Sápmi |

Neakkela bálggus ii juhkkojuvvo – AVI hilggui gáibádusa jo nuppádassii

Bálgosa boazoisit Hannu Ranta Neakkela siiddas ii máhte vel kommenteret, maid bálggus dahká áššiin. Bálgosa várreboazoisit Esa Kelottijärvi Ovnnesduoddara siiddas ja Tuomas Keskitalo Bealdojávrri siiddas leaba duđavaččat mearrádussii.

Poro
Govva: Vesa Toppari / Yle

Lappi guovloeiseváldi AVI lea nuppádassii hilgon Neakkela bálgosa evttohusa das, ahte bálggus juhkkojuvvošii guovtti oassái. AVI mearridii áššis 25.10.2019.

AVI deattuha mearrádusastis, ahte Neakkela bálgosa juohkin livččii leamašan eahpevuoiggalaš bálgosa máttabeale boazodoalliide. Jus bálggus livččii juhkkojuvvon Neakkela bálgosa juohkinevttohusa mielde, de bálgosa máttabeale guohtundilli livččii čielggademiid mielde leamašan heajut go davábealde.

Ášši lea jorrán Neakkela bálgosa, AVI ja duopmostuoluid gaskkas máŋggaid jagiid. Bálgosa juohkima váldoággan leat jo guhká bistán guohtunriiddut, main leat dahkkon maid máŋggat rihkusalmmuhusat.

Bálggus juohkásan njealji sierra siidii

Neakkela bálgosis leat dálá dilis njeallje sierra siidda. Neakkela ja Gálggojávrri siiddat guođohit bálgosa davábealde ja Ovnnesduoddara ja Bealdojávrri siiddat fas bálgosa máttabealde.

Neakkela bálgosa boazoisit ja Neakkela siidda boazodoalli Hannu Ranta dadjá, ahte ii lean vuordán mearrádusa aiddo dál. Ranta ii sáhte vel kommenteret, maid bálggus áigu dahkat áššiin ja dadjá, ahte mearrádusa sisdoalu ferte lohkat veháš dárkilabbot. Neakkela bálggus doallá čakčačoahkkima dán vahku duorastaga golggotmánu 31. beaivve. Ášši ii leat goit dan čoahkkima áššelisttus.

Neakkela bálgosa várreboazoisit ja Ovnnesduoddara siidda boazodoalli Esa Kelottijärvi illuda AVI mearrádusas. Kelottijärvi ii lean vuordán AVI:s ná jođánis mearrádusa, muhto lea duđavaš go AVI hilggui bálgosa juohkima.

Bealdojávrri siidda boazodoalli Tuomas Keskitalo oaivvilda, ahte AVI mearrádus lea vuoiggalaš. Keskitalo mielde AVI lea mearrádusastis váldán vuhtii daid ákkaid, maid máttabeale boazodoallit leat ovddidan. Jus bálggus livččii juhkkojuvvon, de dat livččii gáržžidan sin guohtumiid beare olu, oaivvilda Keskitalo.

Yle Sápmi lea geahččalan oažžut kommeantta maiddái Gálggojávrre siidda boazodoalliin, muhto ii leat lihkosmuvvan oažžut geange ságaide maŋŋebárgga iđitbeaivve áigge.

Mearrádusa vejolaš váidit

Álgoálggos Neakkela bálggus mearridii bálgosa juohkimis 25.6.2014. Lappi guovloeiseváldi AVI goit hilggui bálgosa juohkima 19.3.2015.

AVI mearrádusas váidojuvvui ja dat gieđahallojuvvui Davvi-Suoma hálddahusrievttis ja maiddái alimus hálddahusrievttis. Doppe ášši máhcahuvvui goittotge ruovttoluotta AVI gieđahallamii juovlamánus 2018, sivas go Neakkela bálggus ii lean beassan buktit iežas oainnu ovdan eará oassebeliid cealkámušain.

Vaikko Sámedikki stivra leage dorjon Neakkela bálgosa juohkináššis ja lea gáibidan juohkima, de Lappi guovloeiseváldi oaivvilda, ahte sámi boazodoalu lea vejolaš gáhttet boazodoallolága vuođul dálá bálgosrájáid siskkobealde.

Lappi guovloeiseváldi mearrádusa lea vejolaš váidit Davvi-Suoma hálddahusriektái.

30.10.2019 dii. 12:15 Dárkkalnuhtton maŋimuš kapihttalis, ahte Sámedikki stivra lea dorjon Neakkela bálgosa juohkináššis.

Varrasamosat: Sápmi

Váldoođđasat

Varrasamosat

Muualla Yle.fi:ssä