Sápmi

Njealját Skábmagovat-filbmaávžžuhus: rahpandoalut ja Chihiro ilmmiid gaskkas – festivála mánáid- ja nuoraidfálaldat

Tarja Porsanger
Filbmaguovddáš Skábma plánejeaddji Tarja Porsanger buvttada mánáid- ja nuoraidbeaivvi. Govva: Skábmagovat

Skábmagovaid filbmaávžžuhusat -ráiddu njealját oasis filbmaguovddáš Skábma plánejeaddji Tarja Porsanger muitala festivála fálaldagas mánáide ja nuoraide.

Eamiálbmogiid filbmafestivála Skábmagovat álgá maiddái dán jagi mánáid ja nuoraid prográmmain.

Skuvlalaččat ja beaiveruovttuid ja giellabesiid mánát miehtá Sámi leat bovdejuvvon gaskavahku ja duorastaga Anárii oassálastit filbmabargobájiide ja geahččat namalassii sidjiide jurddašuvvon filbmačájáhusaid. Nuorat besset dán jagi oaidnit aiddo gárvánan, davvisámegielat Chihiro ilmmiid gaskkas -animašuvnna ja mánátges earret eará olu beaggán Jikŋon II -ealligova.

Skábmagovaid mánáid- ja nuoraidbeaivvit leat jagis jahkái sturron nu, ahte buohkat eai šat čága Anára auditoriijaide. Dan dihte nuoraide leat dál vuosttas háve ordnejuvvon filbmačájáhusat maiddái Anára olggobealde.

– Nuoraide fálaldat lea dán jagi vehá earálágan go ovdal. Nuorat besset oaidnit ođđa, davvisámegielat Chihiro ilmmiid gaskkas -animašuvva Anára lassin earret eará Avvilis, Heahtás, Ohcejogas ja Soađegilis, muitala Sámedikki filbmaguovddáš Skábma plánejeaddji Tarja Porsanger.

Mánáid- ja nuoraidbeaivvit leat ovdal leamaš rabas buohkaide, muhto dán jagi čájáhusat leat beare bovdejuvvon mánáide. Dasage sivvan leat gáržžes sajit.

– Skábmagovaid áigge min stuorra auditoriijat leat nu spággadievva, ahte mii leat ferten ráddjet nu, ahte mánáidbeaivi lea dušše skuvllaid, beaiveruovttuid ja giellabesiid váras. Dat lea gal dieđus positiivvalaš váttisvuohta, go leat nu olu mánát. Mii fertet beare ordnet áššiid nu, ahte dákkár váttisvuohta ii šat boahtteáiggis šatta, Tarja Porsanger smiehtada.

Mánáid- ja nuoraidbeaivvi lassin Skábmagovat fállá mánáide ja nuoraide juoidá maiddái duorastat- ja sotnabeaieahkediid. Ná Porsanger muitala fálaldaga birra.

Rahpandoaluin juoidá maid mánáide

"Ávžžuhan buohkaid boahtit geahččat Skábmagovaid virggálaš rahpandoaluid, mat leat nuvttá.

Rahpandoaluin čájehuvvo ovdamearkka dihte Ann Holmgren bagadan Čuojanasat, mii lea ođđa mánáidfilbma, muhto lea somá, ahte maiddái ollesolbmot besset dan oadnit. Dat lea somás filmmaš.

Ann Holmgren
Ann Holmberg gávccioasat, mánáide oaivvilduvvon surrealisttalaš filmmaid ráiddus Skábmagovat čájeha ovtta filmmaža čuojanasaid namahusain. Govva: Ann Holmgren

Rahpandoaluin čájehuvvo maid earret eará Suvi West bagadan oanehisfilbma Čáhcerávga, mii lei oaidninláhkai maid Venezia Biennálas mannan giđa. "

Rahpandoalut álget otne duorastaga diibmu 18.00 Guovssahasteáhteris.

Chihiro ilmmiid gaskkas

"Skábmagovaid maŋimuš filbma lea Chihiro ilmmiid gaskkas. Dat lea jáhpanlaš máilmmebeakkán filbma, mii lea dál dubbejuvvon davvisámegillii.

Das lea suomagielat teaksta, nu ahte maiddái dat, geai eai máhte davvisámegiela, sáhttet dan geahččat.

Chihiro ilmmiid gaskkas
"Chihiro ilmmiid gaskkas" lea okta máilmmi beakkánamos animašuvnnain. Govva: Skábmagovat

"Chihiro ilmmiid gaskkas", eaŋgasgillii "Spirited Away", vuittii jagi 2003 buoremus animašuvnna Oscar-bálkkašumi."

Filbma čájehuvvo sotnabeaivve diibmu 18.00 sámekulturguovddáš Sajosis. Animašuvnna leat meroštallan leat heivvolaš badjel 8-jahkásaččaide.

Skábmagovaid olles prográmmakárta ja lassidieđut filmmain gávdnojit festivála neahttasiidduin.

Skábmagovaid filbmaávžžuhusat -ráidu oidno neahtas ja gullo rádios

Eamiálbmogiid filbmamáilmmis dehálaš filbmafestiválan šaddan Skábmagovat lea fas dán vahkus Anáris.

Skábmagovat čohkke juo 22. geardde filbmadahkkiid ja kulturberošteaddjiid miehtá máilmmi geahččat eamiálbmotfilmmaid. Festivála álgá duorastaga 23.1. ja bistá gitta sotnabeaivái 26.1. Dán jagi temán lea oktavuohta eatnamii. Festivála váldoguossit bohtet Mátta-Amerihkás, earenomážit Perus.

Festivála dáiddalaš jođiheaddji Jorma Lehtola, veahkkebuvttadeaddji Anni Koivisto ja filbmaguovddáš Skábma plánejeaddji Tarja Porsanger addet iežaset filbmaávžžuhusaid Yle Sámi kanálain juohke beaivve dán vahkus.

Neahta lassin ávžžuhusat gullojit rádios beaivválaččat Yle Sámi iđitsáddagis diibmu 7.00–8.00 ja nuppádassii veaigin Dearvva! Tiervâ! Tiõrv! -sáddagis diibmu 14.30–16.00.

Varrasamosat

Muualla Yle.fi:ssä