Sápmi |

Niko Valkeapää ja Iŋgá-Máret Gaup-Juuso leaba Romssa fylkkajuoigit – “Dát lea niehkobargu”

Romssa fylkkasuohkan bálkáha vuosttas geardde guokte fylkkajuoigi čalmmustahttit luođi.

Niko Valkeapää ja Iŋgá Máret Gaup-Juuso
Niko Valkeapää ja Iŋgá-Máret Gaup-Juuso vuordiba juo ođđa barggu hástalusaid. Govva: Mariela Idivuoma / NRK Sápmi

Ođđa fylkkajuoigiguoktá Iŋgá-Máret Gaup-Juuso ja Niko Valkeapää leaba rámis go beassaba bálkká ovddas ovddidit sámi árbevirolaš musihka ja luođi.

– Dát lea dieđusge hástaleaddji, muhto maiddái somás bargu. Dat lea niehkobargu álgit luođi ovddidit, dadjá Iŋgá-Máret Gaup Juuso.

Fylkkajuoigi virgái ledje ohcan oktiibuot 13 musihkkára. Suoma beale Sámis fylkkajuoigin ledje ohcan Ulla Pirttijärvi-Länsman, Iŋgá-Máret Gaup-Juuso ja Niko Valkeapää.

Ohcciid joavkkus ledje maiddái eará dovddus juoigit ja neavttárat, earret eará Johan Anders Bær, Mikkel Gaup ja Sara Margrethe Oskal.

Sihke Gaup-Juuso ja Valkeapää atniba stuorra gudnin, go válljejuvvuiga fylkkajuoigin buot dovddus sámemusihkkáriid gaskkas.

– Dalle go bođii ohcanláhkái dat bargu, mun jurddašin ahte mun ozan somá dihte. Ja go de bođii diehtu, ahte moai letne válljejuvvon, de dat gal lei illudahtti ođas. Mun in lean vuordán dan, čilge Gaup-Juuso.

Čalmmustahttiba luođi ja hástaleaba juoigat

Romssa fylkkajuoigi bargun lea johttit ja doalvut luođi smávit báikkiide. Ortnet álggahuvvui 1990-logu álggus ja vuosttaš fylkkajuoigi lei Inga Juuso. Ulla Pirttijärvi-Länsman doaimmai fylkkajuoigin jagis 2016. Jagi 2017 rájes fylkkajuoigin lea doaibman Marja Mortensson.

Iŋgá-Máret Gaup-Juuso ja Niko Valkeapää vuordiba juo ođđa barggu hástalusaid. Soai oaidniba, ahte fylkkajuoigis lea stuorra mearkkašupmi Romssas ja maŋŋelis maiddái Finnmárkkus, go gielddat ovttastahttojuvvojit. Fylkkajuoigi sáhttá doaimmaidis bokte oidnot nu máŋgga lávddis.

– Árvideames moai galge oidnot sierra dilálašvuođain, mánáidgárddiin ja skuvllain. Bargogieddi boahtá leat viiddis, namuha Gaup-Juuso.

Niko Valkeapää goit deattuha, ahte bargu lea hui dehálaš, go dainna čalmmustahttet juoigama ja hásttuhit olbmuid juoigat.

– Dat lea min árbevierru, man galgá várjalit ja ovddidit, oaivvilda Valkeapää.

Romssa fylkkasuohkana bealis leat maid rámis, go guokte juoigi álgiba ovddidit sámemusihka.

– Mii leat nu mearehis čeavlái go sihke Niko ja Iŋgá-Máret leaba dál min bargoveagas. Mii dáhkidit, ahte geahččit ja guldaleaddjit besset illudit boahtte áiggis, dadjá Sigrid Ina Simonsen Romssa fylkkaráđi kultuvra ja ealáhusossodagas preassadieđáhusas.

Guldal Niko Valkeapää ja Ingá Máret Gaup-Juuso jearahallama Buorre iđit Sápmi -sáddagis Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä