Sápmi |

Njellim geaidnu lea viimmat gárvvis – 30 jagi geainnu beales dáistalan Tauno Haltta sávvá maid eanet mátkkálaččaid gávdnat gillái

Njellim geainnu divvun ja Njellim-joga šalddi ođasmahttin Nuorta-Anáris mákse oktiibuot 14 miljon euro.

Tauno Haltta
Njellimlaš Tauno Haltta barggai badjel 30 jagi ođđa geainnu bealis. Dál son lea duhtavaš. Govva: Anneli Lappalainen / Yle

42 kilomehtera guhkkosaš geaidnu Avvilis Njellim gillái Nuorta-Anáris lea gárvvásmuvvan.

Suoma stáhta geavahii 14 miljon euro geainnu divvumii. Badjel guovtte miilla mátkkis huksejuvvui ollásit ođđa geaidnu.

Dán čavčča šadde vel dálvviinge gilvalit vuoi gerget bargguin ovdalgo albmaláhkai dálvá. Juos livčče dálvan veháge árabut, eai livčče geargan ođđa bajildusa rohttet geainnu ala – ja vuot boahtte dálvi ja erenomážit giđđa livčče lean váttes áigi guovllus johttiide.

Dál leat goittotge geargan sihke geainnu divvumiin ja buot geaidnomerkemiiguin. Muhtin báikkiide ceggejuvvojit velá geaidnoáiddit govadagaid bokte.

Nellim 42
Njellimii lea badjelaš njeallje miilla Avvila gilis. Govva: Anneli Lappalainen / Yle

Suoma johtolatdoaimmahaga bajitdárkkisteaddji Keijo Heikkilä geahčada ođđa asfáltageainnu. Son illuda das, ahte boares, heajos geaidnu lea dál dorvvolaš biilavuoddjiide.

– Vuordit, ahte johtolatdorvvolašvuohta buorrána ja biillaid bieđganeamit geahppánit. Mohkkás sáttogeaidnu lei vearrái siivvuhis áiggiid. Gal mii dál vuordit duhtavaš geaidnogeavaheaddjiid.

– Geaidnohuksen ii eisige lean dán juvves beahccevuovdeguovllus álki. Mii leat báikkuid šaddan maid vearrámus luohkáid vehá njoidestit, muhto bargu ovdánii bures.

Keijo Heikkilä
Bajitdárkkisteaddji Keijo Heikkilä Suoma johtolatdoaimmahagas jáhkká ođđa geainnu buoridit dorvvolašvuođa. Govva: Anneli Lappalainen / Yle

– Muhto miibat dán áiggi stuorra ja gievrras mášeniiguin lea huksestit ođđa geainnu. Guovtti jagis gerge, Heikkilä vel lasihastá.

Gili olmmoš sávvá mátkkálaččaid gávdnat Njellimii

Njellimlaš Tauno Haltta barggai badjel 30 jagi ođđa geainnu bealis. Haltta rehkenastá, ahte gal sus golbma–njeallje biilla goit leat moallanan Njellim heajos geainnu dihte. Dál lea nu duhtavaš, ahte illá sánit reahkkájit.

Njellim guovllus leat erenomáš várddusbáikkit, ovdamearkka dihte Skäiđivääri lahka Njellim gili, gos oaidná viidát Anárjávrri máttabeali várreguovllu. Tauno Haltta vuordáge olbmuid dál gávdnat sin gili.

– Boahtte geassi čájeha, gávdnetgo mátkkálaččat deike. Máŋggat avvillaččat leat maid áli hállan, ahte galggašii fitnat dáppe, muhto eai sáhte, go lea nu heajos geaidnu. Dál beassat oaidnit, go sii šávihit deike. Mii dahkat dán Njellim gilis vel dovddus báikki, Haltta mojohallá.

Tauno Haltta
Njellimlaš Tauno Haltta čuččoda ođđa geainnu alde Skäidivääri guovllus. Dál son vuordá olbmuid šávihit gillái. Govva: Anneli Lappalainen / Yle

Son goit ii vel leat gallánan geaidnobargguin. Go oktii leat fártii beassan, geainnu sáhtášii su mielas rohttet juo njuolga Norgga beallái.

– Njellim gillihan lea dego seahkkavuođđu, dáppe ii beasa eará go Avvilii. Dathan livčče turismma dáfusge fiinnis, ahte sáhtášii hurgalit Norgii Girkonjárgii, doppe fas Njávdámii ja ruovttoluotta, dahje Njuorggán ja Ohcejot guvlui.

Davimus Suomas máŋggat geaidnobarggut

Sámeguovllus leat maid eará geaidnodivvumat jođus dahje plánaid vuolde.

Ovdamearkka dihte Anára girkosiiddas leat divodeamen vázzin- ja biilageainnuid, luoddaearuid, ja fitnodagaid ja organisašuvnnaid šiljuid. Boahtteáiggis áigot divvugoahtit maiddái Rájijovsseha tuollostašuvnna ja Suoma ja Ruošša rádjerasttildanbáikki birrasa. Maiddái Soađegili girkosiidda Jeesiöjoga šalddi divvumii njelješgeainnu alde lea várrejuvvon ruhta.

Dasa lassin davvin áigot divvut Gihttela Hanhimaa ja Köngäs gaskasaš geainnu ja hukset geahppajohtolatmáđija Köngäs gillái. Dáid geaidnobargguid ollašuvvanáigi ii leat velá mearriduvvon.

Johtolatdoaimmahaga geaidnobargguide sáhttá oahpásnuvvat dáppe.

Geahča dán áššis lasi vuossárgga Yle Ođđasiin Yle TV1:žis diibmu 16.45!

Varrasamosat: Sápmi

Váldoođđasat

Varrasamosat

Muualla Yle.fi:ssä