Sápmi |

Njukčá birge buollašis - Sámis leat dálvet suttit main njuvččaid sáhttá oaidnit

Go njuvččá dolggit leat ortnegis de uvjagearddi ja buoiderávssá veagas njukčá gierdá garra buollašiidge.

Video: Nuori laulujoutsen talvella, tammikuu 2019, Muonio Kutuniva.
Video: Njuvččat Kutuniva suttis Muonio gielddas. Lappi loddedieđalaš searvvi ságadoalli Ismo Kreivi muitala mo njuvččat cevzet buollašis. Dáiddár Áilu Valle ássá Anár Keaptuvei gáttis ja vuorddaša njuvččaid juo dohkoge. Reporter: Jouni Aikio. Govve: Antti Mikkola ja Anneli Lappalainen. Čuohppan: Anneli Lappalainen Video: Yle Areena

Njuvččá lundui gullá vuolgit dálvái eret bessenguovlluin. Stuorát mearit čoahkkanit Nuortameara ja Davvimeara rittuide ovdamearkan Mátta-Ruŧŧii, Dánmárkui ja Duiskii. Riddoguovlluin Mátta-Suomas ja Ålanddas leat maid stuorabuš doahkit juohke dálvvi.

Ovttat lottit dahje njukčábearrašat sáhttet báhcit maiddái siseatnan bogiide ja nuriide. Dán áigái davimus báikkit gos sihkkarit njuvččaid oadná dálvitge leat Muonios, Jerisjärvi ja Törmäslompolo gaskasaš nuoris. Báiki oidno bures Gihttel Raattama ja Muonio gaskasaš geidnui.

Oktonas lottit dahje njukčadoahkit leat ceavzán dálvvi čađa maiddái sámeguovllus. Ođđajagimánus 2019 lea okta njukčá oidnon Ohcejoga Geassesaibogi vuolde ja Suolojávrris. Loddi orro ceavzimin bures ja máhttá girdit, dadjet báikkálaš olbmot.

Dáiddár Áilu Valle lea mánnávuođas čuvvon lottiid ja dál fas eanet beroštišgoahtán dain. Dálá ássanbáiki giktala eandalii čáhcelottiid geahčadit. – Vuorddán njuvččaid dál go beaivváš lea ihtán ja giđđa lahkona, dadjá Valle.

Dáiddár Ailu Valle.
Dáiddár Áilu Valle čuovvu njuvčcčaid lottiid eará lottiid lihkastagaid. Govva: Yle / Anneli Lappalainen

Anár gielddas Keaptuvei, Kettujoki suttit hohkahit njuvččáid ájahallat dávjá juovllaid rádjai, muhtin dálvviid gitta ođđajahkái. Dálvet 2018 - 2019 maŋímuš njuvččat begge Keaptuguoikka vuolde juovlamánu 14. beaivve.

Čakčat njuvččat čoahkkanit stuorra doahkkin, dávjá 200 lottige, Suoma ja Ruoŧa rádjaetnui Geagganetnui Eanodagas. Giđđat fas vuosttasat lávejit seaivut Báhčaveadjái dahje Keaptujohkii Anáris.

Varrasamosat: Sápmi

Váldoođđasat

Varrasamosat

Muualla Yle.fi:ssä