Säämi

Nissoon kyevtis lává kyehti mánuppaje raccastâm hiäppušáin Hankost Njuárgámân: "Kalga leđe miinii mon muštâččiđ puárisin" – keejâ video

Ritva Lampinen
Ritva Lampinen mield taat lii vuossâmuš tohe ko kiinii raccast Hankost Njuárgámân räi. Govva: Anja Kaarret / Yle

Nissoon kyevtis raccastává suullân 20–60 kilomeetter peeivist.

Jyehi keesi ulmuuh movtáskeh jotteeđ Suomâ keejist nuubán. Taan tove hyelhih já ráánjáh Ritva LampinenPinja Mäntynen meridáin raccastiđ Hankost Njuárgámân já suoi lává-uv jo kiergânâm raccastiđ tavemuu Sáámán.

Suoi aassâv Jämsänkoskeest já lává maaŋgâid luuvijd iivijd porgâm hiäppušijguin. Lampisen šoodâi juurdâ raccastiđ Hankost Njuárgámân já Mäntynen vuolgij skipárin.

– Kalgahân leđe miinii mon muštâččiđ puárisin, povvust Lampinen.

Video: Ritva Lampinen já Pinja Mäntynen meridáin raccastiđ Hankost Njuárgámân.
Ritva Lampinen já Pinja Mäntynen meridáin raccastiđ Hankost Njuárgámân. Video: Anja Kaarret / Yle

Koskâmiärálâš liähtu lii vittâ kilomeetter tiijmest

Nissoon kyevtis raccastává suullân 20-60 kilomeetter peeivist. Ehidist talle huolâttâsjuávhuh hoittájeh hiäppušijd. Tääl suoi lává raccastam jo suullân kyehti mánuppaje.

– Muoi vuolgijm 18. peeivi syeinimáánu já munnust lii mätki moonnâm uáli jo pyereest. Leen kale kijttevááh já suotâs ulmuiguin leen teivâm, iätá Ritva Lampinen.

Ritva Lampinen
Ritva Lampinen já Rusliina-hiävuš. Govva: Anja Kaarret / Yle

Lampinen muštâl, et sun lii ovdil-uv raccastâm kuhes maađhijd, mutâ suu mield taat lii vuossâmuš tohe ko kiinii raccast Hankost Njuárgámân räi.

Koskâmiärálâš liähtu sunnust lii tuše vittâ kilomeetter tiijmest, tast ko hiäppušeh ain motomin pisáneh já poreh sino, muštâl Lampinen.

Suoi lává iänáš raccastâm mecciluodâi já pálgái mield. Hiäppušeh iä poolâ autoin, mutâ ferttee leđe várugâs ain automaađij alda, ko hiäppušeh sättih suorgâniđ mottoom eres tiiŋgâ já ruottâđ auto vuálá.

Pargoid-uv kalga porgâđ já tondiet Pinja Mäntynen ij lah puáhtám leđe ubâ määđhi fáárust, mutâ illood čuuvtij ko uážu leđe loppâmääđhi fáárust.

– Pargoh hettejeh puđâldâsâid, sun muštâl.

Pinja Mäntynen
Pinja Mäntynen já Mirakles-hiävuš Govva: Anja Kaarret / Yle

Sun ij lah kuássin raccastâm náávt kuhes määđhi. Hiäppuš seelgist já kuhes maađhijd raccastdijnis sun asta smiettâđ puohlágánijd aašijd.

– Kale oskom et tagarijd oholoopâ pištee raccastemreeisuid pargeen puátteevuođâst-uv, Mäntynen juurdâš.

Poccuu tyelji lii pyeremus saatuultuopâ

Ohtâ vädisvuotâ šoodâi määđhi ääigi. Ritva Lampinen muštâl, et ij-luándulâš amnâsijn rahtum saatuultuoppuuh tovâttii hiäppušáid vädisvuođâid siälgán ko áimu ij molsâšuu taggaar materiaal čoođâ. Savzâduv-uv sun keččâlij, mut tot lâi vuot meendu asettem.

Čuávdus kuittâg kavnui määđhi ääigi puásuitáálust.

– Poccui tyeljih láá lamaš pyereh, toh iä lah tovâttâm vädisvuođâid hiäppušij siälgán, muštâl Lampinen.

Sunnuu facebook sijđost kávnojeh eenâb koveh määđhist.

Varrasamosat

Muualla Yle.fi:ssä