Sápmi |

Niillas Holmberg: Mu niehku ollašuvai

Dáiddar Nillas Holmberg muitala, ahte okta su nieguin lea ollašuvvan, go son beasai almmustahttit guovttegielat diktagirjji. Girji The Way Back sisttisdoalláge áibbas ođđa divttaid.

Niillas Holmberg
Govva: Tarmo Lehtosalo

Dáiddar Niillas Holmberg muitala, ahte okta su nieguin ollašuvai, go son almmustahtii davvisámegiel–eaŋgasgiel diktagirjji The Way Back.

– Munnje lea stuorra illun muitalit, ahte mu niehku almmustahttit guovttegielat diktagirjji davvisáme- ja eaŋgasgillii lea šaddan duohtan. Girjji namma lea The Way Back, Holmberg čállá Facebook-siiddustis.

"Hárvenaš vejolašvuohta"

Sámegielat girjjalašvuođa almmustuvvan eaŋgasgillii ii leat nu menddo dábálaš.

– Lean dieđusge ilus maiddái iežan dihtii, muhto ávvudan eandalit dán hárvenaš vejolašvuođa eaŋgasgiela hálliide guovllastit dálá sámegirjjálašvuođa máilbmái, Holmberg čállá.

Riikkaidgaskasaš diktafestivalain oaidnán dárbbu eaŋgasgiel jorgalusaide

Niillas Holmberg muitala NRK Sámi jearahallamis, ahte son lea johtán olu riikkaidgaskasaš diktafestivalain ja doppe lea oaidnán dárbbu eaŋgasgiel jorgalusaide iežas divttaide.

Holmberg jáhkká ollet viidábut máilbmái iežas divttaiguin dál go lea almmuhan daid maid eaŋgasgillii.

– Dál šaddá olu álkibun johttit máilmmi girjjalašvuođa dáhpáhusain, go dál mus lea girji maid geiget ja čájehit, dat gal veahkeha.

Áibbas ođđa divttat

Diktagirji The Way Back sisttisdoallá áibbas ođđa divttaid.

– Girjjis leat ođđa divttat eaige dat leat almmuhuvvon mu ovddit diktačoakkáldagain. Divttaid leat jorgalan eaŋgasgillii mu lassin Lisa Jokivirta Kanadas ja Clive Boutle Stuorra-Británnias, Holmberg muitala.

Lágádusa siidduin muitaluvvo, ahte girjji divttain Holmberg muitala earret eará globálasišuvnna sápmelaččaide dagahan váttisvuođain, čállá Lapin Kansa Ságat.

Dasa lassin Holmberg guorahallá buddhisttalaš filosofiija ja dološ sámi luondduoskku ovttaláganvuođaid.

Girjji sáhttá diŋgot interneahtas.

Vuosttas eamiálbmogiid diktafestivála

Boahtte mánu loahpas vuolgá Niillas Holmberg Atlantai USA:ii lohkat divttaid, giđđat galgá Eŋglándii ja čakčat fas Mexicoi, go doppe lágiduvvo vuosttaš riikkaidgaskasaš eamiálbmogiid diktafestivála.

Niillas Holmberg lea maid rahpan ođđa neahttasiiddu niillas.com.

Loga lasi NRK Sámi neahttasiidduin: Holmberg almmuha diktagirjji eŋgelasgillii  

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä