Sápmi |

"Na gean don válljet hearrá X?" – Bivnnuhis ráhkisvuođagilvu ordnejuvvo mihcamáraid Leammis

Leammis ordnejuvvo mihcamáraid Napakymppi-gilvu mii lea beaggán Suoma tv:s juo máŋggaid logiid jagiid.

Sydämen muotoinen kivi etusormen ja peukalon välissä.
Govva: Hanne Kinnunen / Yle

Vaikko Leammi lea unna giláš, soaitá muhtimiin leat buorre liiba bearjadaga gávdnat doppe alcces guoimmi. Sáhka lea das, go Leammis gilvvohallet bearjadaga suohtastallangilvvuin ávvudan dihte mihcamáraid. Gilvvu namma lea Napakymppi ja dat čuovvu Suoma tv:s ovdal čájehuvvon gilvvu málle.

Napakymppi lea tv-gilvu mas olbmot ohcet ráhkisvuođa. Gilvvus dievdu X galgá jearahallat nissoniid A, B ja C ja dan vuođul válljet alcces guoimmi. Dievdu X ii oainne nissonevttohasaid ovdal go lea válljen gilvvu loahpas, gii lea sutnje heivvolamos evttohas.

Leammi Napakymppi-gilvvu ordnejeaddji Karen-Anne Jomppanen Leammi Lumo -turismafitnodagas árvala, ahte máŋggat dihtet gal Napakymppi gilvvu.

– Mis fal dál lea nu, ahte mis leat guokte dievddu hearrá X:n, ja dasto earát leat nissonat. Go midjiide leat dál eambbo nissonat almmuhan go dievddut.

– Dievddut jearahallet gažaldagaid ja galget válljet dasto dain vástideaddjiin ovtta, čilge Jomppanen.

Gilvaleaddjit besset mátkái

Napakymppi lea oidnon tv:s vuosttas háve MTV-kanálas juo jagis 1985 ja dat čájehuvvui gitta jagi 2002 rádjai. Dan maŋŋá prográmmas šattai boddu, ja jagis 2017 Napakymppi-prográmma čájehišgohte fas Suoma tv:s Nelonen-kanálas.

Leammi Napakymppis leat maiddái muhtin eará nuppástusat originála Napakymppi ektui.

– Mis ii leat seamma láidesteaddji go dolin tv-gilvvus lávii leat dat Kari Salmelainen. Mis lea goittot hui buorre láidesteaddji min Leammi gilvvus, muitala Jomppanen.

Originála tv-ráiddus gilvvu vuoitit besset olgoriikii luopmomátkái, muhto aivve olgoriikkamátkkit eai Leammi gilvvus juhkkojuvvo.

– Gal mis lea mátki, muhto ii leat aivve olgoriikii. Juogalágán mátki gal lea, lohpida Jomppanen.

Karen-Anne Jomppanen sávvá gilvaleddjiid searvat gilvui buriin mielain ja nu, ahte eai váldde dan menddo duođalaččat.

– Dat lea diekkár suohtastallan.

Gilvvu sáhttá čuovvut báikki alde, vaikko ieš ii livččiige gilvui oassálastimin. Leammis vurdetge dál geahččiid čuovvut gilvvu.

– Máŋggat leat gal jearahallan dan gilvvu birra ja háliidit boahtit geahččat, muitala Jomppanen.

Leammi Napakymppi álgá Leammi Lumo šiljus bearjadaga dii. 20.00.

Varrasamosat: Sápmi

Váldoođđasat

Varrasamosat

Muualla Yle.fi:ssä