Sápmi

Njuorggáma lahkosiidda leat ihtán amas ráhkkanusat, maid báikki olbmot leat fitnan imaštallamin – guovllus leat govvemin soahtefilmma

Video: elokuvalavasteet Nuorgamissa
Njuorggáma duoddariidda leat maŋimuš áigge ihtán amas ráhkkanusat, degomat dát buollán bensenstašuvdna. Video: Kirsti Länsman / Yle, Vesa Toppari / Yle

Ohcejot guovllus olbmuid njálmmit leat duoldan go sáhka leamaš amas ráhkkanusain Njuorggáma lahkosis. Doppe leat govvemin ođđa suopmelaš filmma ja duoddariidda leat huksen rekvisihtaid, maid máŋgasat leat fitnan dutkkadeamen lagabusge.

Guovdu Suoma davimus gili duoddariid leat maŋimuš vahkuid áigge ihtán dakkárat, mat eai doppe leat ovdal dihtton. Dat lea imaštahttán báikki olbmuid degomat buollán bensenstašuvdna Buolbmátjávrri luotta guoras.

– Gal mun vuoiga vuos imaštallen go dán oidnen, ahte mii árpmuid lea dákkár ođđa ráhkkanus, muhto orru hui boaris mii lea ihtán. Gal mun de gulastin, ahte dat lea filbmarekvisihta, mii lea deike huksejuvvon, muitala njuorggánlaš Aslak Holmberg.

Son goittot ii leat vel molson báikki, gos fitná táŋkemin biilla.

– Gal mun ain táŋken duos gilis. Ii dat orron dát gilvaleaddjifitnodat nu geasuheamen, bohkosa Holmberg.

Aslak Holmberg, Nuorgam
Njuorggánlaš Aslak Holmberg lea okta sis, guhte lea fitnan imaštallamin ártet ráhkkanusaid Buolbmátjávrri luotta guoras. Govva: Kirsti Länsman / Yle

Ohcejogas govvejit suopmelaš soahtefilmma

Dál čakčamánus leat Ohcejot guovllus álgán govvet ođđa suopmelaš filmma, mii muitala golleroggis, guhte gártá okto dáistalit duiskalaš soalddáhiid vuostá nuppi máilbmesoađis Lappis.

Filbmadahkkit leat bargan ovttas báikkálaččain ja ožžon Meahciráđđehusas lobiid hukset filbmarekvisihtaid earet eará Buolbmájávrri luotta gurrii, muitala filbmabuvttadeaddji Petri Jokiranta.

– Báikkálaččat veahkehit min fievrridit gálvvuid duoddarii, mii ijastallat dáppe Njuorggámis. Eathan mii basttášii bargat filmma, jus eai báikkálaččat livčče mielde dás. Olbmot leat gal váldán min bures vuostá, giitala Jokiranta.

Jokiranta muitala, ahte go sii leat geargan filbmenbargguin de sii burget buot rekvisihtaráhkkanusaid ja čorgejit daid eret.

Petri Jokiranta, tuottaja, Subzero Film Entertainment
Filbmabuvttadeaddji Petri Jokiranta muitala, ahte sii leat hárjánan dasa, ahte filbmagovven beroštahttá olbmuid. Govva: Kirsti Länsman / Yle

Loga eambo suomagillii: Jalmari Helander ohjaa uuden Lappiin sijoittuvan Sisu-toimintaelokuvan – kuvaukset alkavat pian, Sony osti maailmanlaajuiset levitysoikeudet

Báikki olbmuid njálmmit leat njuolgga duoldan go sáhka leamaš imaš rekvisihtain, mat ceaggájit duoddaris. Dat lea beanta virkkosmahttán Njuorggán gili eallima.

– Dathan gal orru vehá gelddolaš. Juoga dakkár ođđa dáhpáhuvvá ja nu guhká go dat lea buot lobiid ordnen numot galgá. Dathan gal lea duođáid somá, ahte dáppe maid dáhpáhuvvá juoga diekkár ja beassá de filbmateáhteris oaidnit dan iežas ruovttuguovllu, árvala Aslak Holmberg.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä