Koe uusi yle.fi
Säämi |

Njellim savâstâllâmkurssâliih ellii Čuolisvuonâst muuštâšmin puáris anarâš eellimvyevi

Teija Linnanmäki tuálá Njellimist anarâškiel savâstâllâmtiijmijd, moh láá ruokâsmittám maŋgâs sárnuđ anarâškielâ kuhes-uv puudâ maŋa.

Jietna: Njellimliih käärbismääđhist Čuolisvuonâst já Säplignjaargâst
Jietna
Tobdoh kärbismääđhi maŋa

Porgemáánu majemuu peeivi Njellim anarâškiel sárnumkurssâ vuolgij kárbáin Čuolisvuonân, kost áásá áinoo Aanaarjäävri pirrâsist tuárispeln ässee, Veikko Paltto.

Kärbismätki Njellimist tohon piištij kulmâ tiijme. Tobbeen vuoššii anarâšâi ärbiviärulii purrâmuš, kyelipottáák.

Čuolisvuonâ ässee Veikko Paltto riddo
Čuolisvuonâ ässee Veikko Paltto riddo Govva: Anja Kaarret/Yle
Puáđidijn juávkku eelij val Säplignjaargâst.

Pääihi majemuš ässee Lyyli Seurujävri lii jo áigáá tovle varrim tobbeen meddâl. Majemustáá sun lâi iällám nelji ive talle puáris päihistis.

– Ij puáttám ahheev, mun lam jo hárjánâm teehin, et jiem haalijdgin tohon, muštâlij Lyyli Seurujävri määđhi maŋa. Mudoi sun lijkkui määđhist, ko lâi šiev šoŋŋâ-uv.

Säplignjaargâ puáris tuuveest uáinu riddon
Säplignjaargâ puáris tuuveest uáinu riddon Govva: Anja Kaarret/Yle

Ereslágán savâstâllâmtijme

Määđhi jođetteijest Teija Linnanmäkist lijjii tobdoh heerkist. Sun muurâšt ko puáris anarâš pääihih šaddeh ävđin, mut siämmást sun meid lii pyerimielâst, ko sist lii nuuvt hitruus juávkku já sist lii máđhulâsvuotâ čokkâniđ oovtâst iäláskittiđ kielâ.

–Taggaar reissu lâi, et jiem lah vaibâm ollágin, mun lam tuše finnim energia lase, illood  Linnanmäki.

Säämi máttááttâskuávdáš uárnee suullân ohtii ohhoost Njellimist muádi tiijme savâstâllâm puudâ anarâškielân.

Teija Linnanmäki joođeet taid tiijmijd. Teija jieš oopâi ááhus kielâ 2009-2010 tollum anarâškielâ tievâsmittemškovliittâsâst.  Tom maŋa sun halijdij toollâđ kielâtáiđus paijeen já halidij sárnumskipárijd. Nuuvt sij algii čokkâniđ já talle maŋeláá Säämi máttááttâskuávdáš poođij mieldi já tääl sij čokkâneh ohtii ohhoost Njellim kerhotáálust.

Kielâkurssâ  kiäsut

Taat Njellim kielâkurssâ  kiäsut sijdâlijd. Tiijmijn joteh muádiloves. Puohah iä peesâ jyehi ohhoost mieldi, mut táválávt tiijmijn láá lovmat uásálistee. 

Tiijmij uáivifáddán lii sárnuđ kielâ já oovtâst sii hundáruššeh kielâkoččâmušâid, tivoh jieijâs feeilâid já meid povvusteh ennuv. Uáiviäššin ij lah sárnuđ feilâttes kielâ, peic et ruokkâsmid sárnuđ kielâ. 

Kielâ lasseen kerholiih uápásmeh meid kulttuurân já  opâttâleh tovláid pargoid. Ovdâmerkkân kamuvsuoinij čuoppâm já tuoijum.

 – Hárjuttâllâp rähtiđ puohlágán ärbivuáválijd pargoid. Tot lii hirmâd hitruu, te talle toh säänih-uv ain kávnojeh, iätá máttáátteijee Teija Linnanmäki.  

Sinikka Saraspää čuoppâmin kamuvsuoinijd
Sinikka Saraspää, kii lâi kamuvsyeiničuoppâmpeeivi jođetteijee. Govva: Anja Kaarret/Yle

– Ovdil jiem máttám kielâ ollágin, Teija tiijmijn lam oppâm, muštâl Sinikka Saraspää, kii lâi kamuvsyeiničuoppâmpeeivi jođetteijee.

Savastâllâmtiijmeh juátkojeh Njellimist

Njellimist juátkojeh savâstâllâmtiijmeh, suullân jyehi majebaargâ 11-13 kooskâst,  val roovvâdmáánu aalgâ räi. Talle puátá pelnub máánu koskâ já tiijmeh juátkojeh skammâmáánu pelimuddoost.

Tiijmij jođetteijee Teija Linnanmäki muštot kuittâg, et kannat sunjin väldiđ ain ohtâvuođâ ovdil tiijmij já tärhistiđ, et láá-uv toh, ko sist sättih muttuđ sundáttâlmeh já sii tuálih tekstâsaavâi peht ohtâvuođâ nubijdis.

Varrasamosat: Säämi

Váldoođđasat

Bivnnuhamosat

Varrasamosat

Muualla Yle.fi:ssä