis”

Náávt lávlu Elle Kokkonen suu pittáást Márjjábeivviid maŋŋá. Sust lii jo kuhheeb ääigi lamaš muusikjuávkku, mon nommâ lii Njihe. Njihe ij kuittâg lah vala puáttám Sáámán čuojâttiđ, mutâ maadâ-Suomâst juávkku lii lamaš maŋgii lyeve alne.

Elle Kokkonen máttá jieš čuojâttiđ puohlágán čuojânâsâid já Njihe-juávhu muusik ij lah suu mielâst nuuvt táválâš muusik.

– Jis kuldâlah YleX te tun jieh veltihánnáá kuulâ tággáár muusik tobbeen.

– Kale tot lii mun, kiitaar já tiättur, povvust Kokkonen.

"Tot pággu lâi talle tot inspiraatio"

Muusik rähtim ij lah sunjin kuittâg uđđâ äšši, tast ko sun lii algâttâm muusik rähtim jo talle ko aasâi Anarist, Pärttihist.

– Mun lam uáli kuhháá čáállám lavluid, love ihheed suullân tot lii lamaš munjin vááimuäšši. Vuossâmuu tove ko rähtim pitá lâi ko lijjim vala Anarist já mist lâi taggaar Slap-juávkku.

– Mun tavesämikielân čälistim muáddi pitá já tot pággu lâi talle tot inspiraatio, povvust Kokkonen.

Njihe juávhu nommâ puátá Kokkonen päikkikuávlust, Pärttihist. Njihenjargâ lâi suu päikkisaje Anarist. Njihe lii anarâškielâ já táárgut tiätulágán muorâ.

Elle Kokkonen
Elle Kokkonen lii Pärttihist meddâl já päikkiahheev lii ohtâ fáddá mast sun lávlu. Govva: Priváhta govva

Tääl sun kuittâg lohá jienâsundáttâllâm Helsigist Teatterollâškoovlâst. Škoovlân lii vaigâd peessâđ já ovdâmerkkân taan ive siämmáá škoovlân já suárgán pessii tuše nelji uáppee siisâ. Veikkâ Pärttihist Helsigân lii kuhes mätki, tot lii kuittâg lamaš iššeen pitái čälimist.

– Kale tot päikkiahheev lii tot ohtâ fáddá. Ruossâlâsvuotâ toin, ete koolgâm aassâđ Helsigist veikkâ jiem lah kaavpugolmooš, muštâl Kokkonen.

Sämikielân-uv čuojâttem lâi sunjin aaibâs luándulâš.

– Ko lii kyevtkielâlâš olmooš, te lii luándulâš čäälliđ suomâkielân já sämikielân.

Njihe muusik lii kuullâmnáál Souncloudist.

Taan oho Tiervâ-vuolgâttâsâst 2.8.2019 peessâp kuullâđ Njihe juávhu pitá Márjjábeivviid maŋŋá já Elle Kokkonen sahhiittâllâm.

Varrasamosat: Säämi

Váldoođđasat

Varrasamosat

Muualla Yle.fi:ssä