Sápmi |

Neakkela bálggus juhkkojuvvo dattetge? – AVI gártá gieđahallat ášši ođđasit

Davvi-Suoma hálddahusriekti lea mearridan gomihit Lappi guovlohálddahusdoaimmahaga mearrádusa leat juogekeahttá Neakkela bálgosa Eanodagas ja máhcaha ášši guovlohálddahusdoaimmahahkii ođđa gieđahallamii. Guovlohálddahusdoaimmahat ii leat gullan áššis doarvái bálgosa, hálddahusriekti oaivvilda.

Neakkela bálgosa čakčačoahkkin 29.10.2015.
Neakkela bálgosa boazoisit Hannu Ranta. Govva: Minna Näkkäläjärvi / Yle

Davvi-Suoma hálddahusriekti lea mearridan gomihit Lappi guovlohálddahusdoaimmahaga (AVI) mearrádusa leat juogekeahttá Neakkela bálgosa Eanodagas. Hálddahusriekti máhcaha ášši guovlohálddahusdoaimmahahkii ođđa gieđahallamii.

Guovlohálddahusdoaimmahat mearridii giđđat 2015, ahte dat ii juoge Neakkela bálgosa guovtti oassái dego bálggus lei sávvan. Mearrádusa lei vejolaš váidit Davvi-Suoma hálddahusriektái.

Bálggus mearridii juohkásit 2014, AVI ii miehtan dasa

Näkkälän paliskunnan kokous
Govva Neakkela bálgosa čoahkkimis. Govva: Vesa Toppari / Yle
Neakkela bálggus mearridii juohkásit davvi- ja máttaosiide geasset 2014. Mearrádus addojuvvui guovlohálddahusdoaimmahahkii nannema váras, muhto doaimmahat mearridiige leat juogekeahttá bálgosa.

Guovlohálddahusdoaimmahat oaivvildii, ahte bálgosa juohkin unnit osiide ii leat dárbbašlaš boazodoalu dihte ja dat dušše váttásmahtášii dan. AVI maiddái oinnii, ahte mearrádus ii áitte ja váttásmahte sápmelaš boazodoalu iige siiddaid gaskasaš riidduid galgga dan mielas čoavdit guovlluid juohkimiin.

AVI mearrádusa váide bálggus, boazoisit sihke Gálggojávrri ja Neakkela siiddat

Neakkela bálgosis leat máŋggat siiddat. Guovlohálddahusdoaimmahaga mearrádusa váide Davvi-Suoma hálddahusriektái bálggus, boazoisit Hannu Ranta sihke Gálggojávrri ja Neakkela siiddaid boazodoallit.

Gálggojávrri siidda boazodoallit gáibidedje earret eará, ahte ášši máhcahuvvo Lappi guovlohálddahusdoaimmahahkii ja ahte áššis ordnejuvvo njálmmálaš gullandilálašvuohta.

– Neakkela bálggus leamaš geavadis jo guhká juohkásan davit ja máttit oassái, ja guovllus leat hárjehan boazodoalu iešguđetláhkai. Guovlohálddahusdoaimmahaga mearrádus váttásmahttá boazodoalu ja dákkár dili joatkašuvvan áitá sápmelaš árbevirolaš boazodoalu, Gálggojávrri siida ákkastalai váidagistis Davvi-Suoma hálddahusriektái.

Näkkälän paliskunta
Govva: www.paliskunnat.fi
Sihke Neakkela bálggus ja boazoisit Hannu Ranta gáibidedje, ahte ášši jogo máhcahuvvo Lappi guovlohálddahusdoaimmahahkii dahje ahte bálggus juhkkojuvvo. Lassin bálggus gáibidii, ahte áššis ordnejuvvo njálmmálaš gullandilálašvuohta.

Neakkela siidda boazodoallit vuot gáibidedje, ahte guovlohálddahusdoaimmahaga mearrádus gomihuvvo ja ášši máhcahuvvo ođđa gieđahallamii.

– Guovlohálddahusdoaimmahat ii leat váldán vuhtii siidda cealkámuša. Siidda mielas juohkima ággan leat váttisvuođat boazodoalus, eai boazodoalliid gaskasaš riiddut dego mearrádusa ákkastallamiin daddjojuvvo, Neakkela siida oaivvildii.

Sihke bálggus ja Gálggojávrri ja Neakkela siiddat buktet váidagiineaset ovdan maiddái AVI mearrádusa vuođđun geavahuvvon Fuođđo- ja guolledoalu dutkanguovddáža cealkámuša, mas sin mielas leat meattáhusat ja man ii livčče dan dihte galgan váldit vuhtii áššis mearridettiin.

"AVI ii gullan doarvái bálgosa"

Davvi-Suoma hálddahusriekti mearridii gomihit Lappi guovlohálddahusdoaimmahaga mearrádusa ja máhcahit ášši guovlohálddahusdoaimmahahkii ođđa gieđahallamii.

– Go váldá vuhtii dán ášši mearkkašumi bálgosii ja dan, ahte bálgosii ii leat addojuvvon vejolašvuohta cealkit háhkkojuvvon eará cealkámušain, ii leat doarvái, ahte bálgosa gulašedje easka váidinmuttus. Guovlohálddahusdoaimmahaga mearrádusa ferte dan dihte gomihit ja ášši máhcahit ođđa gieđahallamii, cealká Davvi-Suoma hálddahusriekti mearrádusastis.

Davvi-Suoma hálddahusriekti mearridii geatnegahttit Lappi guovlohálddahusdoaimmahaga máksit Gálggojávrri siidda boazodoalliid gearregastingoluid, muhto hilgut Neakkela bálgosa ja boazoisit Hannu Ranta gearregastingoluid máksingáibádusaid.

Hálddahusriekti hilggui váidiid gáibádusaid njálmmálaš gullama ordnemis.

Varrasamosat: Sápmi

Váldoođđasat

Varrasamosat

Muualla Yle.fi:ssä