Sápmi |

Ná lea oaidnit guoros Deatnu – "Die lean váccašan geahččamin, in leat veadján maidige"

Dábálaččat dán muttus geasi Vuolle-Deanus leat olu olbmot joga alde. Dál fatnasat leat gopmut ja luosat dušše muittuin.

Video: Antti Niilo Länsman istuu kumollaan olevien veneittensä edessä.
Video: Veikka Ritola / Yle

Dego álo, de dánge geassái lei dovddus luossabivdi, njuorggánlaš Ándde Niillas Länsman, ráhkkanan bures. De gilde luosabivddu.

– Die lean váccašan geahččamin. In leat veadján maidige. Dál buot mu bivdosat leat vuoggabumbbás, dain in sáhte ávkki atnit.

Gomu fatnasat, guoros láigobarttat ja bisánansajit leat oainnus, masa ii čalbmi hárján.

– Dat gal lea oalle amas. Mis leamašan ovdal turisttat, dál eai leat go johtti turisttat. Dat eai olu láibbi lasit, go eai bisán.

Länsman lea oaidnán, ahte čáhcelottit leat lassánan Deanus maŋimuš áiggiin. Gildosis ii leat su mielas stuorra váikkuhus, go lottit borret visot luossaveajehiid. Son jáhkká, ahte áidna ávki livččii čáhcelottiid geahpedeapmi.

Deatnu lea addán Länsmanii olu muittuid ja guliid. Son muitala, go sođiid maŋŋel Deatnu lei dievva luosain. Dan geasi gottiiga vieljainis valjis luosaid. Stággu ii goit gillán stuorra álvvu ja vieljažat divodeigga doddjon stággu dassáigo fertiiga máhccat ruoktot.

Njálbmi goit ain muitá varas Deanu luosa smáhka. Jus vel beasašii herskostallat Deanu luosain, de dan Länsman vuosttamužžan sáltešii, čielggis ja oaivvis vuoššašii máli.

Dál Länsman dušše vuordá boahtte geasi ja áigu ráhkkanit dan várás. Vuokkat vurdet bumbbás.

Varrasamosat: Sápmi

Váldoođđasat

Varrasamosat

Muualla Yle.fi:ssä