Sápmi

Niillas-Jovnna Länsman: "Jiem lah kal ostâm hárjuttâllâđ ollágin" – Luuvâ kost láá taan keesi čäcikross-kištoh já maht kištottelleeh láá ráhtádâttâm kištoid!

Pasi Leivo, Olli Magga ja Niillas Jovnna Länsman.
Ive 2017 Niillas-Jovnna Länsman poođij kuálmádin Hetta čäcikross-kištoin. Taan keesi kištoid ij peesâ čuávvuđ Hettast, ko koronatile keežild iä ornii kištoid. Govva: Minna Näkkäläjärvi / Yle

Taan keesi čäcikross-kištoid piäsá čuávvuđ Suáđikylást, Pellost já Tahkoost.

Kuovdâkiäinulâš Niillas-Jovnna Länsman áigu vyeijiđ čäcikross-kištoin sehe Suomâst, ete Taažâst. Sun juurdij, ete taan ive iä liččii kištoh ollágin já tondiet ij lah ostâm valmâštâllâđ puoh aašijd.

– Jiem lah kal ostâm hárjuttâllâđ ollágin, jiemge lah kiälháingin aaibâs kiergânâm.

– Must lâi vuávám huksiđ uđđâ kiälhá, mutâ jiem porgâm tom ko jurdim, ete iä šodâččii kištoh.

Tääl sun áigu uásálistiđ puáris kiälháin kištoid já huksiđ uđđâ kiälhá eskân puáttee ive kištoid.

Sun lii kuittâg hárjánâm toos et ain šadda váhá huáppu.

– Jyehi ihe siämmáš hommá. Tot lii pyeri jis peivi ovdil kištoid lii kiergânâm, mutâ kal tot ain mana pyereest!

Kuldâl maid Niillas-Jovnna Länsman muštâl čäcikross-kištoin.

Pesonen: Aaibâs suotâs, et ij lah nuuvt hoppuus keesi

Avveellâš Aki Pesonen lii vuájám kuhháá čäcikross. Suu mielâst ij lah väivi, veikkâ taan keesi iä lekken nuuvt ennuv kištoh.

– Liihân tot váhá ereslágán, mutâ mahtnii aaibâs suotâs, et ij lah nuuvt hoppuus keesi. Lii asto porgâđ maidnii muide-uv.

Sun še juurdij, ete taan ive iä liččii kištoh ollágin já meid sunjin šoodâi huáppu valmâštâllâđ uđđâ kiälhá kištoi várás.

Inariviikot
Jis lii mielâ uáiniđ maht kiälháh pisottâlleh čäsuáivist, kalga vyelgiđ Suáđikylán, Pellon teikkâ Tahkon. Govva: Inariviikot / Anárvahkut

Suáđikylást uárnejeh čäcikross-kišto

Suáđikylá čäcikross-kišto uárnejeijee Marika Martikainen muštâl, ete sij meridii orniđ kišto taan ive tondiet ko ulmuuh lijjii ennuv koijâdâm já tuáivum ete sij uárnejeh kišto.

– Taan ive kišto lii oovtâkiärdánub. Kišto ij kovvejuu television ige lah mihheen stuárráábijd koskâpuddâohjelmijd.

Suáđikylá čäcikross-kištoid puáhtá čuávvuđ Nilimella riddoost 1.8.2020. Lasetiäđuid kaavnah täst.

"Ličij tot lamaš surgâd jis ij liččii ohtâgin kišto lamaš"

Jarmo Näkkäläjärvi muštâl, ete sij iä ornii Iänuduv kuávlust čäcikross-kišto taan keesi. Näkkäläjärvi muštâl, ete ulmuuh iä lah imâštâllâm mondiet sij iä ornii kišto taan ive. Sun osko, et ulmuuh iberdeh mondiet äšši lii náávt.

Sun illood ko taan ive láá kuittâg muáddi čäcikross-kišto.

– Pyerihân tot lii, ete taan ive lii kuittâg mottoom tábáhtus. Ličij tot lamaš surgâd jis ij liččii ohtâgin kišto lamaš.

Meid Avveel čäcikross-kištoi uárnejeijee lii almottâm, ete sij iä ornii kišto taan ive.

Varrasamosat

Muualla Yle.fi:ssä