Sápmi |

Näkkäläjärvi: Ruvkelágat galget suddjet sámiid vuoigatvuođaid

Suoma sámedikki ságajođiheaddi mielas lea čielggas, ahte ruvkelágat galget suddjet sámiid vuoigatvuođaid. Son ii goittotge hálit seahkanit Ruoŧa, Norgga ja Ruošša sámiid áššiide, dego dál Gálloga stuimmiide.

Sámedikki ságajođiheaddji Klemetti Näkkäläjärvi. Govva: YLE

Sámedikki ságajođiheaddji Klemetti Näkkäläjärvi atná čielggasin, ahte nu Suomas, Norggas go Ruoŧasge ruvkelágat galget leat dakkárat, ahte dat suddjejit sámiid vuoigatvuođaid. Dáid áššiin sámedikkit sáhttet cealkit iežaset ovttasbargorgána, Sámi parlamentáralaš ráđi bokte.

Das, mii dáhpáhuvvá Gálloga málbmaohcamiid oktavuođas, Näkkäläjärvi lea várrugas cealkagiinnis.

- Mus lea leamaš álot čielga prinsihppa, ahte mun in seahkan Norgga, Ruoŧa ja Ruošša sámeáššiide. Muhto dieđusge jus mii galgat addit juogalágan oainnu min oktasašbarggu olis, Sámi parlamentáralaš ráđi, dalle mii dieđus geahččalit oažžut dan dakkárin, ahte dat dohkke buot sápmelaččaid oktasaš oaidnun.

Suoma ruvkeláhka geatnegahttá váldit vuhtii sápmelaččaid

Suomas bođii gieskat fápmui ođđa ruvkeláhka ja Sámediggi lea dan vehkiin váidán njealji gollerogganlobis, maid TUKES mieđihii Anárii jahki dassái. Roavvenjárgga hálddahusriekti gomihiige lobiid sámedikki váidaga vuođul. Dál TUKES ja lohpeohccit dolvot ášši Alimus hálddahusriektái.

Sámiid vuoigatvuođasuoji lea vuogas dál iskkadit.

- Leahan dat čielggas, ahte mii galgat juohke riikkas oažžut minerála- ja ruvkelágaid dakkárin, ahte dat suddjejit sámiid vuoigatvuođaid. Miihan leat ožžon ođđa ruvkeláhkii moadde dakkár paragráfa ja dat leat dál testejuvvome, ahte mot dat sámiid vuoigatvuođaid suodji sihkkarasto, dadjá Klemetti Näkkäläjärvi.

Varrasamosat: Sápmi

Váldoođđasat

Varrasamosat

Muualla Yle.fi:ssä