Sápmi |

Näkkäläjärvi-Länsman: "Dál mun beasan ráfis bargat iežan dáidagiin"

Musihkkár Anna Näkkäläjärvi-Länsman illuda jahkeabeali bargoveahkkeruđas ja lohká dan juohke dáiddára niehkun. Bargoveahkkeruđaid ovdii goit ferte bargat olu ja sáddet logiid ohcamušaid.

Ánnámáret Ensemble, Ijahis idja 2016
Govva: Paadar Images / Ijahis idja

Ohcejohkalaš musihkkár Anna Näkkäläjärvi-Länsman ii meidnen álggos jáhkkit go gulai, ahte Lappi dáiddadoaibmagoddi ja Taike - dáidaga ovddidanguovddáš leat juolludan sutnje jahkebeali bargoveahkkeruđa.

– Dathan lea dáiddára niehku beassat ráfis bargat dainna mas don leat ieš beroštuvvan. Dalle don leat iežat hearrá ja oaččot ieš mearridit maid don barggat. Dieđusge fertet čuovvut dan bargoplána maid don leat sádden dohko go leat dahkan ohcámuša. Muhto it dárbbaš leat gostege barggus, diinemin. Jus leat barggus, de dat bargu doalvu buot návccaid. Muhto dál mun beasan ráfis bargat iežan dáidagiin ja dat lea hui dehálaš, illuda musihkkár Anna Näkkäläjärvi-Länsman.

Luohteárbevierru sápmelačča čalmmiiguin

Anna Näkkäläjärvi-Länsman muitala, ahte son bargagoahtá bargoveahkkeruđa vehkiin boahtte jagi álggus ja jahkebeali ovddos guvlui. Vaikko son leige ohcan olles jagi bargoveahkkeruđa, de jahkebeliinge Näkkäläjärvi-Länsman beassá jo buori fártii iežas prošeavttas.

– Mus lei jurdda dutkat luohteárbevieru sámi geahččanguovllus. Ollu dutkithan gal leat dutkan luohteárbevieru, muhto dat leat leamašan olggobeale olbmot. Ja dat čuojaheaddjit, geat čuojahit ovttas juoigiiguin, dat leat dábálaččat kultuvrra olggobeale olbmot. De mun jurddašin dutkat sámi geahččanguovllus dan ja iskat, ahte mii livččii dego sámi vuohki ovdanbuktit luođi instrumentálalaš musihka bokte, muitala Anna Näkkäläjärvi-Länsman.

Bargoveahkkeruđat geađgge vuolde

Bargoveahkkeruđaid ii leat beare álki oažžut ja dáiddár fertege leat álot sáddemin ohčamušaid vejolaš ruhtagálduide, oaivvilda musihkkár Anna Näkkäläjärvi-Länsman.

– Varra jus logi ohcamuša sáddet, de ovtta sajis soaittát oažžut. Gal dat lea garra bargu, ahte orru ahte don lean álot čállimin daid ja álot leat boahtimin dat beaivemearit goassážii galgá sáddet sisa daid ohcamušaid. Dan ferte hui bures bargat dan ohcanbarggu vai don dasto oaččot daid veahkkeruđaid, muitala Anna Näkkäläjärvi-Länsman.

Stuorra mearkašupmi sámi kultureallimii

Lappi dáiddadoaibmagoddi ja Taike - dáidaga ovddidanguovddáš juhke dán jagi bargoveahkkeruđaid dáidaga ovddideapmái oktiibuot 132 000 euro. Bargoveahkkeruđa ožžo 15 dáiddára ja musihkkár Anna Näkkäläjärvi-Länsman lei okta sis. Näkkäläjärvi-Länsman oaivvilda, ahte lea stuorra mearkkašupmi sámi kultureallimii, ahte sámi dáiddárat ožžot bargoveahkkeruđaid.

– Dat lea hui dehálaš, ahte sámi dáiddárat ožžot daid veahkkeruđaid. Jus mis eai leat dakkár dáiddárat, geat buvttadit dan sámi dáidaga, de iihan mis leat fargga dat sámi dáidda, oaivvilda Anna Näkkäläjärvi-Länsman.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä