Sápmi |

Niillas Holmberga diktagirji lea evttohassan Davviriikkaid ráđi girjjálašvuođa bálkkášupmái

Holmberga diktagirji Juolgevuođđu almmustuvai guokte jagi dassá davvisámegillii ja diibmá suomagillii.

Niillas Holmberg
Niillas Holmberga Juolgevuođđu-diktačoakkáldat almmustuvvá farggabáliid maiddái dárogillii. Govva: Linnea Rasmus / Yle

Sámedáiddár Niillas Holmberga diktagirji Juolgevuođđu (DAT, 2018) lea evttohassan Davviriikkaid ráđi girjjálašvuođa bálkkášumi oažžun. Girji almmustuvai diibmá maid suomagillii.

Ráđđi ákkastallá evttohasvuođa earret eará dainna, ahte diktagirjji govahusat ja dárkilit válljejuvvon sánit huksejit estetihka, mii goittotge guođđá vejolašvuođa lohkkái iežas jurddašeapmái ja iežas dihtui luonddusuodjaleamis. Diktagirji maid hástala lohkki jurddašit bálgáid, maid olbmuid juolgevuođut johtit.

– Aiddo julggiiguin mii guoskat eatnama, man mii fertet suodjalit, čuožžu Davviriikkaid ráđi ákkain.

Davviriikkaid ráđđi muitala girjji birra maiddái dan, ahte divttaid govvadáidagis leat sánit, mat muittuhit olbmuid eatnama váimmu guldaleamis. Girjji govahusain ja ivnniid geavaheamis šaddá dramaturgalaš ollisvuohta, man áddemii gal gollá áigi.

– Girji addá jiena iešmearridanrievtti váillaheapmái ja čađaheapmái, ráđis govvidit.

Bálkkášupmi juhkkojuvvo golggotmánus

Oktiibuot 13 davviriikalaš romána ja dikta- ja noveallačoakkáldaga leat evttohassan dán jagáš bálkkášupmái. Davviriikkaid ráđđi lea juohkán girjjálašvuođa bálkkášumi jagi 1962 rájes. Bálkkášumi ulbmilin lea lasihit beroštumi Davviriikkaid kultuvrralaš oktavuhtii ja addit dovddastusa áidnalunddot dáiddalaš olahusain.

Vuoitái geigejuvvo "Nordlys" -bázzi ja dasa lassin 350 000 Danmárkku ruvnnu (sullii 47 000 euro) ruđalaš bálkkášupmi.

Bálkkášumi oažžu almmustahttojuvvo Reykjavikis, Islánddas golggotmánu 27. beaivve.

Buot evttohasat gávdnojit dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä