Säämi

Nisonij sajâdah, mađhâšem, pyereestvaijeem já kielâpálgáh – eereeb iärrás tágáreh ääših kieđâvuššojeh Latteanarâšah-podcastist

latteanarâšah
Latteanarâšah ađai Niina Aikio-Siltala já Neeta Jääskö čaalijn historjákiirjijd uđđâsist já algâttáin vuossâmuu anarâškielâlâš podcast. Govva: Tiina Aikio

Latteanarâšah-podcast kuldâleijeeh láá sehe Säämist ete mäddin.

Latteanarâšah-savâstâllâmohjelm ađai podcast keksejii Vile Máárjá Heeihâ Aanti Niina, Niina Aikio-SiltalaPost-Ooni Ááimu Neeta, Neeta Jääskö. Vuossâmuš uási almostui syeinimáánu loopâst já taas räi láá almostum vittâ uási jyehi nube ohhoost.

Juurdâ podcastin šoodâi anarâškielâlâš mediai vänivuođâ tiet.

Taan räi Latteanarâšah-podcastist lii lamaš saahâ nisonij sajaduvvâst sämisiärvusist, maađhâšmist, pyereestvajemist já tast, kiäh taah nissoon kyevtis lává já maht suoi lává oppâm sämikielâ.

Nissoon kyevtis lává čáállám pajas liston fáádáid, moin suoi halijdává savâstâllâđ podcastist. Liston lii meid máhđulâš lasettiđ fáádáid jis šaddeh uđđâ jurduuh.

Nubbe laiđiisteijein päddee Säämist, nubbe Oulust

Niina Aikio-Siltala päddee jaksoid päihistis Kiävájäävrist. Suu paargon kulloo meid podcast čuoppâm já luođim nettin. Sun illood podcast rähtimist.

– Na tot kal lii lamaš hitruu. Muu mielâst tot kovvee pyeremustáá tom.

Neeta Jääskö juuleest jieijâs late Oulust. Sun lâi tot, kote iävtuttij podcast nommân Latteanarâšah.

– Na tothân lâi váddásumos hommá utkâđ noomâ taan podcastan ja muoi suogârdâláim. Eehid jo lâi, te mun tastoo iävtuttim, et latteanarâšah já tothân heivij Niinan, muštâl Jääskö.

Aalgâ teknisijn vädisvuođâin huolâhánnáá, tääl teknisâš-uv peeli tuáimá pyereest. Kuohtuuh päddejeh jieijâs jienâ tiäturân já Jääskö vuolgât jieijâs uási Aikio-Siltalan talle ko suoi lává savâstâllâm tuárvi. Savâstâllâm tábáhtuvá Skype teikkâ mottoom eres káidusohtâvuođâ peht.

Ovdil paddim algâttem suoi keččâv val čoođâ kietâčalluu já ruŋgo ovdil ko paddiiškyettiv. Sunnuu kietâčaalâ ij lah hirmâd tärkkilis.

Latteanarâšah-podcast kávnoo Soundcloudist, mii väljejui maaŋgâ eres applikaatio juávhust tondiet, ko tom lii älkkee kevttiđ. Meid Instagramist puáhtá kavnâđ Latteanarâšâid.

– Tobbeen uážu čuávvuđ. Tobbeen lii viehâ uccáá mihheen, mutâ mun jiem lah lamaš nuuvt hirmâd aktiivlâš peivid muide toho, iätá Jääskö.

Puátteevuođâst podcastist sättih leđe kyesih

Neeta Jääsköst oro, et ulmuuh kale kuldâleh sunnuu podcast.

– Kale must oro, et anarâškielâ sárnooh já eres uv sämikielâliih láá viehâ pyereest kavnâm. Mun lam kuullâm, et kiinii mäddin lâi kuldâlškuáttám vâi uáppá já hárján kuldâliđ anarâškielâ.

Puoh macâttâs lii taas räi lamaš positiivlâš. Aikio-Siltala muštâl, et viehâ uccáá lii kuittâg puáttám macâttâs.

– Puoh hitruumus lâi ko käävpist oinim oovtâ nissoon, kii vistig tiervâttij muu já vaazij lappâd. Talle váhá äigi keejist poođij maasâd já eeđâi: ai nuuvt mun kolgim ettâđ, et iháná podcast, já te vuolgij meddâl, Aikio-Siltala povvust.

Aikio-Siltala muštâl, et macâttâs, jurduid já ideaid puáhtá muštâliđ Facebookist, Instagramist teikkâ veikkâ käävpist jis sáttoo teivâdiđ podcast rähteid tobbeen. Puátteevuođâst podcastist sättih leđe kyesih-uv.

– Kyessihommá lii lamaš jurduu tääsist. Ko muoi leen kukken nubijdân, te keevâtlâš já teknisâš uási taha mottoom verd pargo, jis láá kyesih.

Niina Aikio-Siltala ja Neeta Jääskö
Juurdâ anarâškielâlâš podcastist šoodâi jo Sämitige vaaljâi ääigi, ko kuohtuuh láin iävtukkâssân vaaljâin. Govva: Xia Torikka / Yle

Taan räi podcast lii rahtum Sämitige kulttuurlävdikode juovlâskeŋkkâruđâiguin. Išeruuđâi uuccâmäigi álgá forgâpalij, mutâ Latteanarâšâi jotkâ ij lah val čielgâs.

– Ij lah lamaš saahâ val taan nube pyevtittempaajeest, te sätteen hundâruššâđ tom.

Suoi lává savâstâllâm, et podcastist šodâččii love jaksod. Aikio-Siltala mield tot ij lah nuuvt kiäđgán čallum, et kolgâččij eidu love rähtiđ.

Podcast laiđiisteijeeh halijdeh kuullâđ meid iärásij kielâpálgáid

Kyevti oho kooskâin almostuvá uđđâ podcast uási, ijge kuássin pyevti muuneeld tiettiđ, mon kuhes jaksost piäsá navdâšiđ.

– Munnust ij lah tiätu meeri, mon kuheh toh kalgeh leđe, motomin puátih uánihuboh já motomin kuhebeh, muštâl Neeta Jääskö.

Sunnuu podcast uđđâsumos uási nommâ lii Stuorrâ kielâepisodi part 1 já tot aalgât taggaar kuhheeb kielârááiđu sunnuu podcastist, mast lii saahâ sämikielâst.

– Muoi algâttáim tai jieččân kielâpálgái kuorâmáin, mutâ aainâs halijdep kuullâđ magareh kielâpálgáh kuldâleijein láá lamaš. Maht sij láá šoddâm anarâškielâ sárnon? Ličij hitruu kuullâđ, iätá Jääskö.

Kuldâl maid Latteanarâšah ađai Niina Aikio-Siltala já Neeta Jääskö muštâlává sunnuu podcastist. Jietna: Anja Kaarret / Yle

Varrasamosat

Muualla Yle.fi:ssä