Säämi

Nipso jienâčaittâleijee perruinis vuárdá, et anarâškielâlâš muumih älgih vuossaargâ – keejâ smakkâpittáá

Marko Tervaniemi
Marko Tervaniemi jienâčaittâl anarâškielâlâš muumijn Nipso. Govva: Vesa Toppari / Yle

Puáttee vuossaargâ puávtáh kuullâđ aanaarlâš Marko Tervaniemi jienâ Nipso roolist.

Puáttee oho rääjist Nipso já eres Muumileevi ässeeh še sárnuh anarâškielâ. Vuossaargâ 7.9. tijme 8.25 kannat lehâstiđ televisio Yle TV2 -kanava, jis lii mielâ uáiniđ anarâškielâlâš muumijd.

Aanaarlâš Marko Tervaniemi lii Muumileehi-rááiđust Nipso roolist. Sun ij lah val uáinám vaalmâš rááiđuid, tuše tom, mii dubbaamist tábáhtuvái. Sun vuárdá-uv jiärástum mieláin tom, maggaar suu roolist šoodâi.

– Liihân tot váhá jiäráskittee vyerdiđ. Jiem tieđe tuostâm-uv keččâđ tom ollágin. Jiem lah kuullâm jieččân jienâ ennuv, Tervaniemi povvust.

Nipso ij lah mihheen táválijd tiiŋgâid. Sun lii váhá äänhis ja joba skelmâ, mutâ kuittâg meid váhá ärgi. Sun lii tego adoptiopärnin muumiperrust, já sun meid uáli jo távjá ijâstâl Muumitáálust. Nipso veerdi lii Háisoo, kiäin sun ain motomin juánnuš. Tervaniemi mielâst sun ij kuittâg muštoot Nipso, veikkâ taggaar rooli čaittâlij-uv.

Tervaniemi jieš ij liččii veltihánnáá ubâ hoksám älgiđ jienâčaittâleijen.

Marko Tervaniemi
Marko Tervaniemi lii oppâm anarâškielâ pyerebeht rävisolmožin já tääl tot lii perruu päikkikielâ. Elias Tervaniemi mielâst lii hävskis hommá, ko eeči čaittâl Nipso. Govva: Kaisa Aikio / Yle

– Iärráseh váhá movtijdiittii muu moonnâđ adeliđ jienâčáittus. Jiem kale jieš hoksám aalgâst, et vuálgáččim tohon.

Dubbampaargon Tervaniemi kale lijkkui.

– Tot lâi aaibâs mielâkiddiivâš hommá, koolgâi váhá ereslágán jienâ rähtiđ, ko tot moin mun jieš sárnum. Já huikkem-já kiljomhomáid ferttejim váhá oppâđ.

Video: Tiuhti ja Viuhti raahaavat perässään itseään suurempaa matkalaukkua.
Taa lii anarâškielâlâš Muumileevi smakkâpittááš. Video: Gutsy Animations

Moonnâm kiiđâ poođij keččâmnáál tavesämikielâlâš Muumileehi, mii čokkij ennuv keččeid. Aalgâ vaigâdvuođâin já epivisesvuođâin huolâhánnáá tääl muumih sárnuh meid anarâškielâ. Yle TV2 -kanava lasseen anarâškielâlâš Muumileevi puáhtá keččâđ meid Yle Areenast kuittâg vittâ ive täst ovdâskulij.

Marko Tervaniemi lasseen anarâškielâlâš muumijn jienâčaittâleh Mikkâl Morottaja (Muumistáálu), Heli Huovinen (Nisonieidâ), Anna Morottaja (Muumienni), Aimo Aikio (Muumieeči), Auri Ahola (Uccâ Myy), Tomi Koivunen (Noskemudágâš), Veikko Aikio (Tijdár), Suvi King (Vilijoŋka), Sari Sarre (Vimmee), Niina Aikio-Siltala (Timmee), Marke Laaksonen (Mymmel), Tuomo Huusko (Hemulâš) já Irján Musta (Piisamrottá).

Muumileevi nube paje vuossâmuu uásist Muumistáálu lii ohtâ ive puárásub já fiŋgo iäljárávt luovâs Muumieeni já Muumieeji torvoost. Taat toovvât draama já váimumurrâš ubâ perrui, mutâ vyerdimist láá meid povvustem já jiäráskittee fiäráneh.

Uđđâ persovnin paajeest puátih eereeb iärán Timmee ja Vimmee, nuorattâlâškielâg oosijn ovdâmerkkân Hiärrá Virkkuu, Nyyti, sehe Kyelipivdee.

Ubâ peerâ vuárdá vuossaargâ

Marko Tervaniemi peerâ vuárdá moovtâ uáiniđ eejis muumiroolist. Tot lii miinii eromâš, maid sij láá jo vuárdám.

– Na tot lii jiäráskittee, kal mun lam vuárdám, et peesâm tom uáiniđ. Lam vuárdám, et puátá mottoom mainâsráiđu anarâškielân já tot lii hitruu párnái tááhust. Muumih láá tagareh, et jieš-uv lijkkuum taid keččâđ, muštâl perruu enni Henna Tervaniemi.

Nipso rooli lâi olâttâs sunjin.

– Tot lâi váhá olâttâs munjin, kalehân tot lii hitruu.

Já amahân suottâsumos tot lii párnáid. Sii eeči lii tv-roolist já sárnu val sii eenikielâ, anarâškielâ.

Henna Tervaniemi
Henna Tervaniemi illood ko muumih šaddeh anarâškielân. Párnái lasseen meid enni lijkkoo muumijd. Govva: Kaisa Aikio / Yle

– Hävskis hommá, ko eeči lii Nipso, mut ij kal lah muu mielâst pyeri hommá, ko tot lii párnáiohjelm, muštâl Tervaniemi perruu 11-ihásâš kandâ Elias Tervaniemi.

Jis puátteevuođâst lii tárbu dubbađ anarâškielân, Marko Tervaniemi sáttá leđe fáárust meid talle.

– Kale vuálgáččim uđđâsist tääl ko tiätá jo maggaar pargo tast lii.

Nube paje vuossâmuid oosijd mij uáinip tääl anarâškielân já majemuuh uásih puátih nuorttâlâškielân maŋeláá keččâmnáál.

Tivvum 4.9. tijme 9.47 Käidee noomâ Tijdárân.

Tivvum 4.9. tijme 11.25: Muumijd puáhtá uáiniđ YLE TV2 -kanavast, ij Yle TV1 -kanavast nuuvt maht vistig muštâlijm.

Varrasamosat

Muualla Yle.fi:ssä