Sápmi |

Neahkkela boazoisit doalvu AVI mearrádusa bálgosa stivrii

Neahkkela bálgosa boazoisit Hannu Ranta ii kommentere Lappi guovlohálddahusdoaimmahaga mearrádusa leat juogekeahttá bálgosa. Boazodoalli Esa Kumpulainen máttabealde ii jáhke riidduid dása nohkat, vaikko ášši ii riidalemiin buorránge.

Näkkälän paliskunnan kokous
Govva: Vesa Toppari / Yle

Lappi guovlohálddahusdoaimmahat AVI attii maŋŋebárgga dieđu, ahte ii juoge Eanodaga Neahkkela bálgosa guovtti oassái. Bálggus lei gáibidan bálgosa juohkima, daningo bálgosa davvi- ja máttaosiin leamaš jo guhká riiddut guohtuneatnamiin.

Neahkkela bálgosa boazoisit Hannu Ranta ii hálit vel kommenteret ášši, baicce doalvu mearrádusa bálgosa stivrra gieđahallamii. Son ii máhte dadjat, goas stivrra čoahkkana fas.

"Eai áššit riidalemiin buorrán"

Neahkkela bálgosa ovddeš várreboazoisit Esa Kumpulainen (máttabealde bálgosa) sávvá soabalašvuođa davvi- ja máttabeali boazodoalliid gaskii, vaikko ii ieš dasa jáhkege.

– Eai dát áššit čoavdašuva goassige. Boazodoallu lea dakkár ealáhus, mii leat čátnon eanangeavaheapmái. Soabalašvuohta livčče gal dál buorre, dadjá Kumpulainen.

– Eai dat mátta- ja davábeale bohccot geassit bahke oktii, sáhka lea dálveguohtuneatnamiin. Muhto ii dát ášši riidalemiin buorrán, muittuha Esa Kumpulainen.

Neahkkela bálgosčoahkkin mearridii juohkigoahtit bálgosa guovvamánus 2012. Mannan geassemánus mearridedje rádjeevttohusain. Čoahkkin evttohii dalle, ahte bálggus juhkkojuvvošii mátta- ja davábeale osiide.

Yle Sápmi lea iskan oažžut maid ovttaskas, davábeale siidda boazodoalliid ságaide, muhto sis oktage ii álgán kommenteret mearrádusa vuossárgga.

Varrasamosat: Sápmi

Váldoođđasat

Varrasamosat

Muualla Yle.fi:ssä