Sápmi

Neahtta lea dán áigge okta stuorra konseartasále: maiddái dát artisttat ovdanbuktet musihkaset dál neahtas

Ma7ias ja Youngmiqu ja Jezebro
Matias Niemelä lea ráhkadan musihkkavideo artistanamain Ma7ias. Rap-artisttat Mihkku Laiti ja Jesse Ruokolainen fas loaiddasteaba Youtubes lávvardaga namaiguin Yungmiqu ja Jezebro. Govva: Matias Niemelä / priváhta, Aleksi Ahlakorpi

Ohcejoga nuorra rap-artisttat loaiddasteaba YouTube-konsearttas lávvardaga 30.5. Sámi mánáidkulturguovddáža almmustahttin musihkkaboddu lea jo oaidnimis neahtas.

Ii hehtte, vaikko koronadilli bágge olbmuid bissut siste. Iežas ruoktosuffá alde sáhttá beassat konsertii ja go veháš govahallá, sáhttá dovdat konseartavuoiŋŋa.

Lávvardaga Ohcejoga nuorra rap-artisttat Yungmiqu, Mihkku Laiti ja Jezebro, Jesse Ruokolainen loaiddasteaba vuosttaš neahttakonsearttasteaskka. Deanuleagis sámástit -prošeakta lágida dán YouTube-konseartta.

Soai leaba ovdal loaiddastan olbmuide Ijahis ija nuoraidbeaivvis ja leigga maiddái guossin čakčat Staalon kaato -turnea Ohcejoga konsearttas. Dán háve ovdanbuktin lea goittotge earálágán. Mihkku Laiti goit áigu loaiddastit, dego olbmot livčče báikki alde.

– Leahan dat dieđusge hui earálágán, go lea hárjánan ovdanbuktit musihka olbmuide, ja dál doppe ii leat giige. Das ii leat dakkár seammalágán dovdu, go jus livčče olbmot guldaleamen ja návddašeamen. Muhto go dieđán, ahte dat leat doppe kámera nuppe bealde, de gal dat dies, muitala Mihkku Laiti.

Laiti rávve, ahte buoremus konseartadovdui beassá, go návddaša konsearttas ja jurddaša, ahte livččii báikki alde geahččamin.

Yungmiqu Mihkku Laiti ja Jezebro Jesse Ruokolainen
Ohcejoga nuorra rap-artisttat Yungmiqu, Mihkku Laiti ja Jezebro, Jesse Ruokolainen. Govva: Aleksi Ahlakorpi

Konsearta lágiduvvo lávvardaga 30.5.2020 diibmu 19 ja dat oidno YouTubes Sámi musihkkaakademiija -kanálas.

Konsearta lea leamašan lágideamen maiddái Ohcejoga gieldda nuoraidbargi, Aleksi Ahlakorpi. Son illuda, go leat ožžon stuorra joavkku fárrui lágidit nuorra artisttaid konseartta nuoraide.

– Mii smiehtaimet ovttas, mo oaččošeimmet nuoraid sihke Suoma ja Norgga beal Sámis oktii, dál go ráját leat gitta. Dies de vehážiid mielde bođii jurdda konsearttas. Somá go nie máŋgasat leat leamašan mielde doarjumin konseartta lágideami. Illudan maid das, ahte nuorra artisttat ožžot vejolašvuođa beassat lávddi ala, dadjá Ahlakorpi.

Guldal dás Mihkku Laiti jearahallama. Jietna: Jouni Aikio / Yle

Mánáide ollašuhtton musihkkabottus leat mielde ođđa taleanttat

Eanodaga Neahkkilis orru Matias Niemelä almmustahtii gaskavahku musihkkavideo namain Ma7ias ja šuoŋain Tepastelen, mas son lávlu ja juoigá elektronalaš musihka távttas.

Video lea oassi sámegielat musihkkabottus, man Sámi mánáidkulturguovddáš Mánnu almmustahtii 27. miessemánu.

Dá oainnát Ma7ias nappo Matias Niemelä Tapastelen-musihkkavideo, man son ráhkadii Mánu musihkkaboddui. Video: Jauris Productions / Youtube

Fárus musihkkabottus leat maiddái Aslak Holmberg, Máret-Elle Valkeapää, Aimo Aikio, Inga-Máret Gaup-Juuso, Heli Aikio ja Tiina Sanila-Aikio. Juohkehaš sis lea govven iežas ovdanbuktima dakkár vugiin go lea leamaš vejolaš iežas dáiddu ja áiggi dáfus. Bottu ulbmilin lea lasihit sámegielat vásáhusaid sámiide álkes vugiiguin. Musihkkaboddu bistá sullii 20 minuhta, ja dan beassá geahččat dáppe.

Niemelä muitala, ahte mánáidkulturguovddáža jođiheaddji Petra-Biret Magga-Vars jearai su mielde musihkkaboddui, ja nuba son ráhkadii musihkkavideo dan várás. Niemelä lea guhká bargan musihkain ja áigu bargat dainna boahttevuođasge.

– Musihkka lea álo leamaš fárus, muhto buvttadeami ja dákkára lean bargan 12–13 jagi ja juohke láhkái buđaldan musihkain unnivuođa rájes. Dat lea somás hommá, nu lean oalle sihkkar, ahte boađán bargat dainna boahttevuođasge.

Niemelä áigumuššan livččiige buvttadit ođđa musihka lagaš áiggiid.

– Gal duos geasi áigge sáhttá leat boahtimin, nu mun jáhkášin, son tipse.

Guldal dás Matias Niemelä jearahallama. Jearahallan lea suomagillii. Jietna: Susanna Guttorm / Yle

"Buorre ja jođánis vuohki olahit geahččiid ja guldaleaddjiid"

Sámedikki sámemusihkkaguovddáža plánejeaddji Oula Guttorm oaivvilda, ahte dál go koronaáigge eai leat dáhpáhusat ja konsearttat, maidda sáhttá mannat báikki ala, de neahtas sáddejuvvon konsearttat ožžot álkibut fuomášumi ja beaggima.

Son jáhkká, ahte vuohki ordnet konsearttaid ja ovdanbuktimiid sosiála media bokte báhcá eallit, muhto go koronadilli lea meattá, de olbmot háliidit vásihit dáhpáhusaid ja konsearttaid báikki alde.

– Vaikko dán áigge leat buorre neahttaoktavuođat ja alla kvalitehta govva ja video, de dat ii liikká bastte buhttet dan live-dovddu, go leat báikki alde.

Oula Guttorm, Ijahis Idja
Sámedikki sámemusihkkaguovddáža plánejeaddji Oula Guttorm. Govva: Vesa Toppari / Yle

Guttorm muittuha, ahte konsearttaid sádden neahtas ii leat ođđa vuohki. Son oaidná, ahte neahta bokte konsearttaid sádden soaitá vel lassánit. Dat lea su mielas buorre vuohki erenoamážit boaittobeale guovlluin dego Sámis, gos eai leat stuorra gávpogat eaige olu klubbat, gosa mannat geahččat konsearttaid.

– Ja nuppe dáfus daidda artisttaide, geat eai váikkut gosge gávpogis, muhto baicce smávva gilážiin vaikkoba dáppe Sámis, de sihkkarit sidjiide dát lea buorre ja jođánis vuohki olahit geahččiid ja guldaleaddjiid, smiehtada Oula Guttorm.

Varrasamosat

Muualla Yle.fi:ssä