Sápmi |

Niillas Holmbergii Sámiráđi girjjálašvuođabálkkašupmi

Sámiráđđi lea mearridan ahte Niillas Holmberg (24) oažžu dán jagáš girjjálašvuođabálkkašumi iežas diktagirjjis "Amas amas amasmuvvat".

Niillas Holmberg
Niillas Holmberg lohkame divttaidis Riddu Riđđu -festiválas jagis 2013. Govva: Aslak Paltto / Yle Sápmi

Sámiráđi jagi 2014 girjjálašvuođabálkkašumi oažžu Niillas Holmberg diktagirjjis "Amas amas amasmuvvat". Vuoiti válljen árvvoštallanlávdegoddi rámiidii earenoamážit diktagirjji rikkis giela.

Lávdegotti mielas girji lea oppalohkái buorre ja dievaslaš čáppagirjjálašvuođaduodji, ja sin mielas girječálli ánssáša rámi dan ovddas.

Árvvoštallanlávdegoddi cealká Holmberg diktagirjjis earret eará ná:

"Niillas Holmberga "Amas amas amasmuvvat"-diktagirjjis leat čáppa divttat, mat lea čállon hui rikkes gielain. Dás nuorra diktačálli ovdanbuktá iežas eallinvásáhusaid erenoamáš, ođđaáigásaš, muhto vuogas diktahámis, masa olbmot eai soaitte leat nu bures hárjánan. Divttat girjjis leat muhtumin dego sierra máinnas, mii rahpasa dađistaga go olmmoš lohká dan. Divttat eahpitkeahttá guoskkahit olbmo váimmu, jos olmmoš lohká daid dárkilit. Girjjis leat oktageardánis ja erenoamáš govat, mat heivejit bures divttaide ja lasihit dovdduid. Nu girji lea oppalohkái buorre ja dievaslaš čáppagirjjálašvuođaduodji, ja girječálli ánssáša rámi dan ovddas."

Bálkkašumi geigendilálašvuohta lea Kárášjogas skábmamánu loahpas.

Niillas Holmberg diktagirji lea ilbman jagis 2013. Girjji lea goasttidan DAT. Govaid girjái lea sárgon Antti Väre, gii lea Tamperees eret.

"Amas amas amasmuvvat" lea Niillas Holmberg nubbi diktagirji. Vuosttas diktagirji "Dego livččen oaidnán iežan" almmustuvai 2009 loahpas.

Varrasamosat: Sápmi

Váldoođđasat

Varrasamosat

Muualla Yle.fi:ssä