Sápmi |

Näkkäläjärvi evttohassan Europarlamentii – Fuolas eanangeavaheami ja dálkkádatrievdama váikkuhusain sápmelaččaide

Iiskku Ásllaga Mikkel, Mikkel Näkkäläjärvi jáhkká, ahte árktalaš guovllu áššit šaddet boahttevuođas eambo oidnosii Europarlameanttas.

Jietna: Mikkel Näkkäläjärvi
Jietna
Guldal olles suomagielat jearahallama dás.

Suoma sosiálademokráhtaid politihkkár Mikkel Näkkäläjärvi almmuhii mannan vahkuloahpa, ahte son lea evttohassan Eurohpá parlamentii. Son lei evttohassan Suoma riikkabeaiválggain jagi 2015, muhto ii dalle beassan riikkabeivviide.

Näkkäläjärvi muitala, ahte sutnje orui dál lunddolut álgit evttohassan Europarlamentii go riikkabeivviide.

– Daningo dat guktot válggat leat boahtte giđa ja lea váttis leat guktuin evttohassan, de smihtten, ahte válljen dan goabbá geasuha eanet ja goabbá lea munnje dehálut.

Europarlameanta geasuha Näkkäläjärvi erenomážit danin, go son háliida bargat riikkaidgaskasaš politihkas.

– Go smiehttá dán beaivve hástalusaid dego dálkkádaga liegganeami ja obalohkáige ráfi dáppe Eurohpás ja máilmmis, de okta stáhta ii bastte daid áššiid čoavdit. Dasa dárbbašuvvo riikkaidgaskasaš ovttasbargu. Mu mielas orru, ahte EU-dásis beasašin váikkuhit daidda áššiide, Näkkäläjärvi smiehtada.

Áiggošii deattuhit sámiide guoskevaš áššiid

Iiskku Ásllaga Mikkel lea eret Anáris ja bajásšaddan boazosápmelaš bearrašis. Su váimmu lahka leat erenoamážit birrasii ja eanangeavaheapmái laktáseaddji áššit.

– Birasáššit ja dálkkádatrievdama eastinhan namalassii guoskkahit sápmelaččaid, badjeolbmuid ja eará davviguovllu olbmuid. Mii diehtit, ahte jus dálkkádat lieggana globálalaččat 2 gráda, de davvin dat lieggana 4 gráda. Jus dálkkádaga rievdama eat bastte bissehit, de dan váikkuhus sápmelaš eallinvuohkái, árbevirolaš ealáhusaide ja davviguovllu turismii, elliide ja birrasii lea loahpalaš.

Mikkel Näkkäläjärvi
Iskku Ásllaga Mikkelii ruovttuguovllu áššit leat dehálaččat maiddái riikkaidgaskasaš politihkás. Govva: Priváhta

Näkkäläjärvi jáhkká árktalaš guovllu áššiid muđuige šaddat boahttevaš jagiid eambo oidnosii EU-dásis.

– Maŋimuš jagiid leat olu hállan Gaskameara áššiin ja sisafárrengažaldagaid birra, muhto jáhkán, ahte davviguovlluid áššit šaddet eanet oidnosii. Ovdamearkka dihte Jiekŋameara ruovdemáđija ja obalohkáige eatnamiid geavaheapmi davvin leat stuorra gažaldagat. Ieš lean hui krihtalaš dasa, ahte geavahit sápmelaččaid, badjeolbmuid ja eará árbevirolaš ealáhusain ealli olbmuid eatnamiid ruovdemáđija dihte.

Daid áššiid lassin Näkkäläjärvi oaidná dehálažžan teknologiija ovdáneami.

– Globálalaččat stuorra fitnodagain, dego Googles ja Facebookas, lea hirbmat olu váldi dan áigge ja sis lea olu diehtu olbmuid birra. Dat vuvdet daid dieđuid de ovddosguvlui fitnodagaide, mat geahččalit vaikkuhit olbmuide. Dat hástá demokratiija. Teknologalaš ovdáneapmi lea buorre ášši, muhto dan ehtalaš bealis eai leat vel ságastallan.

Näkkäläjärvii lea dehálaš beassat bargat olmmošlaš politihkain.

– Gal dat dálkkádat- ja birasgažaldat, olmmošriektegažaldagat ja árktalaš guovllu áššit leat dakkárat, mat geasuhit ja háliidivččen leat daid ovddideamen, olmmošlaš politihka vuodjimin, Mikkel Näkkäläjärvi muitala.

Johttá giđđat miehtá Suoma – Válgakampánjii sáhttá searvat gii fal

Go vuolgá stuorra válggaide fárrui, ferte leat maid válgakampánja, man bokte olaha olbmuid. Näkkälärvi válgakampánnjas fuolaheaba Hanna Isbom ja Mikko Kymäläinen.

Válggat ordnejuvvojit boahtte miessemánus. Dat dárkkuha, ahte vel ii leat kampánnjain hoahppu, lohká Mikkel Näkkäläjärvi.

– Johttán giđđat miehtá riikka. Dárkkuhussan livčče fitnat davvin juohke gielddas hálešteamen olbmuiguin das, masa sin mielas galggašii giddet fuomášumi, ja dieđusge áiggošin ieš juohkit iežan jurdagiid.

– Dan ii álo fuobmá, muhto stáhtaministara bargoáiggis goalmmát oassi manná EU-áššiide. Nappo EU lea oalle stuorra ášši, dasa gánnehage giddet vehá fuomášumi.

Näkkäläjärvi lea ožžon jo olu doarjaga ja guottiheami sosiála medias dan maŋŋá, go almmuhii iežas evttohasvuođa. Son lea giitevaš doarjagis, ja sus alddásge lea jáhkku dasa, ahte beassá Eurohpá parlamentii.

– Mun sávan, ahte olbmot luohtáše munnje ja lea duođai somá, go olbmot leat dorjon mu. Maiddái europarlamentihkkár Liisa Jaakonsaari doarju mu, ja son lea jo 40 jagi bargan politihkas. Livččehan dat somá leat Suoma davimus áirras, ja dáidá leat vel nu, ahte livččen de vuosttas eamiálbmotáirras doppe.

Suomas europarlameantaválggat leat boahtte giđa miessemánu 26. beaivve. Suomas leat europarlameanttas oktiibuot 13 báikki, muhto jos Stuorra-Británnia earrána EU:s, de Suopma oažžu jáhkkimis 14 báikki.

Varrasamosat: Sápmi

Váldoođđasat

Varrasamosat

Muualla Yle.fi:ssä