Sápmi |

Njuolggadusat Norgga ja Suoma rájá alde rivdet jámma – Ohcejoga gielddahoavda: "Vuordit gealdagasas, ahte leago rádji rabas juovllaid áigge"

Mannan vahkuloahpa rájes rádjeguovllu ássit eai dárbbaš karantenii, juos rasttildit Norgga ja Suoma gaskasaš ráji.

Video: Vuokko Tieva-Niittyvuopio
Yle Sámi doaimmaheaddji Kaisa Aikio jearahalai Ohcejoga gieldahoavda Vuokko Tieva-Niittyvuopio vuossárgga Ylen aamu -prográmmas. Video: Ylen aamu

Sámis rádjeguovllu ássit leat gártan koronaáigge čuovvut ráddjehusaid, mat rivdet jámma. Skábmamánu álggus Norgga mearridii fas gáibidit karantena buohkaide, geat rasttildit rájá. Mannan lávvardaga ráddjehusaid fas ložžejedje.

Ohcejoga gieldahoavda Vuokko Tieva-Niittyvuopio muitala Ylen aamu -sáddagis, ahte rádjejohtinnjuolggadusaid ložžemis lea stuorra mearkkašupmi fitnodagaide, mat buvttadit bálvalusaid rádjeguvlui, ovdamearkka dihtii rádjegávpejasaide.

– Áššehasat besset fas doaimmahit áššiid Suoma beallái. Das lea stuorra mearkkašupmi go jurddaša, ahte mannan háve rádji giddejuvvui justa ovdal beassážiid. Dál, go juovllat leat boađi boađi, vuordit gealdagasas, ahte leago rádji rabas juovllaid áigge. Das lea ekonomalaš mearkkašupmi ja dat váikkuha fitnodagaide ja fitnodagaid bargiid doibmii.

Tieva-Niittyvuopio mielas njuolggadusaid lea váttis áddet, danin go Norga ja Suopma dulkojit njuolggadusaid eará láhkái: Norga luoitá dihto buohccedikšunguovlluin olbmuid, dán dáhpáhusas earret eará Lappi buohccedikšunbires, ja Suopma fas dulko rádjesearvvušnjuolggadusa.

– Lean gullan, ahte dán dieđiheamis ja njuolggadusaid áddemis leat leamašan váttisvuođat. Sávvamis dasa bidjet eanet návccaid vai buohkat, geat deike háliidit boahtit doaimmahit áššiid, beasašedje deike, muitala Tieva-Niittyvuopio.

Njuorggámis illudit rájá rahpaseamis

Norgga ráđđehus mearridii mannan vahkus álbmotdearvvašvuođainstituhta ávžžuheami geažil, ahte Lappi, Ålándda ja Nuorta-Savo buohccedikšunbiret váldojuvvojit eret nu gohčoduvvon rukses guovllu njoammunlisttus.

Seammás Norga lasihii rukses listui Gaska-Suoma, Pohjois-Karjala, Pirkanmaa ja Päijät-Häme buohccedikšunbiriid. Dáin guovlluin Norgii mátkkošteddjiin gáibiduvvo logi beaivve karantena.

Vahkuloahpas Yle muitalii, ahte earret eará Njuorggámis rájá rahpaseamis illudit. Bensenstašuvnna eaiggát Ari Naapanki mielde gilis leamašan oalle jaskat dan maŋŋá, go Norga čavgii koronanjuolggadusaid golggotmánus.

– Go mun geahčan dohko nuppi beallái geainnu, de gal doppe jo logemat Norgga biilla leat gávppe šiljus. Midjiide riŋgegohte jo álgováhkus, go Norggas hállagohte rájáid rahpaseamis, muitala Naapanki.

Varrasamosat: Sápmi

Váldoođđasat

Varrasamosat

Muualla Yle.fi:ssä