Sápmi |

Njellimii plánejit luopmogili, mas livčče 26 orrunvistti ja restoráŋŋa – stuorra investeremat maiddái Anáris ja Ohcejogas

Anára gielddaráđđehus dohkkehii plánaide spiehkastatlobi vuossárgga.

Inarijärven maisema
Arkiivagovva Anárjávrri gáttis. Govva: Berislav Jurišić / Yle

Anára Njellima gilážii plánejit hukset stuorra luopmogili. Anárjávrri gáddái šattaše 26 orrunvistti, restoráŋŋa, sávdni ja fuolahusvisti.

Anára gielddaráđđehus mearridii vuossárgga ovttamielalaččat mieđihit luopmogillái spiehkastatlobi. Spiehkastatlohpi dárbbašuvvo, daningo gáddeguovllus ii leat lávva, mii livččii fámus. Luopmogillái sáhttet ohcat huksenlobi easkka, go spiehkastatlohpi lea fidnen lága fámu.

Luopmogili áigu hukset avvillaš fitnodatdoalli Jyrki Linnanmäki. Son ii dán muttus áiggo kommenteret fidnu.

Turismii investerejit miehtá Sámi

Turisttaid mearri lea maŋimuš áiggiid sakka lassánan ja dat álgá oidnot maiddái investeremiin miehtá Sámi. Ovdamearkka dihtii Anárii ja Ohcejohkii leat dál ceagganeamen ođđa hoteallat.

Mannan vahkus almmustahttui diehtu, ahte Ylläs Aurora Estate -hotealla oamasteaddjit Sirly Schinmann ja Heidi Seikkula hukseheaba Anárii ođđa hotealla 7,1 miljon euroin. Dasa šaddet 42 lanja, restoráŋŋa ja lávggohat (Spa).

Havainnekuva Aurora Estate Inari -hotellista.
Dákkár hotealla plánejit Juvdujoga gáddái. Govva: Aurora Estate

Hotealla huksegohtet boahtte gease ja doaimma lea ulbmilin álggahit juovlasesoŋŋa 2021 áigge. Eanabihttá, gosa hotealla huksejit, lea Juvdujoga gáttis luondduguovddáš ja sámemusea Siidda ja Sámekulturguovddáš Sajosa buohta.

Ohcejohnjálbmái fas leat ceagganeamen ođđa hotealla, restoráŋŋa ja luopmoguovddáš. Dasa lassin miehtá Deanu huksejit ođđa visttiid turismma várás. Jahkedoajáldagas Deatnogáttis rahpasii maid ođđa restoráŋŋa.

Varrasamosat: Sápmi

Váldoođđasat

Varrasamosat

Muualla Yle.fi:ssä