Säämi |

Niäljád já majemuš Hitruu-mainâskirje valmâštum, Jiäráskittee-kirjeh pargo vyelni

Teija Linnanmäki lii čáállám nelji mainâskirje anarâškielân. Kuuvijd lii sárgum Riitta Ahonen.

Video: Teija Linnanmäki
Teija Linnanmäki rähtim Hitruu oppâkirje

Hitruu-kirjeráiđu lii vuosmuš oppâkirjeráiđu, mii lii valmâštum anarâškielân. Teija Linnanmäki ii čáállám nelji luuhâmkirje vuáđuškovlâ 3–6-luokkâlijd. Kuuvijd kiirján lii sárgum Riitta Ahonen.

Oppâkirjij rähtim juátkoo täst ovdâskulâi-uv, pajetääsi uáppeid.

– Nommâ lii jo vaalmâš, Jiäráskittee, iätá Linnanmäki.

Kirjeh láá oppâkirjen uáivildum mainâskirjeh

Puoh aalgij love ihheed talle, ko aalgij anarâškielâ tievâsmittenškovliittâs. Talle meid Teija Linnanmäki aalgij opâttâllâđ jieijâs madârvaanhimij kielâ já huámmášij, et oppâkirjeh, luuhâmkirjeh váiluh.

– Jo talle ko lijjim opâttâllâm kielâ, te ettim, et halidiččim čäälliđ kirje muu pärnivuođâ mainâsin, muštâl Linnanmäki.

Mainâseh muštâleh čallee jieijâs elimist já toh láá olmânáál tábáhtum ellee elimist. Jyehi kirje mainâseh čuávuh iveaaigijd. Älgih tast ko škovlâ álgá porgemáánust já noheh Jonsahpiäiván. Čuávuváá kirje mainâseh, pajetääsi uáppei mainâskirje mainâseh juátkojeh Hirtuu-kirje mainâsijn, mut toh láá váháš ereslágáneh, uáivildum stuárráb lohheid.

– Ááigum čäälliđ jiäráskittee mainâsijd, tast šadda anarâšâi Harry Potter, povvust Linnanmäki.

Luholâš oppâkirje čällee

Teija Linnanmäki lii jieš máttáátteijee já ooinij et oppâmateriaalin lii tárbu. Hitruu-kirjeráiđu lii vuosmuš mii lii rahtum njuolgiš anarâškielân, ij jurgâlum. Lai-uv jo äigi rähtiđ jieijâs kielâlii kirje.

– Jiem mun tiättám, et mun tom rááhtám, mut lâm kal nuuvt luholâš, et mun lâm uážžum taam pargo porgâđ, illood Linnanmäki.

Sun tuálá tergâdin, et anarâšâi argâpeeivi pargoh já tooimah puátih kuusnii pajas. Kirjeh láá almostum suullân nuuvt et kyevti ivveest almostuvá ohtâ kirje. Puoh mainâsij vuáđđun lii tuotâvuotâ.

– Mun halijdim mainâsijd anarâšâi ärbivuáválij taavijn já pargoin, moh láá, iätá Linnanmäki.

Tai Hitruu-kirjij tyehin lii pargojuávkku, kuus čällee, Teija Linnanmäki lasseen kullojeh Miina Seurujärvi, Yrjö Mustajá Petter Morottaja. Sämitige oppâmateriaaltoimâttâh almostit taid kiirjijd.

oppikirjat
Motomeh anarâškielâliih oppâ- já hárjuttâskirjeh moh láá tai iivijn almostum. Govva: Anja Kaarret / Yle

Oppâkirjijd ain stuorrâ tárbu

Anarâškielân almottuvvojeh ubâ ääigi oppâkirjeh, mut tárbu lii ain styeres. Niina Siltala lii eidu algâttâm Avveel vuáđuškoovlâst máttáátteijen. Sun ooppâd anarâškielâ viereskiellân vuosmuu luokkalijn, oovcád luokkalijd.

– Vuosmuu luokkalijn kiävtám aabis pargokirje mottoomverd, Hitruu-kirje lii kiävtust nube, kuálmád já niäljád luokkalijn já talle oovcád luokkalijn ij lah kirje ollágin, muštâl Siltala.

Avveel škoovlâst loheh anarâškielâ viereskiellân taan ive suullân muáddilov uápped. Káávcád luokkaast ij lah ohtâgin uáppee, mut oovcád luokâ uáppeid kalga máttáátteijee jieš rähtiđ oppâmateriaal.

– Kielâkyeimi-kirje lii uáivildum luvâttuv uáppeid, te jiem haalijd tom kevttiđ, ko tom vuáru puátá luvâttuvâst. Mij porgâp jiejah toid, moh láá oppâvuáváámist meridum. Luuhâp teevstâid, čäällip jieš já sárnup, iätá Siltala.

Kuldâl Niina Siltala sahhiittâllâm täst.

Tääl anarâškielân láá almostuumin tuše jurgâlum kirjeh já pargokirjeh

Säämitigge oppâmateriaalčällee Hannu Kangasniemi muštâl, et biologiakirje lii tääl čuávuvâžžân puátimin, mut tot lii jurgâlus.

– Tääl láá pargo vyelni taid jo almostum kirjijd hárjuttâskirjeh. Virkkuuvääri 2, pargokirje ij lah val eidu vaalmâš, mut valmâštuumin, loppeed Kangasniemi.

Hannu Kangasniemi
Sämitigge oppâmateriaalčällee Hannu Kangasniemi. Govva: Aletta Lakkala / Yle

Kielâkyeimi lii luvâttuv já áámmátškovlâ eenikielâ lohheid, Virkkuuvääri lii vuáđuškoovlâ eenikielâláid já Hitruu viereskielâ lohheid.

Kuldâl Teija Linnanmäki sahhiittâllâm täst.

Varrasamosat: Säämi

Váldoođđasat

Varrasamosat

Muualla Yle.fi:ssä